12/8/2022
Today from Hiiraan Online:  _
Wararka Maanta- Talaado, May 7 , 2013
Shirka London oo si rasmi ah u furmay iyo Madaxweynaha Somalia oo hadal ka jeediyay Furitaankii Shirkaas (SAWIRRO)


Talaado, May 07, 2013 (HOL) — Aqalka Lancaster ee magaalada London ee dalka Britain waxaa si rasmi ah uga furmay shirkii looga hadlayay horumarinta Soomaaliya; kaasoo ay kasoo qayb-galeen xubno ka socda illaa 58 dowladood iyo hay’ado caalami ah oo ay ka mid yihiin Midowga Afrika iyo Qaramada Midoobay.

Madaxweynaha Soomaaliya , Xasan Sheekh Maxamud iyo ra’iisul wasaaraha Britain, David Cameron ayaa si wadajir ah u furay shirka una shir-gudoomin, iyadoo madaxweyne Xasan Sheekh uu ka jeediyay furitaanka shirka hadal uu ugu talogalay inuu kaga warbixiyo xaaladda Soomaaliya.

Xasan Sheekh ayaa u mahadceliyay ra’iisul wasaaraha Britain iyo doorkiisa ku aaddan qabashada shirkan labaad ee Soomaaliya loo qabanayo si ay u hesho dhaqaale ay uga baxdo dhibaatooyinkii muddada dheer ay kusoo jirtay.

“Waxaa laga yaabaa in dadku is weydiiyo maxaa Soomaaliya waqtigan loo saacidayaa? Wallow ay jiraan horumarro baaxad leh, haddana weli waxaa taagan caqabado fara badan oo u baahan in laga saacido Soomaaliya,” ayuu madaxweynuhu ku sheegay hadalka uu ka jeediyay furitaanka shirka, isagoo tusaale u soo qaatay geed yar oo uu ku tallaalay madaxtooyada 17-kii Abriil oo ku beegnayd maalitii dhirta caalamka.



“Geedkaas yar wuxuu u baahan yahay in la waraabiyo oo laga celiyo cayayaanka inta uu ka baxayo oo uu geed weyn ka noqonayo. Sidoo kale Soomaaliya waa geedkaas oo kale oo u baahan in si joogta ah looga warqabo inta uu ka xidideysanayo oo marka uu baxana ay dad badan ku raaxeysan doonaan, Soomaaliyana waa sidaas si la mid ah.”

Madaxweynaha ayaa caalamka u sheegay in dowladda uu hoggaaminayo ay tahay mid caalamku uu kalsooni ku qabi karo qorshaheeda dhinaca amniga, garsoorka iyo dib-u-habeynta maaliyadda ay keeni karaan inay shacabka Soomaaliyeed ka saaraan dhibkii soo socday muddo 22-kii sano ee lasoo dhaafay shacabkuna ay heli doonaan horumar iyo barwaaqo.

Ra’iisul wasaaraha Britain, David Cameron ayaa ku ammaanay madaxweyne Soomaaliya iyo dowladda federaalka Soomaaliya horumarka baaxadda leh ee ay ka gaartay dhinacyo badan isagoo sheegay inay weli jiraan caqabado fara badan oo u baahan in caalamku uu ka saacido Soomaaliya.

Dhanka kale, waxaa shirka ka hadlya madaxweynaha dalka Uganda Yoweri Museveni iyo ra’iisul wasaaraha Itoobiya, Hailamariam Desalign oo sheegay in dowladda Soomaaliya ay u baahan tahay in laga caawiyo sidii ay dalkeeda uga saari lahayd dhibaatada soo jiitamaysay muddada 22-ka sano ka badan.





Axmed Gure, Hiiraan Online
[email protected]
London, Britain













Click here
5/7/2013 2:51 PM EST
Talaado, May 07, 2013 (HOL) — Shirkii dib u dhiska Soomaaliya ee maanta lagu qabtay magaalada London ayaa waxaa dalalkii kasoo qaybgalay ay ugu yabooheen Soomaaliya boqolaal milyan oo doollarka Mareykanka ah si wax looga qabto ammaanka dib u habeynna loogu sameeyo garsoorka iyo maaliyadda.

