Guddoomiyaha Gobolka Hiiraan oo sheegay inay qorshe u dajiyeen dhallinta kasoo goostay Xarakada Al-shabaab
Sabti, May 04, 2013 (HOL) — Iyadoo bilihii ugu dambeeyay ay sii kordhayeen tirada dhalinyarrada kasoo goosata Al-shabaab ee lagu soo bandhigo magaalada Baladweyne ayaa waxaa arrintaa markii ugu horreysay ka hadlayay guddoomiyaha maamulka gobolka Hiiraan, Cabdi Faarax Laqanyo oo sheegay in maamulka uu guddoomiyaha ka yahay qorshe cad u dajiyeen sida laga yeelayo ragga horay uga tirsanaa Al-shabaab ee isku soo dhiiba maamulka gobolka.
Guddoomiyaha maamulka gobollka waxaa uu sheegay in mar walba soo dhaweynayaan dhalinyarrada yar yar ee iskood u go'aansata in ay isaga baxaan Al-shabaab iyadoo la tixraacayo sida uu hadalka u dhigay cafiskii guud ee madaxweynaha dowladda federaalka u fidiyay dhalinyarrada ka tirsan Al-shabaab, laakiin hadda dhinaca kale waxaa uu sheegay in marnaba dhici doonin in si fudud ragga ka soo goosta Al-shabaab loogu sii dhax -deyn doonin bulshada.
"Annaga ka maamul ahaa arintaa qorshe cad ayaan ka leenahay, marka hore waxaa muhiim ah in la hubiyo dhalinyarradaas in ay ka tirsanaayeen Al-shabaab,
Haddii la ogaado in ay ahaayeen rag horay uga tirsanaan jiray Al-shabaab waxaa uu qorshuhu yahay in dhaqan celin loo sameeyo, la geeyo xarumo gaar ah oo loogu talagalay la wacyi galliyo, waayo in badan ayaa laga dhaadhicinayay wax yaabo aan sax aheyn, laakiin waxaan dhici doonin in si fudud bulshada loogu sii dhax-daayo dhalinyarrada iska soo dhiibta Al-shabaab,'' ayuu yiri guddoomiyaha maamulka gobollka Hiiraan.
Bilihii ugu danbeeyay ayaa in ka badan 100 dhalinyarro ah oo ka tirsan Al-shabaab ayaa la sheegay in ay isku soo dhiibeen maamulka gobollka Hiiraan, kuwaasoo qaarkood wali ku jira gacanta ciidamada booliiska maamulka gobollka iyo AMISOM.
Cabdi Faarax Laqanyo guddoomiyaha maamulka gobollka Hiiraan waxaa uu digniin u dirray shaqsiyaad sida uu sheegay horay uga tirsanaa oo hadda si dhuumaaleysi ah dib ugu soo laabanaya magaalada Baladweyne iyaga oo soo war-galin maamulka gobollka, isaga oo maamulku talaabo ka qaadi doono.
“Marka laga soo tago dhalinyarrada iyagu isa soo dhiibta, waxaan og-nahay in ay jiraan shaqsiyaad ka tirsanaa Al-shabaab oo hadda magaalada iska dhax jooga iyaga oo aan soo war-galin maamulka gobollka, waxaan leenahay waan idin og-nahay, marnaba ma dhici doonto qof danbi-gallay bulshada isaga oo waliba laga war-qabo in haddana uu magaalada iska dhax joog, marnaba maamulku arintaa uma dul-qaadanayo waayo waa arin qatar ku ah nabad-galyada, shaqsiyaadka noocaas ahna waxaan leenahay waa leydinka war-qabaa, waan idinku soo socnaa,'' ayuu yiri Cabdi Faarax Laqanyo.
Mar uu soo hadal qaaday waxa uga qorsheysan maamulka uu hogaamiyo degmooyinka kale ee wali ku jira gacanta Al-shabaab waxaa uu sheegay inqorshihii lagu wajihi lahaa durbaba la soo dhameystiray, laakiin uusan jecleyn in uu warbaahinta sii mariyo waqtiga iyo xilliga uu maamulku ku dhaqaaqayo howlgalka ka dhan-ka ay degmooyinka gacanta ugu jira Al-shabaab.
“In Al-shabaab la dirirayo ma'aha wax qarsoon, annagana waxaa noo qorsheysan in dhawaan aan u dhaqaaqno degmooyinka wali gacanta ugu jira Al-shabaab, laakiin xiliga iyo waqtiga talaabadaas aan qaadeyno ma rabo in aan ka sii hordhaco,'' ayuu yiri Cabdi Faarax Laqanyo.
Amniga gudaha magaalada Baladweyne ayuu sheegay in xoogga la saari doono si meesha looga saaro kooxaha sida uu hadalka u dhigay doonaya in ay carqaladeeyaan nabad-galyada.
''Ciidamada howlgal ayeey ku jiraan, mar marka qaar wey dhici kartaa in ay dhacaan falal amniga ka dhan ah, laakiin haddana ciidamadu waa ay foojigan yihiin habeen iyo maalina waxaa jira howlgal laga sameynayo xaafaddaha kala duwan ee magaalada,'' ayuu sheegay guddoomiyaha maamulka gobollka Hiiraan.
Ugu dambeyn, shacabka ku dhaqan magaalada Baladweyne ayuu ugu baaqay in ay maamulka gacan ku siiyaan sugida amniga magaalada, madaama ay adag tahay in nabad-galyada wax laga qabto haddii aysan bulshadu garab ciidamada sugida amniga.
C/raxmaan Diini, Hiiraan Online
[email protected]
Baladweyne, Soomaaliya
