Wararka Maanta: Sabti, Jan 23, 2016-Nabadsugida Jubaland oo ugu baaqday shacabka inay Weerarrada Al-shabaab ka Feejinaadaan

Nabadsugida Jubaland oo ugu baaqday shacabka inay Weerarrada Al-shabaab ka Feejinaadaan

Sabti, Janaayo 23, 2016 (HOL) —Afhayeenka nabadsugidda Jubaland Axmed Max’uud Max’ed oo maanta shir jaraa’id ku qabtay xafiiskiisa ayaa ugu horeyn tacsi u diray ehellada dadkii ay waxyeelada kasoo gaartay weerarkii ay Al-shabaab ku qaaday maqaayad ku taal xeebta Liido ee magaalada Muqdisho.

Afhayeenka nabadsugidda Jubaland ayaa amaanay ciidamada nabadsugidda qaranka ee NISA oo uu sheegay in ay si guul ah kusoo afjareen kooxihii weeraray islamarkaana gudaha u galay maqaayad ku taal xeebta Liido, isagoo sheegay in kooxahaasi ay damacsanaayeen in ay geysteen qasaare ka badan kii ay geeystaan balse laga hortagay.

“Nabadsugidda qaranka, aad baan ugu mahadcelinayaa, waxaan leeyahay howsha aad qabateen waa tan aad bulshada wakiilka uga tihiin, waxaan amaanayaa sida geesinimada leh ee aad usoo afjarteen kooxihii doonayay in ay shacabka gumaadaan,” ayuu hadalkiisii raaciyay.

Dhinaca kale, afhayeenka nabadsugidda Jubaland oo ka jawaabayay su’aal la weeydiyay oo ahayd wada shaqeynta kala dhexeeysa nabadsugidda qaranka ayaa yiri, “Hay’adda nabadsugidda qaranka waxaa taliye u ah C/raxmaan Tuuryare, inaguna waxaan nahay dowlad goboleed qaranka ka tirsan, marka isaga ayaan hoostagnaa, wada shaqeyn aad u wanaagsanna way naga dhexeeysaa.”

“Nabadsugida Qaranka iyo tan maamul-goboleedyada xogaha ayay is dhaafsadaan, qorsha-yaasha cadawgana way isku gudbiyaan, waxaa la doonayaa in shacabka Soomaaliyeed ay muujiyaan feejignaan dheeraad, waayo way arkaan in dagaalku uusan ahayn mid si gaar ah loogu ugaarsanayo masuuliyiin ee shacabkii xitaa la ugaarsanayo,” ayuu hadalkiisa ku yiri afhayeenka Nabadsugidda Jubbaland.

Weerar ay habeenkii Jimcaha kooxo ka tirsan Al-shabaab ku qaadeen maqaayado ku taal xeebta Liido ayaa waxaa ku dhintay in ka badan 25 qof oo ay ku jiraan afar kamid ah kooxihii weerarka soo qaaday, ayadoo la sheegay in kooxahaasi ay rasaas oodda uga qaadeen dad badan oo usoo damaashaad tagay neecaawda xeebta, maadaama ay ahayd maalin fasax ah oo ay dadka Soomaaliyeed shaqooyinka ka nastaan.

Hay’adda Nabadsugidda qaranka ayaa shaacisay in ay gacanta ku dhigtay nin ay sheegeen in uu hogaaminayay weerarka lagu qaaday maqaayadaha ku taal xeebta Liido.

Xasan Nuur, Hiiraan Online
[email protected]
Kismaayo-Soomaaliya