5/7/2013 12:31 PM EST
Talaado, May 07, 2013 (HOL) — Madaxweynaha Somaliland, Axmed Maxamed Maxamuud Siillaanyo ayaa ka hadlay geerida afar qof oo daad uu ku qaaday dooxa Dacar-buluq ee u dhexeeya magaalooyinka Hargeysa iyo Berbera, isagoo tacsi u diray ehellada iyo qoysaskii afartaas marxuum.

5/7/2013 11:46 AM EST
Talaado, May 07, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) iyo xubno ka tirsan golihiisa wasiiradda, xildhibaanno, guddoomiyeyaasha degmooyinka gobolka Banaadir, saraakiisha ciidanka, fanaaniin iyo marti sharaf kala duwan ayaa maanta ka qayb-galay dibad-bax lagu taageerayo shirka London oo ka dhacay Muqdisho.

5/7/2013 10:38 AM EST
Talaado, May 07, 2013 (HOL) — Waxaa lasoo gabgabeeyay shirkii London ee looga hadlayay horumarinta Soomaaliya, waxaana lagu wadaa in goor-dhow ay madaxweynaha Soomaaliya, Xasan Sheekh iyo ra’iisul wasaaraha Britain, David Cameron ay saxaafadda u soo bandhigaan warmutiyeedkii shirka kasoo baxay.

5/7/2013 7:44 AM EST
Halkaan ka daawo sawiro laga soo qaaday shirka maanta ka furmay magaalada London ee dalka Britain.

5/7/2013 4:45 AM EST
Talaado, May 07, 2013 (HOL) — Madaxweynaha Soomaaliya, Xasan Sheekh Maxamuud oo ku sugan London ayaa u sheegay wargeys kasoo baxa London oo lagu magacaabo Financial Times ayaa sheegay inay u baahan tahay Soomaaliya qorshe la mid ah kii dib loogu habeeyay Yurub ee Marshall Plan-ka loo yaqaan, si ay uga baxdo faqriga, colaadaha sokeeye iyo argagaxisada.

5/7/2013 4:42 AM EST
Talaado, May 07, 2013 (HOL) — Koox dabley ah ayaa xalay fiidkii weerar gaadmo ah ku qaaday saldhigga booliska Miir oo ku yaal xaafadda Horumar ee waqooyiga magaalada Gaalkacyo ee xarunta Gobolka Mudug.

5/7/2013 4:11 AM EST
Talaado, May 07, 2013 (HOL) — Maamulka gobolka Bay iyo Al-shabaab ayaa guulo ka kala sheegtay dagaal shalay ku dhexmaray duleedka degmada Qansax-dheere ee gobolka Bay, dagaalkaas oo la sheegayo inay ku dhinteen lix qof oo dhinacyadii dagaalamay ka tirsan.

5/7/2013 3:44 AM EST
Talaado, May 07, 2013 (HOL) — Ciidanka Booliska Somaliland ayaa Isniintii shalay baaritaan xoogan ku sameeyey guriga ay ku nooshahay hooyada dhashay amiirka Xarakada Al shabaab, Axmed Cabdi Godane oo loo yaqaan Sheekh Mukhtaar C/raxmaan Abuu-Zubeyr oo Hargeysa ku yaalla, iyagoo ku xiray howlgalkaas laba nin oo ay Cabdi Godane walaalo ahaayeen.

5/7/2013 3:37 AM EST
Talaado, May 07, 2013 (HOL) — Shirka London oo looga hadlayo arrimaha Soomaaiya ayaa lagu wadaa inuu saacadaha soo socda uu si rasmi ah uga furmo magaalada London ee xarunta Britain, iyadoo haatan ay wafuudda shirka ka qaybgalaysa ku sugan yihiin goobta loogu talogalay inuu ka dhaco.

5/7/2013 3:36 AM EST
Talaado, May 07, 2013 (HOL) —Maxkamadda degmadda Gabiley ayaa loo soo gudbiyey dacwad xasaasiyad dhalisay oo la xidhiidha xayaawaano dad shacab ahi isku haystaan, haseyeeshee arrintii murugtay ka dib markii wasaaradda Deeganka Somaliland oo loo dhiibay ay maxkamaddii u sheegtay in xayawaankii dhinteen.