Ugaas Xassan oo ka hadlay dilal ku saleysan aano qabiil oo ka dhacay G Hiiraan iyo Galguduud
Isniin, Janaayo, 16, 2017 (HOL) – Ugaas Xassan Ugaas Khaliif
oo ka mid ah duubabka dhaqanka Soomaalieed ayaa ku baaqay in la joojiyo dilalka
ku saleysan qabiilka ee ka dhacay qeybo ka mid ah gobollada Hiiraan iyo
Galguduud.
Ugaaska ayaa baaqan ka jeediyay kulan uu maanta magaalada
Beledweyne kula yeeshay odayaasha iyo waxgaradka beellaha gobolka Hiiraan oo
looga wada hadlay xiisada ka taagan deegaanno hoostaga gobollada Hiiraan iyo
Galguduud.
‘’Horay ayaan marar badan arintan uga hadlay colaad wax faa’iido
ah malaha, waxaan ka tacsiyeeynayaa
dadkii micno la’aanta loo dilay maalintii shalay labada dhinacba, waxaan
leeyahay hal joojiyo dilalka ku dhisan qabiilka’’ayuu yiri Ugaas Xassan Ugaas
Khaliif.
Ugu danbeyntii, Ugaas Xassan ayaa ugu baaqay waxgaradka iyo
odayaasha labada dhinac in ay ka shaqeeyaan nabad-galyada lagana hortago wax kasta oo
keeni kara in colaada oo sii baahda.
Maalintii shalay ayeey aheyd markii dad rayid ah siyaabo
kala duwan oo loogu dilay gobollada Hiiraan iyo Galguduud.
C/raxmaan Diini, Hiiraan Online
[email protected]
