AMISOM oo Askar u Xirtay Fal la Xiriira Dilal Dad shacab ah loogu Geystay Degmada Marko
Axad, Ogoosto
02, 2015 (HOL) — Saraakiil ka tirsan AMISOM oo maanta gaaray degmada Marka ee
xarunta Gobolka Shabeellada Hoose ayaa kulammo la qaatay Oday-dhaqameedka Degmada
Marka.
Kulankan ayaa
waxaa ka Qayb-galay Saraakiil ka socotay Ciidamada AMISOM ee fadhigoodu yahay
deegaanka Ceel-jaalle ee Marka waxayna u sheegeen odayadii ay la kulmeen in
AMISOM aysan raalli ka ahayn in dad shacab ah la Xasuuqo.
Taliyaha ugu
sareeyo Ciidamada AMISON ee ka Qayb-galay kulankan ayaa isna wuxuu odayaasha u sheegay
inay Xabsiga u Taxaabeen Labo Askari oo ka mid ah Ciidamada AMISOM.
Sidoo kale,
Oday-dhaqmeedka ay la kulmeen Saraakiisha AMISOM oo ahaa kuwo kasoo jeeda
Shacabka Marka ayaa waxay ka codsadeen ciidamada AMISOM inay wax ka bedelaan Qaab-dhaqameedkooda;
ayna jawaab cad ka keenaan Sababta keentay in dadka rayidka ah ee ku nool Marka
ay dilkooda baneystaan ciidamada AMISOM.
Shirkan
dhexmaray Odayaasha iyo Saraakiisha ka socda AMISOM ayaa wuxuu ku soo
beegamayaa xillil Habeen hore ayaa Ciidamada AMISOM ku dileen Marka gaar ahaan Xaafadda
Ruusiya lix ruux oo hal qoys kasoo wada-jeeda.
Waxaana
dadkaas ku jiray Afar Wiil, Abbaahood iyo Adeerkood, kuwaasoo shalay lagu aasay
Degmada Marka, kaddib markii Ciidammo ka tirsan AMISOM oo ka Careysnaa miino
dhulka loogu aasay ay rasaas ku fureen Qoyskan oo deggenaa Xaafadda Ruusiya.
Ugu dambeyn, Qoysas
faro badan ayaa ka barakacay xaafadda Ruusiya, iyagoo ka baqdin qaba amniga
xaafadda oo noqday mid xun, dhowr jeerna ay ciidanka AMISOM ku dileen dad
Shacab ah; markii Qaraxyo lagu Weeraray.
Maxamed X.
Xuseen, Hiiraan Online
[email protected]
Muqdisho, Soomaaliya
