Xeer Ilaalinta Soomaaliya oo maanta laga sugayo cadeymo la xiriira eedda loo heysto Cabdiraxmaan Cabdishakuur
Arbaco, December, 20, 2017 (HOL) – Maxkamada gobolka Banaadir oo maalintii
shalay la horgeeyay Siyaasiga Cabdiraxmaan Cabdishakuur Warsame ayaa ka
dalbatay Xeer Ilaalinta Soomaaliya in muddo ku dhan 24 saac gudahood lagu
horkeeno maxkamada cadeymo la xiriira eedaha loo heysto Siyaasiga.
Tahliil Xaaji Axmed oo ah Qarreenka u dooddaya Cabdiraxmaan Cabdishakuur
ayaa sheegay in xariga siyaasiga aan marnaba loo mari sida uu hadalka u dhigay
sifo sharci ah islamarkaana dowladda laga doonayo in ay ka jawaab celiso.
Arbacada maanta ah ayaa loo balansan yahay in mar kale dib loogu noqdo
maxkamada oo dhinaca xeer ilaalinta ka sugeysa cadeymo la xiriira danbiyada loo
heysto Siyaasiga.
Lama oga ilaa xad cadeymaha ay maanta hor geyn doonaan maxkamada Xeer
Ilaalinta ama dacwad oogayaasha, hasse ahaatee laamaha Amniga dowladda ayaa
shir jaraa’id oo ay ku qabteen magaalada Muqdisho waxaa ay ku sheegeen in
ay gacanta dhigeen Agab kala duwan oo filan dacwad ku soo oogidda Cabdiraxmaan Cabdishakuur.
Wixii ka soo kordha Wararka ku saabsan maxkamadeynta Siyaasiga waan idin soo
gudbin doonnaa..
C/raxmaan Diini, Hiiraan Online
[email protected]