Jimco, December, 29, 2017 (HOL) – Doorashooyin heer
Qaran ah, Qaraxyo iyo Weerarro culus oo dad badan ku dhinteen, Dilal qorsheysan
iyo Isbadalo siyaasadeed waxey Astaan lagu xasuusto u noqon doonaan sanadkan
2017da ee sii dhamaanaya.
Bishii January 2017:- Soomaaliya
ayaa markii ugu horeysay Taariikhda yeelatay Aqal sare ( Gollaha Odayaasha) oo
ka kooban 51 Xubnood oo laga soo doortay Maamul Gobolleedyada dalka, isla
Bishaas waxaa la soo doortay Guddoonka labada Aqal :-
Prof Maxamed Cismaan Jawaari ayaa mar kale noqday
Guddoomiyaha Golaha Shacabka halka Cabdi Xaanshi Cabdullaahi oo loo doortay
Guddoomiyaha gollaha Aqalka.
08 Bishii February 2017:- Waxaa madaxweynaha Soomaaliya loo doortay
Maxamed Cabdulaahi Farmaajo,oo isla February dhamaadkeedii Ra’isul wasaare u magacaabay Xasan Cali Kheyre oo ahaa
shaqsi aan horay loogu Aqoon masraxa Siyaasada.
21 Bishii Marso 2017:-
Ra’isul Wasaare Kheyre ayaa magacaabay 68 wasiir, 8 ayaa haween ahaa, waxaa
kale oo ku jiray 15 wasiiru dowle, 26 wasiir, 26 ku-xigeen, wasiiradaas 42
Xildhibaanno.
01 Bishii April 2017:-Golaha Shacabka ayaa codka
kalsoonida siiyay Xukuumada uu soo magacaabay Ra’isul Wasaare Cali Kheyre.
03 Bishii May 2017:- Askari
ka tirsan ciidamada dowladda ayaa meel aan ka fogeyn madaxtooyada Soomaaliya ku
dilay Wasiirkii Howlaha Guud iyo Dib-u -Dhiska dowladda federaalka Cabaas Siraaji oo ahaa Nin
dhalinyaro ah oo wax ku soo bartay Xeryaha Dhadhaab.
11 Bishii May 2017:- Shir Soomaalida loogu qabtay
London, waxaa laga soo saaray heshiis cusub loo bixiyay New Partnership ( Heshiiska
Iskaashiga Cusub) kaa oo badalay Qorshihii New Deal –ka.
Qaraxyadii ugu waaweynaa ee Sanadkan dhacay :
Sanadkan waxaa dhacay Qaraxyo waaweyn oo Ismiidaamin ahaa
iyo Weerarro lagu qaaday Hoteello ku kala yaala magaalada Muqdisho iyo qaar ka
mid ah gobollada dalka Somaaliya, waxaana ka mid ahaa Weerar Culus oo Kooxo
hubeysan ku qaadeen Hotelka Dayax ee magaalada Muqdisho oo ay ku dhinteen 28
ruux.
Qaraxyo Ismiidaamin ahaa iyo Weerar toos ah lagu qaaday
Makhaayadaha Pizza House iyo Posh Treats oo lagu dilay 25 qof oo
ay ku jireen shaqaale Ajnabi ah oo Makhaayadahaa ka howlgalayay.
Isla sanadkan Gaari Miineysan oo gudaha u
gallay Xarunta Degmada Wadajir ayaa galaaftay nolasha 17 ruux, Weerarradaa oo
idil waxaa mas’uuliyadooda sheegtay Al-shabaab.
Bishii Febraayo ee sanadkan
2017 :- Qarax weyn oo ka dhacay Xaafadda Kaawo Godey ee magaalada Muqdisho waxaa ku dhintay dad ka badan 30 ruux sidoo
kale waxaa ku dhaawacmay ku dhawaad 40 ruux, isla bishii Feberaayo waxaa Qarax
lagu weeraray Hotelka Village ee Boosaaso,
10 Bishii
Sepember 2017 :- Qarax Ismiidaamin ah oo ka dhacay magaalada Beledweyne
ayaa waxaa ku dhintay ugu yaraan 4 Ruux oo rayid ah, waxaana ka mid ahaa dadkii Qaraxaa ku dhintay Wariye Cabdullaahi Cismaan Macalin oo ahaa Wakiil Wareedkii TV Jubbaland.
