Talaado, Janaayo, 17, 2017 (HOL) – Waxaa maanta magaalada
Muqdisho lagu qabtay qeyb ka mid ah doorashada xubnaha aqalka hoose, gaar ahaa
labadii kursi ee ka harsanaa xildhibaannada beellaha Banaadiriga.
Doorashada oo aheyd mid xiiso gaar ah xambaarsaneyd ayaa mid
mid ah kuraasta lagu tartamay la maray dhowr wareeg kadib markii ay
musharixiinta kala bixi waayeen.
Kursiga koowaad oo ay ku tartamayeen Haween ayaa waxaa ku soo
baxday Biibi khaliif Maxamed oo heshay 47 cod, kadib makii ay ka
guuleysatay Qamar Islow Nuur oo aheyd xubintii la tartameysay.
Kursiga kale oo ay ku tartamayeen ilaa Saddex rag ah oo kala ah Caamir
Axmed Maxamed, Lutfi Shariif Maxamed iyo Shariif Maxamed Cali ayaa waxaa ku soo
baxay Lutfi Shariif Maxamed oo helay 26 cod.
Marka la eego doorashada labada kursiga ee beellaha
Banaadiriga, ayaa taa macnaheedu waxaa uu noqonayaa in heer gabagabo ah ay
marayaan guud ahaan doorashooyinka xubnaha ka dhiman aqalka hoose, inkastoo
wali ay dhiman yihiin kuraasta shan xubnood oo horay loogu celiyay dowlad
gobolleedyada iyo xildhibaanno ka dhiman xubnaha gobollada W/qooyi ee aqalka
sare iyo hoose.
C/raxmaan Diini, Hiiraan Online
[email protected]
