Warar dheeraad ah oo ku Saabsan Qarax Ismiidaamin ah oo Saaka ka dhacay Magaalada Cadaado
Khamiis, Juun 18, 2015 (HOL) — Warar dheeri ayaa kasoo baxaya weerar ismiidaamin ah oo loo adeegsady gaari walxaha qarxa laga soo buuxiyay oo Subaxnimadii hore ee Saakay lagu qaaday xarunta ay degan yihiin ergada ka qeyb-qaadaneysa shirweynaha Cadaado.
Wararka ayaa sheegay in qof watay gaari laga soo buuxiyay walxaha qarxa uu weerar ku qaaday xarunta Kafaalo oo ah halka ay degan yihiin odayaasha soo xulaya xildhibaannada maamulka gobollad dhexe ee ka kooban Galguduud iyo Mudug.
Qaraxa kaddib ayaa la maqlayay rasaas xoogan oo ay is-weydaarsanayeen ilaalada xarunta iyo xoogag damacsanaa in ay gudaha u gallaan xarunta, ilaa iyo haddana dhab ahaan looma oga khasaaraha rasmiga ah ee ka dhashay weerarka.
Ammniga xarunta waxaa gacanta ku haya ciidammo Itoobiyaan ah, kuwaa oo la sheegay in ay fureen rasaas aad u xoogan markii ay maqleen qaraxa lagu weeraray xarunta.
Xaalada ayaa aad u kacsan magaalada Cadaado, laamaha ammnigana waxaa ay mashuul ku yihiin sidda ay wax badan uga ogaan lahaayeen sidda uu weerarka u dhacy iyo khasaaraha ka dhashay intaba.
Wixii warar ah ee ka soo kordha waan idin soo gudbin doonnaa...
C/raxmaan Diini, Hiiraan Online
[email protected]
Beledweyne, Soomaaliya
