12/8/2022
Today from Hiiraan Online:  _
Wararka Maanta- Talaado, May 7 , 2013
Boqlaal Milyan oo loogu deeqay Soomaaliya si wax looga qabto Amniga, dib u habeynta Garsoorka iyo Maaliyadda


Talaado, May 07, 2013 (HOL) — Shirkii dib u dhiska Soomaaliya ee maanta lagu qabtay magaalada London ayaa waxaa dalalkii kasoo qaybgalay ay ugu yabooheen Soomaaliya boqolaal milyan oo doollarka Mareykanka ah si wax looga qabto ammaanka dib u habeynna loogu sameeyo garsoorka iyo maaliyadda.

Qodobbadii ugu muhiimsanaa ee lagu sheegay warmutiyeedkii kasoo baxay shirkan ayaa waxaa ka mid ahaa in xilligan uu muhiim u yahay Soomaaliya, maadaamaha laga baxay xilligii KMG ahaa, lana dhisay dowlad joogto ah oo iyo baarlamaan lasoo doortay.

Sidoo kale, war-murtiyeedka ayaa lagu sheegay in ammaanka dalka uu soo hagaagayo, ciidamada dowladda Somalia iyo kuwa AMISOM ay magaalooyin badan ka saareen Al-shabaab, falalka burcadbadeednimana ay aad hoos ugu dhaceen.

Warmutiyeedka ayaa sidoo kale lagu yiri: inkastoo horumarro la gaaray weli waxaa taagan dhibaatooyin ay ka mid yihiin in Al-shabaab ay amniga khatar ku tahay, dastuurku ma dhameystirna, malaayiin qof ayaa weli ku jira xeryo qoxooti iyo kuwa barakaacayaal, dalka waxaa ka maqan qaab dhismeed dowladeed oo horumarsan, mana jiraan, iskuullo, isbitaallo iyo adeegyada kale ee aasaasiga ah.

Dowladda Soomaaliya si ay arrimahaas oo dhan ay wax uga qabato ayaa waxay dajisatay lix qodob siyaasadeed oo ay ku shaqeynayso, iyadoo la sheegay in shirkan sababta loo qabtay ay ahayd in dowladda Soomaaliya laga caawiyo sidii ay wax uga qaban lahayd saddex qodob oo muhiim ah kuwaasoo kala ah, amaanka, garsoorka iyo maaliyadda.

Warmutiyeedka ayaa sidoo kale lagu sheegay in wadashaqeynta beesha caalamka iyo dowladda Soomaaliya ay sii dhisi doonto iskaashiga mustaqbalka. Waxaa lagu yiri beesha caalamka waxaa ka go’an in hirgelinta qorshaha dowladda Soomaaliya ay ku taageerto taageero habeynsan oo joogto ah.

Sidoo kale, warmurtiyeedka kasoo baxay shirka ayaa sidoo kale lagu xusay in beesha caalamka ay soo dhaweynayso wadahadallada u billowday dowladda iyo gobollada, waxaana dhiirigelinnay in gobolladu ay si dhow ula shaqeeyaan dowladda Soomaaliya si loo sameeyo siyaasad qaran oo waafaqsan dastuurka dalka u degsan.

Waxaa sidoo kale lagu sheegay in lasoo dhaweeyay wadahadalladii Turkiga ku dhexmaray dowladda Soomaaliya iyo Somaliland si ay u caddeeyaan xiriirkooda mustaqbalka, waxaana raalli ka nahay baa lagu yiri doorka ay ka qaadatay dowladda Turkiga fududeynta wadahadalladaas.

Warmurtiyeedka ayaa sidoo kale lagu sheegay waxaan soo dhaweynaynaa horumarka ay Soomaaliya sameysay, waxaana u mahadcelinaynaa intii ka qaybqaadatay in horumarkaas la gaaro oo ay ka mid yihiin dadka Soomaaliyeed, dowladda Soomaaliya, baarlamaanka iyo qurbo-joogta Soomaaliyeed.

Hay’adaha iyo dalalka Soomaaliya la shaqeeya ayaa lagu ammaanay sida ay uga go’an tahay inay sii wadaan taageerada ay siinayaan dowladda Somalia, iyadoo lagu boorriyay dalalka iyo hay’adaha inaysan joojin taageeradaas.

War-murtiyeedka kaddib ayaa madaxweynaha Soomaaliya, Xasan Sheekh Maxamuud iyo ra’iisul wasaaraha Britain, David Cameron waxay shir jaraa’id ku qabteen xarunta wasaaradda arrimaha dibadda Britain oo aan ka fogeyn aqalka Lancaster oo shirku uu ka dhacay.

“Horumar ayaa la sameeyay wixii ka dambeeyay shirkii sannadkii hore lagu qabtay Lodon, hourmarkaasuna wuxuu ahaa mid weyn, Ururka Al-shabaab magaalooyin badan ayaa laga saaray, falalkii burcadbadeedda hoos ayaa loo dhigay 80%, waxaana la sameeyay dowlad federaal ah oo leh baarlamaan lasoo doortay oo ay ka dhex-muuqdaan dhammaan beelaha Soomaaliyeed. Balse weli dhibaato ayaa jirta, waayo kala-bar dadka Soomaaliyeed waxay ku nool yihiin maalintii wax ka yar hal doollar,” ayuu yiri David Cameron oo shirka jaraa’id ka hadlay.

