Khamiis, Feberaayo 26, 2015 (HOL) — Shirkii golaha wasiirrada ee maanta ayaa looga hadlay xaaladda caafimaad ee dadkii ku waxyeelloobay weerarkii lagu qaaday Hoteelka Central, xaaladda amniga dalka iyo qorshe-howleedka xukuumadda ee sannadaha 2015 iyo 2016.
Ugu horreyn, golaha wasiirrada Soomaaliya ayaa warbixin ka dhageystay wasiirka Amniga gudaha, C/risaaq Cumar Maxamed, wuxuuna sheegay in guddiga Amnigu ay ku guda jiraan shaqo badan oo ku aadan sidii loosoo gabo gabeyn lahaa baarista la xiriirta dhacdadii Hotel Central ee magaalada Muqdisho.
Sidoo kale, wasiirka amniga ayaa tilmaamay in natiijooyinka hordhaca ah ay tilmaamayaan qaraxaasi in laga soo abaabulay gudaha Hoteelka oo ay aad u maleegtay haweenaydii isku qarxisay (Luul Axmed) oo muddo ka shaqeynaysay Hotelka.
“Wasaaradda Amnigu waxay diyaarisay qaab siyaasadeed la xiriira sugidda iyo hubinta amniga, qorshahan wuxuu saameyn doonaa Hotellada, goobaha Ganacsiga iyo meel walba oo laga shakiyo si amniga dalka guud ahaan loo xaqiijiyo. Waxaa baaritaan lagu samey-nayaa baabuurta, waxaa ka qeyb qaadan doono saddex waaxood oo kamid ah ciidamada amniga, si loo hubiyo wax walba oo laga shakiyo. Baaristan waxay saameyn ku yeelan doonto cid kasta oo gaadiid hubaysan wadata, waxay hay’adaha sirdoonku dabagal buuxa ku sameynayaan cid kasta oo looga shakiyo in uu ku lug leeyahay kooxaha Argagixisada” ayuu yiri Wasiirka Amniga gudaha Mudane Cabdirisaaq Cumar Maxamed.
Sidoo kale, kulanka golaha wasiirada ayaa warbixin looga dhageystay wasiirka caafimaad, Xaawo Xasan Maxamed, waxana ay sheegtay in wasaaradda caafimaadku dhistay guddi gurmad oo loogu talo-galay inay la tacaalaan dadkii waxyeeladu kasoo gaartay weerarki Hotel Central.
“Wasaradda Caafimaadka waxay maalmahan ka shaqeynaysay in ay tiro koob dhab ah ka keento dadkii ku jiray Isbitaallada dhaawacyada la geeyay, Isbitaal Madiina waxaa la geeyay 27 qof, waxaa ka baxay Isbitalka oo la daaweyay 17 ruux, mid kamid ah waxaa loo wareejiyay Isbital Digfeer, dadkii halkaa la geeyay hal qof ayaa dhintay. Sidoo kale Isbitaalka Digfeer dadka loo qaaday 19 qof ayey ahaayeen 12 qof ayaa ka baxay oo la daaweeyay, 7 qofna waa jiifaan wali, kuwa dalka wax looga qaban waayayna waa 7 qof, waxaana loo qaadi doonaan dalka dibediisa gaar ahaan dalalka Sucuudiga iyo Imaaraadka oo gacan nagu siinayay” ayay tiri Wasiirka Caafimaadka Marwo Xaawo Xasan.
Ugu dambeyn, golaha ayaa ka hadlay soo gudbinta qorshaha wasaarad walba kasta si loo xaqiijiyo hiigsiga 2016, iyadoo la isku raacay in wasaaradda Qorshayntu iyo Iskaashiga Caalamigu ay noqota Wasaaradda xiriirisa dhamaan hay’adaha dowladda gaar ahaan hagista iyo maareynta deeqaha bulshada caalamka, ujeedka laga leeyahayna ay tahay sidii looga hortagi lahaa isbar-bar yaaca, Wasaaraduna ay ugu istaagi lahayd iyadu inay masuuliyadaas qaato.
Maxamed X. Xuseen, Hiiraan Online
[email protected]
Muqdisho, Soomaaliya
