Fannaanaddii ugu horeysay ee Soomaaliyeed Guduudo Carwo oo ku geeriyootay magaalada Hargeysa
Khamiis, December, 07, 2017 (HOL) - Waxaa Alle ha u naxariisteen ku geeriyootay magaalada Hargeysa Aroornimadii hore ee saakay Shamis Abuukar Ismaaciil ‘’Guduudo Carwo’’ oo aheyd gabadhii ugu horeysay ee Soomaaliyeed oo heesta.
Shamis Abuukar ayaa ku dhalatay deegaan ku dhaw magaalada Berbera sanadkii
1935, iyadoo ku soo biirtay Fanka taariikhdu markey aheyd 1952kii oo markii ugu
horeysay codkeeda laga maqlay Radio Hargeysa.
Xilligii ay Guduudo Carwo billowday in ay heesto, dumarka
kumaysan dhiiran jirin fanka iyo ka hadalka idaacadaha.
Doorka Dumarka ee Ruwaayadihii
xilligaa iyo Heesaha waxaa matali jiray rag, ka hor inta aysan Shamis Abokar
billaabin heesaha, maadaama dumarka aan lagu aqoon heesaha, taasi waxay
sababtay in sannadihii ugu horeeyay la qariyo magaceedii, waxaana loo bixiyay
Guduudo Carwo.
Dowladda Soomaaliya ayaa ka tacsiyeeysay geerida fannaanada Soomaaliyeed
Shamis oo sanadihii ugu danbeeyay ku xannuusaneyd magaalada Hargeysa.
C/raxmaan Diini, Hiiraan Online
[email protected]