14kii Bishii
October :- Soomaaliya waxey u aheyd maalin Madow Gaari Walxaha Qarxa laga soo buuxiyay ayaa ku
dilay Isgoyska Zoobe dad tiradoodu kor u sii dhaafeyso 512 Ruux oo u badnaa dad
rayid ah.
Isla 28kii Bisha
October :- Weerar toos ah Dalbey hubeysan kula wareegeen Hotelka
Naas-Hablood ayaa lagu dilay dad u badnaa rayid oo Carruur ay ka mid ahaayeen
waxaana dadkii weerarkaa ku dhintay ku jiray Wasiirkii Arrimaha Gudaha
maamulka Koonfur Galbeed Madoobe Nuunoow Maxamed iyo xildhibaan hore
Cabdinaasir Gaarane.
Weerarradii sanadkan dhacay
Sanadkan sidoo kale waxaa dhacay Weerarro kala duwan oo
lagu qaaday Saldhigyo ciidamada dowladda, kuwa howlgalka midowga Africa AMISOM
Koofurta Soomaliya iyo Xarumo ciidan oo ku yaala deegaannada Puntland.
27 Bishii January 2017:-
Xooggga Al-shabaab ayaa Weerar ku qaaday saldhigga ciidamada AMISOM ee deegaanka Kulbiyow ee gobolka
Jubbada Hoose, iyagoo sheegay in ay ku dileen weerarkaa tiro ka badan 50
Askari.
03 Bishii Marso 2017:-
Ciidamada Kenya ee qeybta ka ah howlgalka midowga Africa AMISOM ayaa sheegay in
ay dileen 57 dagaalyahan oo ka tirsan Al-shabaab kaddib weerar ay ku qaadeen
saldhig ku dhawaa degmada Afmadow.
08 Bishi June 2017: Dagaal culus oo Al-shabaab iyo ciidamada
Puntland ku dhaxmaray deegaanka Af-Urur ayaa lagu dilay tiro badan oo Askar ah, waxaana ka mid ahaa dadka weerarkaa ku dhintay Saraakiil ciidan.
10 Bishii June, 2017:
- Dagaal culus oo ka dhacay deegaanka Barriire ayaa lgu dilay 10-ruux oo shacab ah,
sidoo kale weerarkaas waxaa uu khasaare ka soo gaaray dhinacyadii dagaalamay.
Weerar ka dhacay deegaanka Buula-Mareer Shabeellaha Hoose
ayeey Al-shabaab ku sheegteen in ay dileen 39 Askari oo ka tirsan ciidamada
AMISOM, Al-shabaab ayaa sidoo kale sanadkan weeraray degmada Baraawe ee gobolka
Shabeellaha Hoose.
Sanadkan ayaa sidoo kale waxaa ay weerarro ka dhaceen deegaannada kala ah
Kulbiyow, Afgooye, Cali Fooldheere oo ka tirsan Gobolka Shabellaha Dhexe,
War-Maxan iyo Tixsiile ee gobolka Sh/hoose, Baraawe, Qoryooley, Deegaanka
Bariirre, Af-Urur, Duleedka Kismaayo, Baydhabo, Qansax Dheere,
Waajid, Galgala iyo meelo kale.
Mareykanka ayaa duqeymihii ugu badnaa ka geystay
gobollada Shabeellooyinka, Jubbada Hoose, Jubbada Dhexe iyo Gedo waxaana lagu
dilay Saraakiil iyo dagaalyahanno ka tirsan Al.-shabaab.
