Dagaal ciidammada Jubbaland iyo Al-shabaab ku dhaxmaray deegaa hoostaga degmada Kismaayo
Jicmo, December,. 16, 2016 (HOL) - Madaxweyne ku-xigeen kowaad ee dowlad gobolleedka Jubbaland Max'uud Sayid Aadan oo shir jaraa'id ku qabtay magaalada Kismaayo ayaa faah faahin ka bixiyay dagaal ciidammada Jubbaland iyo Al-shabaab ku dhaxmaray deegaan hoosta degmada.
Dagaalka oo ka dhacay deegaanka Cabdalla-biroole qiyaastii 50km dhinaca galbeed uga beegan magaalada Kismaayo, ayaa ka danbeeyay khilaaf gacan ka hadal isku badalay soo kala dhaxgallay dagaalamayaasha Al-shabaab iyo dad xoolo dhaqato ah kaddib markii ay ku gacan-seyreen bixinta Zakawaat Al-shabaab ay weydiisteen dadka reer miyig ah.
'' Dagaalka waxaa uu ka dhacay nawaaxiga deegaanka Cabdalla-biroole, waxaa uu ka bilaawday iska horimaad dhaxmaray markii hore dad xoolo dhaqato ah oo Al-shabaab ay xoog uga qaateen xoolihii ay dhaqanayeen kaddib markii ay ka biyo diideen bixinta wax ay ugu yeeraan Zakawaat oo Al-shabaab ay doonayeen in ay ka qaadaan dadka xoola dhaqatada ah '' ayuu yiri madaxweyne ku-xigeenka.
Waxaa uu intaa ku darray in ciidammada Jubbaland u gurmaday dadka xoolaha dhaqatada ah ku guuleysteen in ay ka soo furtaan Al-shabaab xoolihii ay kexeysteen oo dib loogu soo celiyay sidda uu hadalka u dhigay gacanta dadkii lahaa.
''Dib ayaan uga soo celinay xoolihii ay qaateen, khasaare ballaaranna waan u geysanay oo dhimasho iyo dhaawacba leh'' ayuu yiri mdaxweyne ku-xigeenka.
Ugu danbeyntii, madaxweyne ku-xigeenka ayaa sheegay in ay magacaabeen guddi qiimeyn ku sameyn doona khasaaraha gaaray dada xoola dhaqatada ah si gacan loo siiyo.
Marka laga soo tago hadalka madaxweyne ku-xigeenka lama oga ilaa iyo hadda khasaaraha rasmiga ah ee ka dhashay dagaalka dhaxmaray ciidammada Jubbaland iyo Al-shabaab.
Xassan Nuur, Hiiraan Online
[email protected]Kismaayo, Jubbada hoose