Jaaliyadda reer Hiiraan ee Toronto oo taageertay shirka dib u heshiisiinta ee Beledweyne ka furmay (Sawirro)
Isniin, April 4, 2016 (HOL) Shirar lagu taageerayay shirka
dib u heshiisiinta Soomaaliyeed ee shalay ka furmay magaalada Beledweyne ee
Xarunta Gobolka Hiiraan ayaa waxaa shalay lagu qabtay magaalada Toronto ee dalka Canada.
Shirka ka dhacay Magaalada Toronto ayaa waxaa ka qeybgalay
jaaliyadda Soomaaliyeed ee ku dhaqan dalka Canada, waxaana halkaas hadallo
qiimo leh oo ku aaddan taageerada shirka dib u heshiisiinta iyo qiimaha ay
leedahay in ay dib u heshiiyaan dadka gobolka ka jeediyay aqoonyahanno iyo
waxgarad rag iyo dumar isugu jira.
Mas’uuliyiintii shirka ka hadlay ayaa waxay hoosta ka wada
xarriiqeen in dadka reer Hiiraan ay xaq u leeyihiin in loo ogolaado shirka dib
u heshiisiinta ah ee ay ku baaqeen beelaha Gobolka wada dega, waxayna dowladda
ugu baaqeen in ay faragelinta iyo caburiska ka deyso dadka Hiiraan.
Dadkii ka munaasabadda ka hadlay ayaa waxaa ka mid ahaa
Saciid Faarax, Cali Maxamed Xasan, Caaqil Axmed Saciid, Xildhibaan hore Axmed
Cawad Xasharo, Garyaqaan Maxamed Abuukar Geytaano, Caaqil C/risaaq Xuseen
Geeddi, Drs. Istanbuul Xaaji, Maryan Abiikar, Warsame Jirde iyo Fannaanadda
Faadumo Cali .
Shirkan ay Jaaliyadda reer Hiiraan ku yeesheen Magaalada
Toronto ayaa wuxuu yimid kaddib markii dowladda Soomaaliya ay isku dayday in ay
duubabka dhaqanka gobolka ku qasabto in ay ka qeybgalaan shir maamul loogu
sammeynayo Gobollada Hiiraan iyo Shabeellaha Dhexe, kaasi oo ay diideen
Duubabka Gobolka, waxaana kaddib ay duubabka ku dhawaaqeen in ay shir dib u
heshiisiin ah ka furaan Magaalada Beledweyne, waxaana shirkaas shalay ka furay magaalada Beledweyne Ugaas Xasan Ugaas Khaliif.