Tuug lagu toogtay xaafada Islii, Nairobi Kenya
Khamiis, Sitember 08, 2016 (HOL)-Tuug hubeysnaa ayaa boolisku ku toogteen xaafada Islii ee caasimada Kenya ee Nairobi.
Bastoolad ay kujireen afar xabbadood ayaa laga qaaday tuugaa lagu dilay Islii. Labo tuug oo kale oo burcad ahaa ayaa baxsaday ayagoo lug halkaa uga baxsaday.
Labo kale ayaa shalay xaafada Buruburu ee Nairobi lagu dilay. Burcadaa ayaa dhac geysanaayay markii dad shacab ah ay dhagax ku dileen.
Labada lagu dilay Buruburu ayaa jebiyay guri la daggan yahay halkaa oo ay mindi ku dhufteen wiil 18 sano jir ah.
Wiilkaa ayaa waxaa la sheegay in dhaawac halis ah ay u geysteen. Dadka oo arinkaa ka careysan ayaa dhagax ku dilay labadaa tuug ee wiilka dhaawacay xaafada Buruburu.
Dhanka Islii, waxaa baryahaan ku soo batay burcada hubeysan iyo tuugada. Muddo haatan qiyaas ahaan laga joogo labo asbuuc nin dukaanley ahaa oo Soomaali ahaa oo ka ganacsan jiray raashinka ayaa tuugo ku toogteen oo kudileen xaafada Islii agagaarka masaajidka nawaaxiga California.
Ninkaa ayaa ay tuugadaasi kusoo weerareen dukaankiisa oo kuyaalay meel aad ugu dhow masaajidkaa oo dadka qaarkiina ay u yaqaanaan Fanya Bidii.
In dhawaale waxaa ganacsatada xaafada Islii ay ka cabanayeen arinkaan lasoo darsay ee dhibaatada tuugada iyo burcada hubeysan ay ku hayaan ah iyo arimo kale oo dhowr ah.
Aaden M Warsame
Hiiraan Online
[email protected]
