3/29/2024
Today from Hiiraan Online:  _
Wararka Maanta- Talaado, Sept 3 , 2013
Wasiirka Arrimaha Dibadda dalka Itoobiya oo xalay Addis Ababa ku qaabilay Madaxweynaha Maamulka Puntland
Shir Puntland Itoobiya Addis Ababa.jpg
Talaado, September 03, 2013 (HOL) —
Xarunta dalka Itoobiya ee Addis Ababa waxaa xalay kulan ku yeeshay madaxweynaha Puntland C/raxmaan Maxamed Faroole iyo wasiirka arrimaha dibadda ee Itoobiya Tedros Adhanom. Kulanka ayaa ka dhacay Hotel Sheraton.

Labada mas'uul ayaa isla soo qaaday arrimo dhowr ah oo ay ugu muhiimsanaayeen: xoojinta xiriirka labada dhinac -Itoobiya iyo Puntland- iyo weliba dardar-gelinta iskaashiga dhanka dhaqaalaha iyo ammaanka.

Madaxweynaha Puntland ayaa dowladda Itoobiya ku ammaanay kaalinta muuqata ee ay ku leedahay dadaallada loogu jiro sidii qarannimada Soomaaliya dib loogu soo celin lahaa.

Mudane Faroole ayaa dhinaca kale uga mahadceliyey Itoobiya dowrkii ay ku lahayd heshiiskii ay asbuucii hore magaalada Addis Ababa ku kala saxiixdeen Dowladda Federaalka Soomaaliya iyo maamulka kumeel gaarka ah ee Jubba.

Dhinaca kale wasiirka arrimaha dibadda ee Itoobiya Tedros Adhanom  ayaa isna dhankiisa sheegay in Puntland ay qeyb libaax ku lahayd dhamastirka tubtii nabadda ee ay ku timid dowladda xilligan Soomaaliya ka jirta ee uu hoggaamiyo Madaxweyne Xasan Sheekh Maxamuud.

Tedros Adhanom ayaa ugu dambeyntii sheegay in Itoobiya ay ka go'an tahay in Soomaaliya ay gacan ku siiso sidii ay dib qarannimadeeda ula soo noqon lahayd, islamarkaana ay uga gudbi lahayd caqabadaha hor taagan.

Wefdiga madaxweynaha Putland oo shalay soo gaarey magaalada Addis Ababa, waxaa lagu wadaa in maanta ay kulan la qaataan mas'uuliyiin uu kamid yahay ra'iisul wasaaraha Itoobiya Hailemariam Desalegn


Maxamed Salaad Xaaji Dirir, Hiiraan Online
[email protected]
Boosaaso, Puntland













Click here
9/3/2013 4:06 PM EST
Cumar Hammami oo loo yaqaan Abuu Mansuur Al-ameeriki ayaa shaaca ka qaaday in uu gabi ahaanba isaga baxay uruweynaha Al-qaacida iyo Al-shabaab oo uu hore uga tirsanaa.

9/3/2013 3:51 PM EST
Talaado, September 03, 2013 (HOL) — Maayarka Hargeysa, Cabdiraxmaan Maxamuud Caydiid, ayaa bilaabay samaynta wadadda Boqol iyo kontonka loo yaqaan ee waqooyiga magaaladda Hargeysa, kaas oo isticmaali doonaan gaadiidka xamuulka ka soo qaadda Dekadda Berbera ee ku socda Itoobiya.

9/3/2013 3:47 PM EST
Talaado, September 03, 2013 (HOL) — Madaxweyne ku xigeenka Puntland, Jen. C/samad Cali Shire ayaa maanta dhagax dhigay dugsi sare oo laga hirgelinayo degmada Taleex ee gobolka Sool.

9/3/2013 3:36 PM EST
Talaado, September 03, 2013 (HOL) — Kulan doorasho ah oo maanta lagu qabtay Muqdisho ayaa waxaa ganacsade C/rashiid Shire Il-qayte loogu doortay guddoomiyaha rugta ganacsiga Soomaaliyeed ee gobolka Banaadir, kaddib markii uu ka adkaaday haweenkay xilkaas kula tartamaysay.

9/3/2013 11:01 AM EST
Talaado, September 03, 2013 (HOL) — Wafdi ballaaran oo uu horkacayay madaxweynaha Maamulka Jubba Sheekh Axmed Maxamed Islaam (Axmed Madoobe) ayaa maanta soo gaaray magaalada Kismaayo, iyadoona ay wehlinayeen mas'uuliyiin ka tirsan maamulka.

9/3/2013 9:55 AM EST
Talaado, September 03, 2013 (HOL) — Wasiir ku xigeenka wasaaradda maaliyadda iyo qorsheynta Soomaaliya, Abuukar Sheekh Cabdi Ibraahim ayaa maanta Muqdisho ka furay shirkii wada-tashiga barnaamijka Higsiga Cusub “ New Deal” oo socon doona saddex maalmood. Shirkan ayaa waxaa kasoo qayb-galay mas’uuliyiin ka kala socda laamaha dowladda, xildhibaanno iyo ururrada bulshada rayidka ah.

9/3/2013 9:35 AM EST
Talaado, September 03, 2013 (HOL) — Inta la ogyahay laba qof ayaa ku dhintay tiro ka badan toban qof oo kalena way ku dhaawacmeen dab ka kacay goob shidaalka lagu kaydiyo oo ku taalla agagaarka dhismaha Say-biyaano ee degmada Hodan ee Magaalada Muqdisho.

9/3/2013 7:30 AM EST
Talaado, September 03, 2013 (HOL) — Dowladda Soomaaliya ayaa beenisay in la weeraray gaadiid uu la socday madaxweynaha Soomaaliya oo degmada Marko ee gobolka Shabeellada Hoose ku socday, kaddib markii Al-shabaab ay sheegtay inay weerartay gaadiidkii uu madaxweynuhu la socday.

9/3/2013 6:53 AM EST
Talaado, September 03, 2013 (HOL) - Ururka Alshabaab ee dagaalka kula jira dawlada Soomaaliya ayaa shaaciyay in weerar ay ku qaadeen gawaari kolonyo ah oo galbinaysay madaxweynaha Soomaaliya Xassan Sheekh Maxamuud oo maanta safar dhulka ah ku aaday magaalada Marka ee xarunta gobolka Shabeellaha hoose.

9/3/2013 3:50 AM EST
Talaado, September 03, 2013 (HOL) — Madaxweynaha Soomaaliya iyo wafdi uu hoggaaminayo ayaa saaka safar dhulka ah ku gaaray magaalada Marka ee xarunta gobolka Shabeellada Hoose, iyadoo tani ay noqonayso booqashadii ugu horreysay oo dhinaca dhulka ah oo madaxweynuhu uu ku tago deegaanno ka mid ah Soomaaliya.