Hay’adda Alpha Trust Organization oo gargaar gaarsiisay dad Barakacayaal ah
Axad, July 20, 2014 (HOL) — Hay’adda Alpha Trust Organization ayaa deeq raashin ah oo isugu jirtay bur, bariis, sonkor, timir iyo Saliidda raashinka lagu karsado gaarsiisay qoysas barakacayaal iyo dad masaakiin ah oo ku nool degmada Wadajir ee magaalada Muqdisho.
Qoysaska kaalmadan la gaarsiiyay ayaa isugu jiray naafo, kuwo da’ ah iyo barakacayaal kale, waxaana dadkan ay ka mahadceliyeen kaamamka lasoo gaarsiiyay, iyagoo sheegay inay deeqdan ka duwn yihiin kuwii horay u loo soo gaarsiin jiray.
Dadkii deeqdan ka faa’iideystay ayaa ka mahad-celiyay, iyagoo sheegay in aysan in muddo ah helin deeq dhameystirsan oo sidan oo kale ah, waxaana ay ALLE uga baryeen hay’adda Alpha Trust Organization inuu wax intaan ka wanaagsan ugu bedelo.
Guddoomiyaha degmada Wadajir, Axmed Cabdulle Afrax ayaa uga mahad-celiyay hay’adda Alpha Trust Organization kaalmada ay soo gaarsiisay dadka barakacayaasha ah ee ku nool degmada, isagoo hay’addan oo ay sameeyeen dhalinyaro Soomaaliyeed ku tilmaamay garashadeedu ay aad u sarrreyso.
Sidoo kale, wuxuu sheegay in deeqdan ay kusoo beegeen xilli loo baahnaa oo lagu jiro bisha barakeysan ee Ramadaan, isagoo xusay in deeeqdan lagu wareejiyay dadkii mudnaa.
Hay’adaha kale ayuu ugu baaqay inay ku daydaan Alpha Trust Organization, ayna kaalmooyin lasoo gaaraan barakacayaasha ku nool degmada Wadajir oo u baahan in la caawiyo xilligan.
Gudoomiyaha hay’adda Alpha Trust Organization, Daahir Cali Kulmiye ayaa sheegay in hay’addan ay u timid in dadka dhibaateysan ay saaciddo, isagoo tilmaamay in deeqdan aanay ahayn tii u horreysay iyo tii ugu dambeysay oo ay siiyaan qoysas Soomaaliyeed oo dhibaateysan.
“Waxaan halkan u nimid inaan saacidno walaalaha dhibaateysan; deeqdan tii u horreysay ama tii ugu dambeysay ma ahan, balse waxaan kaalmo gaarsiin doonaan dadka kale ee dhibaateysan iyo bukaannada isbitaalada ku jira,” ayuu yiri gudoomiyaha hay’adda Alpha Trust Organization Daahir Cali Kulmiye.
Maxamed X. Xuseen, Hiiraan Online
[email protected]
Muqdisho, Soomaaliya
