Madaxweyne Farmaajo : Dhaqaalaha uu Mareykanku naga joojiyay wax saameyn ah naguma yeelan doonto
Talaado, December, 19, 2017 (HOL) – Madaxweynaha dowladda
Soomaaliya ayaa sheegay in ciidamada xoogga dalka Soomaaliyeed wax saameyn ah
ku yeelan doonin dhaqaalihii uu Mareykanku joojiyay, isaga oo intaa ku daray in
dowladda federaalka dabooli doonto baahiyaha ay qabaan ciidamada.
‘’Musuq-maasuqu wuxuu noqday wax Annaga nalagu bartilmaameedsado, taasoo keentay in Mareykanku joojiyo qeyb ka mid ah dhaqaalihii ku bixin jiray ciidamada, waxaan idin sheegayaa joojinta dhaqaalaas wax saameyn ah idinkuma yeelan doonto, waxaan diyaar u
nahay in aan daboolno baahiyaha aad qabtaan’’ ayuu yiri madaxweynaha oo xarunta
wasaaradda gaashaandhigga kula hadlayay saraakiil iyo cutubyo ka tirsan
ciidamada qalabka sida.
Madaxweyne Farmaajo ayaa sheegay in dowladdaha caalamka ee
kaalmada siiya dowladda federaalka xaq u leeyihiin in ay hubiyaan halka uu ku
baxo dhaqaalaha ay bixyaan, sidaa daraadeed looga baahan yahay dowladda iyo
shacabka Soomaaliyeed in ay la yimaadaan nidaam sax ah oo hufan oo kalsooni gallin kara dowladdaha caaawiya Soomaaliya.
‘’ Annaga ayaa nalaga rabaa in aan marka hore isa saxno si
naloo gacan qabto, islamarkaana kalsooni gallinno dadka Ajnabiga ah ee na caawiya’’ ayuu yiri madaxweyne Farmaajo.
Dhinaca kale madaxweynaha ayaa ugu baaqay ciidamada xoogga
dalka Soomaaliyeed in loo diyaar garoobo dagaal sida uu hadalka u dhigay ka
dhan ah Al-shabaab, isaga oo sheegay in waqtigiisa inta ugu badan uu la qaadan doono ciidamada.
''Waxaa jir doona howlgal wada jir ah oo ka dhan ah Al-shabaab sidaa daraadeed waqtigeyga ugu badan waxaana la qaadan doonaan ciidamada'' ayuu yiri madaxweynaha oo ku amaanay ciidamada xoogga dalka Soomaaliyeed sida ay diyaarka ugu yihiin ka xoreynta dalka Al-shabaab.
Hadalka madaxweynaha ayaa imanaya xili dhawaan Mareykanku
sheegay in uu joojiyay dhaqaalihii uu siin jiray ciidamada xoogga dalka
Soomaaliyeed sababo la xiriira musuqmaasuq iyo wax is dabamarin.
C/raxmaan Diini, Hiiraan Online
[email protected]
