Cabdiramaan Cabdishakuur : Waa laga gudbay xiligii Qori caaradii wax lagu maamulayay
Khamiis, December, 21, 2017 (HOL) –Siyaasiga Cabdiraxmaan
Cabdishakuur Warsame oo maanta dib xoriyadiisii u helay ayaa markii ugu
horeysay kaddib xariggiisa waxaa uu la hadlay Warbaahinta, isaga oo
sheegay in ugu danbeyntii Cadaalladu
guuleysatay.
‘’Waxaan rabaa in aan halkan uga mahad celiyay dhamaan
dadkii i barbar istaagay oo ay ka mid yihiin odayaasha Muqdisho, sidoo kale
waxaa u mahad celinayaa guddoomiyaha
maxkamada gobolka Banaadir, waad
arkeyseen maxkamadana waad joogteen sida uu xukunku u dhacay, in dulmi leygu soo weeraray, ilaaladeydii lagu
laayay hantideydiina lagu bur buriyay’’ ayuu yiri Cabdiraxmaan Cabdishakuur
Warsame.
Wuxuu sheegay in qeybtii koowaad ee maxkamada soo dhamaatay
loona gudbi doono qeybta labaad oo sida uu hadalka u dhigay uu raadsan doono
xuquuqdiisa.
‘’Maxkamada qeybtiidii hore wey soo dhamaatay waxaa dhiman
qeybtii labaad oo aan xuquuqdeyda ku raadsan doono, ciddii igu been abuuratay
beenteedii waa la cadeeyay, waxaan rabaa in aan u sheego madaxda dalka waa laga
soo gudbay waqtigii Qori wax lagu maamuli jiray dalkaanna xili dib
loo celiyo ma joogo ayuu yiri’’ Cabdiraxmaan Cabdishakuur.
Guddoonka labada Aqal ee dowladda ayuu ugu baaqay in
sharciga la taagsadaan sida uu hadalka u dhigay cid kasta oo dastuurka iyo
qawaanniinta dalka ka weynaata.
Shirka jaraa’id ee Cabdiraxmaan Cabdishakuur ayaa imanaya
kaddib markii maxkamada gobolka Banaadir ku dhawaaqday in wax danbi ah lagu
waayay siyaasiga, islamarkaana xeer ilaalintu ku soo gudbin weyday cadeymo
waqtigii loo qabtay.
C/raxmaan Diini, Hiiraan Online
[email protected]
