Khamiis, Juun, 25, 2015 (HOL) -- Gargaar raashin ah oo ka yimid dowladda Cumaan oo noqonaya kii ugu ballaarnaa oo waayadii ugu danbeeyay laga qeybiyo gobolka, ayaa maanta la gaarsiiyay bukaannada ku jira isbitaalka guud ee magaalada Beledweyne iyo xarunta agoonta Ugaas Khaliif.
Qeybinta raashinka oo ahaa mid tayadiisu sareyso ayaa waxaa goob joog ka ahaa mas'uuliyiinta maamulka heer gobol iyo degmo, iyo saraakiisha caafimaadka isbitaalka guud ee magaalada Beledweyne oo ay jiifaan bukaanno qaarkood ka yimid deegaanno fog fog oo u bahnaa in ay hellaan kaalmadan oo kale.
Siddoo kale, waxaa deeqdan la gaarsiiyay xarunta agoonta Ugaas Khaliif ee xaafadda Buundo-weyn oo lagu xanaaneeyo boqolaal caruur ah oo waxbarasho iyo cunno intaba halkaa ka hella.
Inkastoo marar badan ay jireen hay'addo iyo dowladda kaalmo soo gaarsiiyay dadka tabaal-eysan ayaa haddana deeqdan waxaa la oran karaa waa mid kaga duwan kuwii ka horeeyay waqtiga lagu soo beegay oo ah bisha Radamaan iyo xadiga qoys walba la siiyay oo ah mid ballaaran.
C/raxmaan Diini, Hiiraan Online[email protected] Beledweyne, Soomaaliya