SDF oo abaalmarino gudoonsiiyey wariyayaal tartan u gallay tabinta wararka arrimaha bulshadda
Talaado,
Janaayo ,17, 2017 (HOL)- Munaasibad balaadhan oo lagu abaalmarinayo
wariyeyaal ka qaybgallay tartan loo qabtay warbixino laga diyaarinayo horumarka
iyo arrimaha bulshadda ayaa lagu qabtay Ambasodoro hoteel ee magaaladda
Hargeysa.
Wariyeyaashan
ayaa dhamaystay tobabar ku saabsan sida loo tabiyo mashaariicda horumarka iyo
wararka arrimaha bulshadda ee saameynta ku leh shacabka, waxaana munaasibadda
lagu soo bandhigay daraasad ka hadlaya in warbaahinta awoodda saarto wararka
siyaasadda, balse aanay jirin wararka arrimaha bulshadda, waxaanay daraasadan
sameeyey Somaliland development Fun (SDF), waxaanay daraasadaasi lagu sheegay
in 72% wararka la qoraa yihiin wararka Siyaasadda, wararka horumarka qaranka
(National Development) laga qoray 3.1%, arrimaha dhaqaalaha waxa
laga qoray 2.1%, wararka arrimaha bulshadda waxa warbaahintu tabiyeen 21%,
wararka arrimaha deegaanka khuseeyana waxa laga qoray 10%, waxaanay la sheegay
in warbaahinta inta u badan ee wararkooddu yihiin arrimaha siyaasadda, taasi
ayaa keentay in sanduuqa horumarinta Somaliland oo dalal badan oo reer Yurub
qaadhaanka ugu shubaan Somaliland inuu qabto Siminaar ku saabsan in arrimaha
bulshadda warbixino laga diyaarin lahaa, iyagoo warbaahinta soo tusay
mashaariic kala duwan ee ay wadaan oo ay ka mid yihiin biyo xidheenno waaweyn,
beeraha iyo wadooyinka.
Tobabarka
markii uu dhamaaday waxa tartan loo galay warbixino ku saabsan arrimaha
bulshadda, waxaana tartankaasi ka qaybgalay gashaan wariye, waxaana
abaalmarintaasi ku guulaystay oo kaalinta kowaad gallay wariye Barkhad
Ladiif Maxamed Cumar oo ka tirsan bahda Hiiraan Online.
Wariye
Barkhad-Ladiif Maxamed Cumar ayaa abaalmarintii labaad ku guulaystay tartamo
wariyeyaasha loo qabtay, waxaanu hore ugu guulaystay tartan hay’adda qaramadda
midoobay ee UNDP u qabatay wariyeyaasha Somaliland.
Sidoo
kale, waxa isaguna warbixin halkaasi ka soo jeediyey Mustafe Aadan oo ka mid
ahaa macalimiintii tobabarka bixinayey, waxaanu ka sheekeeyey caqabadaha haysta
warbaahinta iyo aqoon korodhsigan oo uu sheegay in wax badan la kala
faa’iidaystay.
Munaasibadan
abaalmarinta lagu gudoonsiiyey wariyeyaashii tartankaasi ku guulaystay waxa ka
soo qaybgallay wasiirka Warfaafinta Cismaan Saxardiid Cadaani, wasiirka
Qorsheynta qaranka Maxamed Ibraahim Qabo iyo gudoomiyaha ururka saxaafadda
SOLJA Maxamuud Xuuto.