Al-shabaab oo baahisay Haybta Ruuxii Fuliyay Weerarkii Ismaadaaminta ahaa ee Hotel SYL Muqdisho
Khamiis, September 01, 2016
(HOL) — Al-shabaab ayaa warbaahinta taageerta ka baahisay wareysi uu bixiyay ninkii
fuliyay weerarkii is-miidamainta ahaa ee Hoteel SYL oo ku dhaw madaxtooyada
lagu qaaday maalin ka hor, kaasoo sababay tiro aad u badan oo dhimasho iyo
dhaawacyo ah.
Ruuxan fuyay weerarka ayaa lagu
magacaabi jiray, Jaabir Cabdullaahi Diiriye, sidoo kalena waxaa loo yaqaannay Shuki,
waxayna Al-shabaab sheegtay inuu u dhashay beesha Mareexaan. Iyagoo intaa ku
daray in Jaabir oo kaxeynayay baabuur xamuul ah oo laga soo buuxiyay waxyaabaha
qarxa uu la beegsaday Hoteelka SYL.
Sidoo kale, Al-shabaab ayaa Warbixinteeda ku xustay in Jaabir oo 44 jir ahaa uu ku dhashay deegaanka
Buusaar ee Gobolka Gedo Sannadkii 1972-kii,
isla markaana uu hawlo shaqo oo kala duwan kasoo qabtay Qaybaha kala duwan ee Al-Ssabaab
ka kooban tahay, isagoo ugu dambeyn ka mid ahaa guutada is-qarxinta ee
Al-shabaab.
Dhanka kale, Wareysiga laga
qaaday Jaabir ayuu kaga hadlay Taariikhdiisa iyo sida uu doonayo inuu weerarka
uu qaadayo u fuliyo, waxaana uu ka mid noqonayaa tiro ka tirsanaa Al-shabaab oo
weerarro noocan oo kale ah ka fliyay Muqdisho.
Xarakada Al-shabaab ayaa xilliyadii
dambe baahinayay magacyada iyo Qabiilka ay u kasoo jeedaan dadka fuliya weerarrada
is-qarxinta ah ee ay ka geysanayaan qaybo ka mid ah dalka, iyadoo arrintan ay
tahay mid ku cusub Al-shabaab.
Ugu dambeyn, Weerarkii ka
dhacay Muqdisho maalin ka hor ayaa waxaa natooda ku waayay in ka badan 25-qof
oo isugu jiray askar iyo dad shacab ah, wuxuuna ka mid ahaa qaraxan kuwii ugu
cuslaa ee Muqdisho soo mara.
Maxamed X. Xuseen, Hiiraan Online
[email protected]
Muqdisho, Soomaaliya
