Sabti, Feberaayo 28, 2015 (HOL) — Xarakada Al-shabaab ayaa ku toogatay faraage ku yaalla degmada Diinsoor ee gobolka Bay, nin ay ku eedeeyeen inuu sixiroole ahaa, kaasoo la sheegay inay qabteen ciidamada amniga Al-shabaab.
Dadweyne fara badan ayaa ka qaybgalay toogashada oo dhacday shalay oo Jimco ahayd gellinkii dambe, waxaana ninkan magaciisa lagu sheegay, Macallin C/qaadir Sh. Aadan toogtay dhallinyaro ka tirsan Al-shabaab.
Garsooraha maxkamada Al-shabaab ee xukunka ridday ayaa sheegay inay maxkamaddu go’aansatay inay xukun dil ah ku riddo macallin C/qaadir, kaddib markii lagu helay inuu yahay sixiroole.
Shacabka ku nool degmada Diinsoor ayaa lagu wargeliyay inay kasoo qeyb-galaan dilkan toogashada ah, iyadoo dadweyne badan ay isugu yimaadeen goobta uu dilku ka dhacay.
Ugu dambeyn, Xarakada Al-shabaab ayaa deegaannada ay ka taliso ee ku yaalla Koonfurta Soomaaliya waxay ka fuliyaan xukuno kala duwan oo dil toogasho ah.
Maxamed X. Xuseen, Hiiraan Online
[email protected]
Muqdisho, Soomaaliya