Maamulka Gobolka Hiiraan oo baaq u jeediyay hay'adaha Samafalka
Khamiis, Maarso 06, 2014 (HOL) — Maamulka gobolka Hiiraan ayaa
faahfaahin ka bixiyay xaalad dawo yari ah ee la soo daristay isbitaalka guud ee
magaalada Beledweyne, oo sanadkii hore ay isaga baxday hay'adda MSF Swiss oo
mudo dheer soo waday howlaha isbitaalka.
Guddoomiye ku-xigeenka arrimaha bulshada ee maamulka gobolka
Sheekh Xusseen Cismaan Cali oo warbaahinta la hadllay ayaa sheegay in xaalad
adag waqtigan ka jirto isbitaalka guud ee magaalada Beledweyn, islamarkaana loo
baahan yahay in hay'addaha samafalka gacan ka geystaan socodsiinta howlaha
isbitaalka.
''Runtii waa nasiib darro in bukaanada ku jira isbitaalka
magaalada marka dawada loo qoro ku qasbanaadaan in ay dibada ka soo iibsadaan,
waayo dadka oo dhan taa awood uma wada laha, sidaa daraadeed waa in sida ugu
dhaqsiyaha badan wax looga qabtaa xaalada isbitaalka oo ah kan ugu ballaaran marka la eego
gobollada bartamaha Soomaaliya.
Agaasimaha guud ee isbitaalka Beledweyne Axmed Max'ed Khaliif
ayaa maalmihii ugu danbeeyayba si is daba joog ah uga hadllayay dawo la'aan soo
food saartay isbitaalka, iyadoo ilaa iyo hadda aysan jirin cid ka soo jawaabtay
fariimaha iyo qeylo dhaanta maamulka isbitaalka.
Guddoomiye ku-xigeenka arrimaha bulshada gobolka Hiiraan ayaa
dhinaca kale fariin u dirray jaaliyadaha dibada ee ka soo jeeda gobolka in ay
caawiyaan isbitaalka oo bukaanada ku jira yihiin kuwo isaga kala yimid qeybaha
degmooyinka uu gobolka ka kooban yahay iyo deegaannada ku dhaw dhaw.
Dadka bukaanka ah ee jiifa isbitaalka ayaa laftirkooda ka
cabanaya dawo la'aanta jirta awood dhaqaallana u heyn intooda badan in ay
dibada dawo ka soo iibsadaan, iyaga oo dhinacooda dirray baaq la mid ah kan
maamulka isbitaalka.
C/raxmaan Diini, Hiiraan
Online
[email protected]
Beledweyne, Soomaaliya
