Ra’iisal wasaarihii hore ee Soomaaliya oo fariin u diray xildhibaannada baarlamaanka
Axad, Janaayo, 15, 2017 (HOL) – Ra’iisal wasaarihii hore ee
Soomaaliya Cabdi Faarax Shirdoon Saacid ayaa ugu baaqay xildhibaannada cusub ee
baarlamaanka Soomaaliya in ay ka taliyaan masiirka umadda Soomaaliya, xili ay
soo dhawday doorashada madaxweynaha.
Waxaa uu sheegay in xildhibaannada maanta gacantooda ay ku
jirto sida uu hadalka u dhigay badbaadinta umada Soomaaliyeed, islamarkaana
looga baahan yahay in ay codkooda siiyaan shaqsi u taagan midnimada iyo in
leysku keeno bulshada Soomaaliyeed.
‘’Xildhibaannada waxaan leeyahay howlweyn oo adag ayaan
idinku soo fool leh, masiirka umada Soomaaliyeed gacantiina ayuu ku jiraa,
waxaa leydinka baahan yahay in si miirqabta oo maskax leh aad codkiina u
dhiibataan, waayo sida uu maanta xildhibaanka codkiisa u bixiyo ayeey
Soomaaliya u ekaan doontaa, sidaa daraadeed waxaan ka rajeyneynaa in ay arintaa
si wanaagsan uga fiirsan doonaan ‘’ ayuu yiri ra’iisal wasaarihii hore ee
Soomaaliya.
Ugu danbeyntii, waxaa uu sheegay in xildhibaannada yihiin kuwo
matala shacabka Soomaaliyeed, islamarkaana ay mas’uul ka noqon doonaan
haddii ay u dooraan sida uu hadalka u dhigay hogaan xun.
Dhawaan ayaa la soo gabagabeeyay doorashada guddoonka sare
ee baarlamaanka, waxaana lagu wadaa in bishan Janaayo sidoo kale la soo doorto
madaxweynaha Soomaaliya ee afarta sano ee soo socta.