03 Bishii September 2017:- Al-shabaab
ay dagaal culus ku qaaday saldhig ay ciidammada dowladda Soomaaliya ku
leeyihiin deegaanka Buulo-Guduud oo qiyaastii 30 km dhinaca waqooyi uga beegan
magaalada Kismaayo.
23kii Bishii August 2017:-
Dowladda Soomaaliya ayaa u gacan galisay Itoobiya Cabdikarim
Qalbi-dhagax oo laga soo qabtay gobollada dhexe inkastoo Golaha shacabka
Dhiibistiisa sharci-darro ku tilmaamay.
Isla Bishii Augusto :- Waxaa
dowladda isku soo dhiibay ku-xigeenkii hogaamiyaha Ururka Al-shabaab Mukhtaar
Rooboow Abuu-Mansuur oo Warbaahinta u sheegay in uu isaga baxay Al-shabaab.
Isbadalladii Siyaasadeed ee
sanadkan dhacay
Sidoo kale sanadkan waxaa jiray Isbadalo siyaasaded oo ka
dhacay Qaar ka mid ah maamul gobolleedyada dalka Soomaaliya :-
26 Bishii
February 2017:- Cabdikariin Xusseen Guulleed madaxweynihii hore ee Galmudug
ayaa xilka iska casilay kaddib markii xildhibaanno ku shiray Cadaado sheegeen
in ay xilkii ka qaadeen, 03 bishii May ayaa
madaxweynaha maamulka Galmudug loo doortay Axmed Ducaale Gaale Xaaf.
14
Bishii August 2017:- Baarlamaanka Hirshabeelle ayaa kalsoonida kala noqday
madaxweynihii hore Cali Cabdullaahi Cosoble oo 68 xildhibaan oo ku shiray
Jowhar sheegeen in ay Kalsoonida kala noqdeen.
16
Bishii Sepember, 2017:- Waxaa xilka madaxweynaha loo doortay Maxamed Cabdi
Waare oo ah Aqoonyahan muddo dheer la soo shaqeynayay hay’addaha UN-ka.
09 Bishii Octobe 2017
:- Magaalada Kismaayo ee xarunta gobolka
Jubbada Hoose waxaa shir ku yeeshay madaxweynayaasha dowlad gobolleedyada kaddib
khilaaf soo kala dhaxgalay qaar ka mid ah madaxda dowlad gobolleedyada iyo
dowladda Dhexe.
Shirkaa waxaa looga
dhawaaqay golle ay ku mideysan yihiin madaxda dowlad gobolleedyada
waxaana gollahaa guddoomiye loogu doortay madaxweynaha Puntland Cabdiwali Maxamed Cali Gaas halka ku –xigeenna
loo doortay madaxeynaha Hirshabeelle Maxamed Cabdi Waare
Mas’uuliyiin Xilalka Iska casillay iyo kuwo kale oo la
magacaabay
Sanadkan waxaa xilalkii ay ka
hayeen Xukuumadda iska casillay Labo Wasiir oo kala ahaa Wasiirkii Difaaca
Xukuumadda Soomaaliya Cabdirashiid Cabdullaahi iyo Wasiirkii Gargaarka iyo
Maareynta Masiibooyika Dr Maryam Qaasim Axmed.
Waxaa sidoo kale xilkii Taliyaha ciidamada
xoogga dalka Soomaaliyeed iska casilay Jen Axmed Jimcaale Carfiid.
Ra’iisal wasaare Kheyre ayaa Aug 22,
2017 u magacaabay Wasiirkii Howlaha Guud
iyo Dib u dhiska Eng Saadaq C/llaahi Cabdi waxaa xilkii horay u banneeyay
Wasiir Cabaas Siraaji oo toogasho lagu dilay
26
November ee Sanadkan u Ra’iisal wasaare Kheyre ayaa xilka Wasiirka
Gaashaandhigga u magacaabay Maxamed Mursal Sheekh Cabdiraxmaan.
