Howl-gallo laga sameeyay Bosaaso oo lagu soo qab-qabtay 120 Qof oo laga shakisan-yahay
Sabti, December, 17, 2016 (HOL) - Maamulka
gobolka Bari ayaa sheegay in 120 Qof lagu soo qab-qabtay howl-galo ay ciidamada
amniga ka sameeyeen xaafado ka tirsan degmada Bosaaso labo maalin ka dib markii
magaalada Bosaaso lagu dilay taliye sare oo ka tirsanaa ciidamada Puntland.
Gudoomiyaha gobolka Bari ayaa ayaa hadalkan ka
sheegay kalfadhigii 3-aad ee golaha deegaanka ,kaasi oo diiradda lagu saaray
amniga ,isla markaana lagu kordhiyay howl-galada ka dhan-ka ah kooxo la sheegay in
ay khal-khal galinayaan amniga.
“Dad-kan aan qabanay ,waxaan ku haynaa baaritaan-no
kala duwan ,cid-dii lagu waayo wax danbi ah waa la sii dayn doonaa “ ayuu yiri
gudoomiyaha gobolka Bari Yuusuf Maxamed Wacays Dhado oo si adag uga hadlay
dayac uu sheegay in uu ka jiro xag-ga
amniga.
Dhado ayaa sheegay in Puntland ay xoojin doonto
dagaalka lagula jiro Al-shabaab , waxaana dadka la qabtay uu sheegay in
qaarkood lala xiriirinayo dilkii taliye ku xigeenkii sedexaad ee ciidamada Puntland Jaamac Saxardiid oo la
beegsday xilli uu ka soo baxay hotel ku yaala magaalada Bosaaso.
Howl-galadan ayaa si aad ah uga socda xaafad-da
laanta Hawada oo ah halka uu ka dhacay dilkii loo gaystay taliyaha ,mana uusan
sheegin in gacanta lagu soo dhigay rag-gii fuliyay dilka Saxardiid oo lagu
aasay qabuuraha Bosaso.
Ugu danbayn, Kooxda Al-shabaab oo ka dagaalanta
gudaha Somalia ayaa sheegatay mas’uuliyad-da weerarro ka dhacay Puntland
labadii sano ee la soo dhaafay , waxaana dhowr jeer hore uu dagaal toos
dhex-maray ciidamada Puntland iyo kooxda Al-shabaab oo saldhig-yo ku leh buuraha
Gal-gala.
Faysal Mohamed Hassan
[email protected]
