Guddoomiyaha Gobolka Sanaag oo ka Warbixiyay Dagaal beeleed ka dhacay Degmada Ceel-Afweyn
Jimco, September 02, 2016
(HOL) — Guddoomiyaha gobolka Sanaag Axmed Cabdi Falay, ayaa sheegay in siddeed ruux
ay ku Geeriyoodeen, 15 ruux oo kalena ay ku Dhawaacmeen dagaal laba beelood oo wadda degga
degmadda Ceel Afweyn ee gobolka Sanaag.
Sidoo kale, waxa uu sheegay
in gurmadkii loogu jiray joojinta dagaalkaasi uu ku dhintay sarkaal ka tirsan
ciidanka Mlitariga iyo askari boolis ah oo ku dhaawacmay.
Waxa kale oo iyaguna rasaas
ku dhacday gaadhigii Badhasaabka gobolka Sanaag Axmed Cabdi Falay waxaanay saniftay mid kamid ah ilaaladiisa oo dhaawac
fudud ka soo gaadhay.
Badhasaabka Gobolka oo
khasaaraha dhabta ah ee dagaalkaasi ka hadlaya waxa uu yidhi “waxaaan joogaa
Dararweyne oo ah goobta dagaalku ka dhacay, waxaanu ka dhacay laba goobood oo
degmadda Ceel af weyn hoos tagta, waxaana dagaalkiii u horeeyey ku dhintay hal
qof, waxaana ku dhaawacmay saddex nin
iyo haweenay umal ahayd, goobta kale waxa ku geeriyooday toddoba qof,
waxayna isku noqonaysa sideed qof inay ku dhinteen dagaaladasi, intii aanu
hawshaasi ku jiraynay xagga ciidanka Militariga waxa nagaga dhintay hal
askari”.
“Way jiraan in rasaas ku
dhacday gaadhigayga, waxba ilaahay naguma yeelin mid ka mid ah ilaaladayda ayey
yara saniftay marka dhaawac lagu sheegi karo way fudud tahay”ayuu yidhi
Badhasaabka gobolka Sanaag oo sheegay inay dhex galeen labaddii beelood ee
dirirayey.
Badhasaabka gobolka Sanaag
ayaa sheegay in ciddii nabadda ka hor timaadda awood dawladeed u adeegsan
doono, isla markaana hadda ay ku dhex jiraan labaddii beelood ee dirirtu ku
dhex martay.
Dhinaca kale, Wasiiirka
Arrimaha gudaha Somaliland Yaasiin Xaaji Maxamuud Farotoon ayaa sheegay in
ciidanka Somaliland usoo gurmadeen labadda beelood ee ku dagaalamaya koonfurta
Sanaag.
Wasiir Farotoon oo
warbaahinta la hadlay ayaa sheegay in dagaalkaasi labadda beelood ee walaalaha
ah ku dhexmaray ay sababtay khasaare dhimasho iyo dhaawac, wallow aanu carab
dhabin tiradda rasmiga ah ee waxyeeladdu ka soo gaadhay dagaalkaasi.
Hase yeeshee, wuxuu sheegay
in laba askari oo ciidanka qaranka iyo Booliska iskugu jiray ku geeriyoodeen
gurmadii ay ugu jireen joojinta dagaalkaasi.
Wasiiir Farotoon oo ka
warbixinaya dagaalkaasi waxa uu yidhi “ Dagaalkaasi wuu dhacay dad badanna way
ku dhaawac may, dad badana way ku dhinteen, dawlada oo dhana way ka
qaybqaadatay joojinta dagaalkaasi,ciidamaddii dawladda oo dhan waa la
dhaqaajiyey haday noqon lahayd ciidanka Booliska iyo Militarigaba, meelihii
dagaaladdu ka dhaceen gacanta lagu hayaa, meelo kale oo woxogaa xiisad kale ka
jirta oo la leeyahay wax way ka dhici karaan way jirtaa, ciidanka qaranka
khasaare ayaa ka soo gaadhay oo nin sarkaal ah wuu ku dhintay, nin boolis ahina
wuu ku dhaawacmay”.
Barkhad-ladiif M. Cumar,
Hiiraan Online
[email protected]
Hargeysa, Somaliland