Taliyaha ciidamada Xoogga dalka Soomaaliyeed
ayaa isna loo magacaabay Jen CabdiWali Jaamac Gorod.
29 Bishii October
2017 : - Kulan gollaha Wasiirrada Soomaaliya ay ku yeesheen
magaalada Muqdisho waxaa mar kaliya xilalkii laga qaaday Agaasimihii hay’adda
Nabad-sugida iyo Sirdoonka Qaranka Maxamed Cabdullaahi Sanbaloolshe iyo
Taliyihii ciidamada Booliiska Soomaaliyeed Jen Cabdxakiin Daahir Saciid Saacid,
xilka Taliyaha Booliiska ayaa si Ku-meel-Gaarka loogu sii dhiibay Jen Mukhtaar
Xusseen Afrax.
Dilalkii sanadkan dhacay
Sanadkan ayaa sidoo kale waxaa guud ahaanba
dalka ka dhacay dilalkii ugu badnaa oo lagu bartilmaameedsaday
Xildhibaanno Saraakiil ciidan,
Nabadoonno
Dadkii sanadkan la dilay waxaa ka mid ahaaa
General Cabdulle Maxamed Sheekh Quruurux, Weerar ka dhacay degmada
Xamar-Weyne oo lagu dilay Xoghayihii Guud ee Ururka Haweenka Qaranka,
Canab C/laahi Xaashi iyo wiil ay dhashay Guddoomiyaha Ururka Haweenka Qaranka,
Batuula Axmed Gaballe, oo lagu magacaabi jiray Axmed Jaamac Xersi.
Sanadkan sidoo kale waxaa la dilay Guddoomiyihii
Galgaduud Maxamed Daahir Cali Cilmi, Nabaddoon Geeddi Maxamuud Axmed (Xaaji
Geedi Firdhiye) iyo Taliye ku xigeenkii Saldhigga Booliska oo lagu dilay
Magaalada Boosaaso.
Waxaa ka mid ahaa dadka la dilay sanadkan Xildhibaan
Maxamed Cabdi Guuleed iyo Gashaanle Maxamed Yuusuf Cali
Sidoo kale waxaa jiray dilal ka dhacay Gobollada Shabeellaha Hoose, Baay Bakool,
Gedo iyo Hiiraan.
06 Bishii December 2017:-
Maamullada Galmudug iyo Ahlu-Sunna ayaa gaaray heshiis rasmi ah oo ka koobnaa 14 qodob kaa oo lagu soo afjaray Khilaafkii dhanka siyaasadeed.
11 Bishii
December, 2017 :- Qarax Gaarigiisa
loogu xiray oo ka dhacay degmada Wadajir ayaa lagu dilay Wariye Maxamed
Ibraahim Gaaboow oo ka tirsanaa TVga Kalsan.
14 Bishii December 2017 :- Dugsiga
Tababarka Booliiska ee Gen Kaahiye Qof
walxaha Qarxa isku soo xiray ayaa ku dilay 18 Askari oo ka tirsanaa ciidamada
Booliiska Soomaaliyeed.
17 Bishii December 2017:- Ciidamo ka tirsan
dowladda Soomaaliya ayaa xili habeen ah Gurigiisa ku weeraray siyaasiga
Cabdiraxmaan Cabdishakur Warsame, 6 ilaaladiisa ka tirsan ayaa goobta lagu
dilay, ciidamada weeraray Guriga ayaa xabsiga u Taxaabay Cabdiraxmaan
Cabdishakuur oo markii danbe maxkamada gobolka Banaadir sheegtay in ay wax
danbi ah ku weyday.
Ugu danbeyntii 28kii
bishan December oo ku beegneyd maalintii shalay dowladda Soomaaliya ayaa si
rasmi ah ula wareegtay maamulka Hawada Soomaaliya oo tan iyo wixii ka danbeeyay
Bur burkii dowladda dhexe laga maamulayay magaalada Nairobi ee dalka Kenya.
C/raxmaan Diini, Hiiraan Online
[email protected]