.jpg)
Isniin, Abriil 25, 2016 (HOL) — Fanaan caan ah oo u dhashay dalka Congo, Papa Wemba ayaa geeriyooday isagoo Bandhig-faneed ka dhigayay Caasimadda Waddanka Ivory Coast ee Abidjan, halkaasoo ay ku sugnaayeen kumannaan qof oo daawanayay.
Al-fanaan Wemba ayaa dhulka ku dhacay isagoo heesayay fannaaniin kalena ay ka bar-bar Ciyaarayeen, Waxaana taasi ay keentay inuu Geeriyoodo, iyadoo aan illaa Hadda la ogeyn sababta ka dambeysa geeridiisa.
Sidoo kale, Fannnaankan oo 66-jir ahaa, ayaa la sheegay inuu ahaa fannaankii qaabeeyay suugaanta dalka Congo, wuxuuna mararka qaarkood ku dhigi jiray waddamada Afrika iyo kuwa caalamka qaarkood bandhig-faneedyo.
Inkastoo aan illaa hadda la shaacin sababta geeridiisa ayaa haddana waxay dhakhaatiirtiisu sheegeen in caafimaadka Papa Wemba uu ahaa mid aad iyo aad u wanaagsan, lana baarayo sababta keentay geeridan deg-degga ah.
.jpg)
Fanaankan Reer Congo ee Papa Wemba ayaa sannadkii 2004-tii waxaa lagu xiray Farance, kaddib markii lagu eedeeyay inuu dadka si Sharci-darro ah uu ku geliyo dalkaas, xilligaas oo lagu xukumay saddex bilood oo xabsi ah.
Dhanka kale, Sannadkii 2012-kii, ayay maxkamad ku taalla Dalka Belgium-ka, waxay ku xukuntay Wemba ganaax lacageed oo gaaraya 24,690 Doollarka Mareykanka ah, kaddib markii lagu eedeeyay inuu dadka si sharci-darro ah ku geliyo dalkaas.
Ugu dambeyntii, Wasiirka Dhaqanka Congo, Baudouin Banza Mukalay ayaa ku tilmaamay geerida Papa Wemba mid murugo u keentay Shacabka Congo iyo guud ahaan Shacabka ku nool Qaaradda Afrika oo dhan.
Maxamed X. Xuseen, Hiiraan Online