Madaxweynaha Soomaaliya oo isaguna hadlay ayaa yiri: “Waxaan halkan u nimid inaan soo gudbino qorshayaasha aan ku doonayno inaan dalkeenna uga sameyno dib-u-habeynayno iyo isbedel, innagoo og in beesha caalamka ay ka dhaadhacayso in Soomaaliya laga sameyn nabad iyo deggenaasho, caalamku wuxuu haystaa cid uu la shaqeyn karo oo uu aamino. Waxaan si adag uga shaqeynaynaa isbedel aan ka sameynno dalkeenna; inkastoo ay  jiraan caqabado badan oo na horyaalla.”

Shirkan ayaa wuxuu ahaa mid lagu raadinayay yabooh dhaqaale oo dib loogu dhiso Somalia, iyadoo madaxda dowladda ay sheegeen in qodobbada kasoo shirkan ay yihiin kowu guul iyo horumar u horseedaya Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/7/2013 12:31 PM EST
Talaado, May 07, 2013 (HOL) — Madaxweynaha Somaliland, Axmed Maxamed Maxamuud Siillaanyo ayaa ka hadlay geerida afar qof oo daad uu ku qaaday dooxa Dacar-buluq ee u dhexeeya magaalooyinka Hargeysa iyo Berbera, isagoo tacsi u diray ehellada iyo qoysaskii afartaas marxuum.

5/7/2013 11:46 AM EST
Talaado, May 07, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) iyo xubno ka tirsan golihiisa wasiiradda, xildhibaanno, guddoomiyeyaasha degmooyinka gobolka Banaadir, saraakiisha ciidanka, fanaaniin iyo marti sharaf kala duwan ayaa maanta ka qayb-galay dibad-bax lagu taageerayo shirka London oo ka dhacay Muqdisho.

5/7/2013 10:38 AM EST
Talaado, May 07, 2013 (HOL) — Waxaa lasoo gabgabeeyay shirkii London ee looga hadlayay horumarinta Soomaaliya, waxaana lagu wadaa in goor-dhow ay madaxweynaha Soomaaliya, Xasan Sheekh iyo ra’iisul wasaaraha Britain, David Cameron ay saxaafadda u soo bandhigaan warmutiyeedkii shirka kasoo baxay.

5/7/2013 7:44 AM EST
Halkaan ka daawo sawiro laga soo qaaday shirka maanta ka furmay magaalada London ee dalka Britain.

5/7/2013 6:02 AM EST
Talaado, May 07, 2013 (HOL) — Aqalka Lancaster ee magaalada London ee dalka Britain waxaa si rasmi ah uga furmay shirkii looga hadlayay horumarinta Soomaaliya; kaasoo ay kasoo qayb-galeen xubno ka socda illaa 58 dowladood iyo hay’ado caalami ah oo ay ka mid yihiin Midowga Afrika iyo Qaramada Midoobay.

5/7/2013 4:45 AM EST
Talaado, May 07, 2013 (HOL) — Madaxweynaha Soomaaliya, Xasan Sheekh Maxamuud oo ku sugan London ayaa u sheegay wargeys kasoo baxa London oo lagu magacaabo Financial Times ayaa sheegay inay u baahan tahay Soomaaliya qorshe la mid ah kii dib loogu habeeyay Yurub ee Marshall Plan-ka loo yaqaan, si ay uga baxdo faqriga, colaadaha sokeeye iyo argagaxisada.

5/7/2013 4:42 AM EST
Talaado, May 07, 2013 (HOL) — Koox dabley ah ayaa xalay fiidkii weerar gaadmo ah ku qaaday saldhigga booliska Miir oo ku yaal xaafadda Horumar ee waqooyiga magaalada Gaalkacyo ee xarunta Gobolka Mudug.

5/7/2013 4:11 AM EST
Talaado, May 07, 2013 (HOL) — Maamulka gobolka Bay iyo Al-shabaab ayaa guulo ka kala sheegtay dagaal shalay ku dhexmaray duleedka degmada Qansax-dheere ee gobolka Bay, dagaalkaas oo la sheegayo inay ku dhinteen lix qof oo dhinacyadii dagaalamay ka tirsan.

5/7/2013 3:44 AM EST
Talaado, May 07, 2013 (HOL) — Ciidanka Booliska Somaliland ayaa Isniintii shalay baaritaan xoogan ku sameeyey guriga ay ku nooshahay hooyada dhashay amiirka Xarakada Al shabaab, Axmed Cabdi Godane oo loo yaqaan Sheekh Mukhtaar C/raxmaan Abuu-Zubeyr oo Hargeysa ku yaalla, iyagoo ku xiray howlgalkaas laba nin oo ay Cabdi Godane walaalo ahaayeen.

5/7/2013 3:37 AM EST
Talaado, May 07, 2013 (HOL) — Shirka London oo looga hadlayo arrimaha Soomaaiya ayaa lagu wadaa inuu saacadaha soo socda uu si rasmi ah uga furmo magaalada London ee xarunta Britain, iyadoo haatan ay wafuudda shirka ka qaybgalaysa ku sugan yihiin goobta loogu talogalay inuu ka dhaco.

5/7/2013 3:36 AM EST
Talaado, May 07, 2013 (HOL) —Maxkamadda degmadda Gabiley ayaa loo soo gudbiyey dacwad xasaasiyad dhalisay oo la xidhiidha xayaawaano dad shacab ahi isku haystaan, haseyeeshee arrintii murugtay ka dib markii wasaaradda Deeganka Somaliland oo loo dhiibay ay maxkamaddii u sheegtay in xayawaankii dhinteen.