Xarrakada Al-shabaab oo sheegtay in uu sii soconayo dagaalka ka dhanka dowladda federaalka
Isniin, Feberaayo, 27, 2017 (HOL) – Xarrakada
Al-shabaab ayaa sheegtay in marnaba aysan joojin doonaan dagaalka ay kula jirto
dowladda federaalka iyo ciidamada caawinaya ee AMISOM, kadib doorashadii
dhawaan ka dhacday dalka.
Afhayeenka xarrakada Al-shabaab Cali Max’uud Raage ayaa sheegay in dowladaha
reer galbeedka ay gadaal ka taagan yihiin dowladdan, isagoo ku goodiyay in
dagaalka uu halkiisa ka sii socon doono, oo aan wax is bedeli ah soo kordhin
doonin magacyada cusub iyo shaqsiyaadka hoggaanka qabtay sida uu yiri.
“Waxaa leeyahay ama C/llaahi keena,
ama Shariif Keena, ama Xasan Keena ama Farmaajo keena, ama Faarax iyo Jaamac
keena, waxba nooma kala duwana, ujeedka dagaalkeena kuma xirna shaqsiyaad, ee
waxay ku xiran tahay mabda’,” Sheekh Cali dheere.
Ugu danbeyntii, afhayeenka ayaa ugu
baaqay dadka soomaaliyeed in aysan ku kadsoomin, waxa uu ugu yeeray
shirqoollada iyo dhagarta cadawga, isagoo caddeeyay ee maamulka cusub ee
Madaxweyne Maxamed C/llaahi Farmaajo uusan ka duwaneyn maamuladii ka horeeyay.
Hadalka ka soo yeeray Al-shabaab
ayaa imanaya xili dhawaan madaxweynaha Soomaaliya uu ku dhawaaqay in
dowladdiisa sida ugu dhaqsiyaha badan u soo afjari doonto dagaalka ka dhanka ah
Al-shabaab.
C/raxmaan
Diini, Hiiraan Online
[email protected]
