Prof. Jawaari oo ka hadlay khilaafka u dhexeeya Madaxda Dalka (DHAGEYSO)
Axad, Oktoobar 26, 2014 (HOL) — Guddoomiyaha baarlamaanka Soomaaliya Maxamed Sheekh Cismaan Jawaari ayaa ka hadlay khliaafka soo dhex-galay madaxweynaha iyo ra’iisul wasaaraha dalka, isagoo isla maanta u ambabaxay magaalada Baydhabo ee xarunta gobolka Bay.
Prof. Jawaari ayaa sheegay in dowladda ay u dhameystiran yihiin hay’adaha dastuurka ah, isla markaana uu kalsooni weyn ku qabo in xaliyaan arrinta ku aaddan kala aragti duwanaanshaha u dhexeeya madaxda dalka oo dibadda u soo baxay 24-kii saac ee lasoo dhaafay.
“Waxaan bulshada Soomaaliyeed iyo beesha caalamkuba u sheegayaa inay is-dajiyaan ayna ku kalsoonaadaan hay’adaha dastuuriga ah ee waddanka, dowladduna ay awood u leedahay in arrimaheeda gaarka ah ay gudaha ku xaliso,” ayuu yiri Jawaari.
DHAGEYSO CODKA JAWAARI:
Guddoomiyaha baarlamanka ayaa hadalkiisa ku daray in hay’adaha gaarka ah ee dastuurka ay awood u leeyihiin inay xal kama dambeys ah ka gaaraan khilaafyada soo dhexgalay madaxda dalka.
Dhanka kale, Jawaari iyo wafdi uu hoggaaminayo ayaa u ambabaxay maanta magaalada Baydhabo ee gobolka Bay, iyadoo lagu wado in berri uu halkaas kusoo gaba-gabeeyo shirka looga hadlayo maamul u sameynta gobollada ku yaalla Koonfur-galbeed Soomaaliya, kaasoo muddo bil ka badan Baydhabo ka socday.
Hadalka guddoomiyaha baarlamaanka ayaa wuxuu kusoo beegmayaa xilli uu cirka isku sii shareerayo khilaafka u dhexeeya madaxweyne Xasan Sheekh iyo ra’iisul wasaare C/weli Sheekh, kaddib markii ay isku khilaafeen is-bedel kooban oo lagu sameeyay golaha wasiirrada xukuumadda Soomaaliya.
Maxamed X. Xuseen, Hiiraan Online
[email protected]
Muqdisho, Soomaaliya