Talaado, December, 19, 2017 (HOL) – Afhayeen u hadlay gobolka Oramiya oo
lagu magacabo Addisu Arega Kitessa ayaa sheegay in rabshadahii gu dambeeyay ay
ka dhasheen Weerarro aargoosi ah oo ay dadka Oramada ku qaadeen degmo ku taalla
Oramiya halkaasi oo 32 oo qof oo Soomaali ah lagu dilay.
Waxuu intaa ku daray in 29 qof oo Oramo ah ay dileen dad Soomaali gobolka
Hawi Gudina iyo dagmada Daro Lebu,taasi oo uu sheegay in ay ka dhalatay in Oramada
ay qaadaan weeraro aargoosi ah.
Wakaalada wararka ee Reuters oo soo xiganaysa afhayeenkan maamulka Oromiya ayaa
sheegay in dowladda degaanka Oramiya ay ka shaqaynayaan sidii cadaaladda loo
horkeeni lahaa dadkii ka dambeeyay dilalka dhacay.
Dawlad-deegaanka Soomaalida Itoobiya ayaa dhankaooda ku eedeyay ismaamulka
Oromiya dhimashada ugu yaraan 60 qof oo ay sheegeen in ay ahaayeen dad
maxaabiis ah.
Ra’iisul wasaaraha Itoobiya ayaa xaqiijiyay in guddi loo saaray arrinta si
ay u soo baaraan ka dibna wuxuu sheegay in waxa sharciga uu ka qabo lagu qaadi
doono kuwa dembiga uu ku caddaado.
Isku dhacyadani u dhaxeeya Soomaalida iyo Oramada ayaa laga cabsi qabaa in
ay wax u dhinto ammaanka Itoobiya.
Itoobiya ayaa ah wadanka ugu wayn dhanka dhaqaalaha gobolka waxana ay
Itoobiya xiriir dhaw la leedahay wadamada reer galbeedka.
C/raxmaan Diini, Hiiraan Online
[email protected]
