Axad, Janaayo, 15, 2017 (HOL) -Golaha degaanka Degmada
Laascaanood ayaa doortay gudoomiye cusub, kadib markii ay cod buuxa xilkii kaga
xayuubiyeen gudoomiyihii xilka
hayey.
Gudoomiyaha cusub ayaa loo doortay C/casiis Xusseen Xasan Taako oo ay
gacnta u taageen 15 Xildhibaan oo ka mid 20 xildhibaan oo golaha
fadhiyey.
Gudoomiyaha gobolka Sool ahna sii hayaha Xoghayaha degmada Laascaanood
Cabdi Khayre Dirrir ayaa ku dhawaaqay in laga bilaabo maanta uu yahay
C/casiis Xusseen gudoomiyaha degmada.
"Waxaan kula darfaarmayaa golaha degaanka in ay sidaa ay maanta isugu
duuban yihiin isugu duubnaadaan, maayirkana waxaan leeyahay feejignaan
yeelo yaan ta maanta dhacday kugu dhicin" ayuu yidhi Cabdi Khayre.
Cismaan Saleebaan gudoomiyaha xilka laga qaaday ayaa sheegay in uu ku
qanacsan yahay hawsha dhacday, inuu la shaqaynayo gudoomiyaha cusubna
waa balan qaaday.
Gudoomiyaha Cusub Taako oo ka hadlay ayaa waxa uu sheegay in ku
qanacsan yahay xilka loo doortay, waxaanu balan qaaday inuu waxqabad
la imaan doono dhab ah.
Qaar ka mid ah xildhibaanda oo halkaasi ka hadlay ayaa gudoomiyaha
cusub ugu goodiyey in uu mari doono jidka guddoomiyihii ka horeeyay.
Gudoomiyaha xilka laga qaaday ayaa ahaa kii ugu waxqabad badnaa ee soo
mara magaalada Laascaanood, waxaana labadii sano ee la soo dhaafay ee
uu xilka hayey isbedel xooglihi ku yimid magaalada.
Ugu danbeyntii, waxaa bulshada ku dhaqan
magaalada Laascaanood
is weydiinayaan denbiyada xilkiisa uu ku waayey oo ay ugu weyn tahay
wado laami ah oo uu gurigiisa ku leexiyey, waxana ay sheegayaan in wax
qabadkiisu uu ka badnaa waxa lagu eedeeyey, waxse la eegayaa waxa uu
la yimaado Duqa cusub.
Seynab Cabdi Warsame
[email protected]
Laascaanood Gobolka Sool
