Arbaco, December, 20, 2017 (HOL) – Laga soo bilaabo bishii September ee sanadkan 2017
Al-shabaab waxaa ay weerar ku qaadeen dhowr saldhig militari oo ay ku
sugnaayeen ciidamada xoogga dalka Soomaaliyeed, iyaga oo ku dilay weeraradaas
ku dhawaad 60 Askari, sidoo kalana ku qabsaday hub kala duwan.
Hadaba Qiimeyn ama Daraasad ay sameysay Wasaradda
Gaashaandhigga xukuumadda Soomaaliya ayaa lagu ogaaday in 30% ciidamada ka
tirsan xoogga dalka yihiin kuwo aan hubeysneyn.
‘’Qiimeyn la sameeyay waxaa lagu ogaaday in ciidamada
xoogga dalka 30% aysan wax hub ah heysan, qaar kalana ay ka maqan yihiin hubka
culus ama ku dhaxdhaxaadka ah’’
Wasiirka difaaca Soomaaliya Maxamed Mursan Sheekh Cabdiraxmaan ayaa qiray
gaabiska dhinaca hubka ee haysta ciidamada Qaranka Soomaaliyeed.
Wareysi gaar ah uu siiyay VOA-da waxa uu wasiirka shaaciyay inay jiraan
ciidamo Soomaali ah aanan wax hub ahna haysan balse dowladda ay isku dayeyso
inay hubkooda u dhamaystirto inkastoo badankooda ciidamada hub haystaan.
Warka ka soo baxay wasaaraadda Gaashaandhigga ayaa imanaya xili Mareykanku
shaaciyay in ay joojiyay dhaqaalihii uu ku bixin jiray qeybo ka mid ah
ciidamadda xoogga dalka Soomaaliyeed.
Laakiin madaxweynaha dowladda Soomaaliya Maxamed Cabdullaahi Farmaajo ayaa
sheegay in joojinta dhaqaalaha Mareykanku uu bixin jiray wax saameyn ah ku
yeeelan doonin ciidamada qalabka sida.
C/raxmaan Diini, Hiiraan Online
[email protected]
