Munaasabada 74 Sanno-Guuradii ka soo wareegtay Aas-aaska ciidamada Booliiska oo lagu qabtay Muqdisho
Arbaco, December, 20, 2017 (HOL) – Dugsiga
tababarka ciidamada Booliiska Soomaaliyeed ee Gen Kaajiye ayaa maanta waxaa ka
dhacay munaasabad lagu xusayo sanad guuradii 74-aad ee ka soo wareegtay markii
la Aas-aasay ciidamada Booliiska Soomaaliyeed sanadkii 1943-dii.
Ra’iisal wasaaraha xukuumadda Soomaaliya Xassan Cali Kheyre iyo xubno ka
tirsan gollaha wasiiradda oo uu ugu horeeyo Wasiirka Amniga Maxamed Abuukar
Isloow Ducaale, Taliska ciidamada Booliiska Soomaaliyeed, guddoomiyaha gobolka
Banaadir iyo Danjirayaal ka socday beesha caalamka ayaa ka qeybgalay
munaasabada.
Qeybaha kala duwan ee ciidamada Booliiska ayaa Dhoolatus iyo Gaada ka Cayaar ku soo bandhigay munaasabada.
Ra’iisal wasaare Kheyre oo Salaan Sharaf ka qaatay Cutubyo ka tirsan
Booliska ayaa Ubax dhigay Taallada Booliska ee ku dhex taalla Dugsiga Gen
Kaahiye, taasoo lagu maamuusay saraakiishii iyo Askartii ka geeriyooday ciidamada
Booliska Soomaaliyeed.
Ra’iisal Wasaaraha oo halkaas hadal kooban ka jeediyey ayaa ugu hambalyey
Ciidanka Booliska Soomaaliyeed maalintan qiimaha gaarka ah u leh dowladnimada
iyo shacabka Soomaaliyeed, isagoona sheegay in munaasabad weyn oo Madaxda
Qaranku ay ka qeyb galayaan la qaban doono Caawa oo Khamiis ah.
Dhinaca kale, Madaxweynaha Jamhuuiryadda Mudane Maxamed Cabdullaahi Farmaajo
ayaa hambalyo u diray Saraakiisha iyo guud ahaan Ciidanka Booliska.
C/raxmaan Diini, Hiiraan Online
[email protected]
