Micheal Keating oo war ka soo saaray kulan ay la yeesheen guddiga madaxabanaan ee xalinta khilaafaadka
Jimco, December, 16, 2016 (HOL) -Danjiraha QM ee Soomaaliya ayaa faah faahin dheeraad ah ka bixiyay kulan ay la yeesheen wakiilada beesha caalamka guddiga madaxabanaan ee xalinta khilaafaadka oo dhawaan soo saaray liiska 11 xildhibaan oo la sheegay in la baabi'iyay natiijadoodii doorasho.
War-saxaafadeed ka soo baxay xafiiska danjiraha QM Michael Keating ayaa lagu sheegay in ay ka dalbadeen guddiga xalinta khilaafaadka faah faahin la xiriirta kuraasta khilaafka ka taagan yahay oo ay gudigu soo celiyeen natiijadooda doorasho.
Warka ka soo baxay QM ayaa lagu sheegay in guddiga
xalinta khilaafaadka doorashooyinku ay horey beesha caalamka ugu
gudbiyeen liiska 24 xildhibaan oo khilaaf ka taagan
yahay doorashadoodii xubinimada Aqalka Hoose ee baarlamaanka Somalia,
hase ahaatee ay gudidu dhawaan si rasmi ah warbaahinta ugu faafisay
liiska 11 xildhibaan oo khilaaf ka taagan yahay oo kaliya, taasina ay
keentay in wakiilka QM ee Somalia iyo wadamada beesha
caalamka ee daneeya geedi socodka doorashoyinka Soomaaliya ay faahfaahin
dheeraad ah uga baahdaan guddiga xalinta khilaafaadka sida ay 24 kii
kursi ee ay hore u sheegeen uga soo reebeen 11 kursi oo kaliya.
War-saxafadeedkan ayaa lagu sheegay in gudiga looga fadhiyo sharaxaad la
xiriirta jidkii loo maray haddii la xaliyay khilaafkii ka taagnaa 13ka xubnood ee ka maqan liiska xildhibaannada la joojiyay, haddii aan xal loo helin
kuraastaasina ay faahfaahin ka bixiyaan sababta ay uga reebeen liiiskan
ay dhawaanta soo saaren.
QM ayaa sheegtay in hadii aan lagu darin kiisaska
khilaafku ka taagnaa gaar ahaan kuwii murankoodu aadka u cuslaa ay boqon
goynayso guud ahaanba habsami u socodkii doorashada.
Ugu danbeyntii, warqadan ayaa loo kala dirray madaxda dowladda federaalka ah ee
Somalia, gudoomiyaha Baarlamaanka, ra’iisal wasaaraha iyo ku xigeenkiisa
iyo sidoo kale madaxwayne yaasha maamul goboleedyada Somalia ee kala ah
Puntland, Jubaland, Koonfur-galbeed, Gal-mudug iyo Hir-shabeelle.
C/raxmaan Diini, Hiiraan Online
[email protected]Beledweyne, Soomaaliya
