3/28/2024
Today from Hiiraan Online:  _
Wararka Maanta- Arbaco, May 1 , 2013
Ciidamada Maamulka Gobolka Hiiraan oo markii ugu horreysay loo qaybiyay lacago gunno ah (DAAWO SAWIRRO)


Arbaco, May, 01, 2013 (HOL)  Munaasabad siweyn loo soo agaasimay laguna qabtay xarunta ciidamada Lama-galaay ee magaalada Baladweyne ayaa maanta mudo 22 sano ah kadib waxaa markii ugu horeysay lacago gunno ah loogu qeybiyay ciidamada xoogga dalka ee maamulka gobollka Hiiraan.

Guddoomiyaha maamulka gobollka Hiiraan Cabdi Faarax Laqanyo, saraakiisha ciidamada maamulka gobollka iyo AMISOM oo goob joog ka ahaa musaabada  ayaa qeybtii ugu horeysay ciidamada  waxaa maanta loogu qeybiyay  karar aqoonsi ah iyo lacago gunno ah oo sida ay sheegeen mas'uuliyiinta maamulka gobollka ka baxsan mishaaraadka caadiga ah ee ciidamadu leeyihiin.

Taliyaha ciidamada maamulka gobollka Hiiraan ee dowladda Soomaaliya Col Towane Axmed Gurey oo la hadllayay ciidamada ayaa sheegay in maanta maalin weyn u tahay ciidamada, madaama sida uu sheegay mas'uuliyiinta maamulka gobollka mudo gaaban xilka hayay durbaba bilaabeen in ay  bixiyo xuquuqdii ay ciidamadu lahaayeen.

“Waxaan u maleynayaa maanta ciidamada maalmihii la soo dhaafay waa ay uga duwan tahay, runtiina waxaa fuulay waajiba adag, mar haddii uu maamulku bixinayo xuquuqdii ay lahaayeen, waxaa nagu waajib ah ama askariga ku waajib ah in isagana uu ka soo baxo waajibaadkii lagu lahaa,'' ayuu yiri Col Towane Axmed Gurey.

Taliyaha ciidamada Jabuuti  ee qeybta ka ah howlgalka AMISOM ee gobollka Hiiraan Col Cismaan Dubad oo hadal ka jeediyay munaasabada ayaa sheegay in wax lagu farxo tahay isbadalka weyn ee ka muuqada ciidamada marka loo eego halkii laga soo billaabay dhismahooda, isaga oo uga mahad celiyay maamulka cusub ee gobollka talaabada ay durbaba qaadeen oo ah in dib u eegis lagu sameeyay xuquuqda ciidamada oo mudo dheer maqneyd.



Guddoomiyaha degmada Baladweyne Cabdi Bishaar Aadan oo la hadllayay ciidamada ayaa ku dhiiri-galiyay ka qeyb-qaadasha difaaca guud ahaan dalka, isaga oo sheegay in ciidamada caawinaya dowladda federaalka Soomaaliya yihiin kuwo waqti kooban joogaya dalka, laakiin ciidamada xoogga dalka Soomaaliyeed yihiin kuwo looga fadhiyo difaaca dalkooda.

Guddoomiyaha maamulka gobollka Hiiraan Cabdi Faarax Laqanyo oou hadal u jeediyay ciidamada ayaa sheegay in uu ku faraxsan yahay maanta oo ku beegan maalintii shaqaallaha aduunka 1-bisha May in uu waqti la qaato ciidamada maamulka gobollka Hiiraan  oo sida uu sheegay waqti adag soo shaqeeyay soona maray marxalado iyo daruuf kala duwan.

“Runtii waan ku faraxsanahay in aan maanta halkan wada joogno oo aan arko ciidamo  runtii ay ka go'an tahay in ay u shaqeeyaan dalka iyo dadka, annaga ka maamul ahaan waxaa naga go'an horeyna u ballan-qaadanay in mudnaanta koowaad aan siineyno nabad-galyada, taas macnaheedu waxaa ay tahay in aan xoogga saarno dhismaha ciidamada tayo ahaan iyo mooral ahaan intaba, annaga waxaan ballan-qaadeynaa haddii uu Alle idmo in aynu ka soo baxno waajibaadka na saaran ee ah in aan dhameystirno xuquuqda askarigu leeyahay, askarigana waxaa looga fadhiyaa sidaasoo kale in uu dhiniciisa qaato waajibaadka saaran,'' ayuu yiri guddoomiyaha maamulka gobollka Hiiraan.

Mar uu soo hadal qaaday guddoomiyahay kaararka aqoosiga ah ee loo qeybiyay ciidamada waxaa uu sheegay in ay tahay arin wax weyn ka tari doonta nabad-galyada, madaama aqoonsigu kan kala saaraya askariga iyo kan doonaya in uu magaca ciidamada dhibaato ku geysto.

“Aqoonsigan aan hadda idin qeybinay waa mid ku-meel-gaar ah ilaa aad ka heli doontaa kii saxda ahaa, kararkan aad hadda qaadateen waxaa ay idinka caawin doonaan in xitaa dhaxdiina aad isku kalsoonaataan oo markiiba aad garan kartaan kan doonaya in uu idinku soo dhax dhunto ee aan ciidamada ka tirsaneyn,'' ayuu yiri guddoomiyaha maamulka gobollka Hiiraan.

Guddoomiyaha gobollka Hiiraan ayaa sheegay in ay ahmiyad gaar ah siinayaa nabad-galyada, isaga oo ku dhawaaqay in wixii xilligan ka danbeeya ciidamada heegan buuxa ku jiraan, askari kastana laga doonayo in uu diyaar noqdo waqti kasta oo loo baahdo.

“Dadka ku dhaqan gobollka waa dad dowladnimada diyaar u ah haddii ay hellaan mas'uuliyiin iyo ciidamo isku xiran oo si sax ah u shaqeynaya, annaga waxaa naga go'an in aan ka shaqeyno daryeelka ciidamada inta dowladda dhexe naga soo gaareyso,'' ayuu yiri Cabdi Faarax Laqanayo guuddoomiyaha maamulka gobollka Hiiraan.

Talaabada maanta uu qaaday maamulka dhawaan uun xilka la wareegay ee gobollka Hiiraan ayaa ku soo beegantay xili dhawaan dib u habeyn buuxda lagu sameeyay nidaam-ka daqli ururinta gobollka taasoo sahashay in tiro ciidamo ah hellaan lacago gunno ah oo ka baxsan sida uu guddoomiyaha sheegay mishaarka ciidamada.




C/raxmaan Diini, Hiiraan Online
[email protected]
Baladweyne, Soomaaliya













Click here
5/1/2013 12:19 PM EST
Arbaco, May 01, 2013 (HOL) — Madaxweyne Soomaaliya, Xasan Sheekh Maxamuud ayaa maanta oo ku beegan maalinta shaqaalaha adduunka wuxuu booqday shirkad kaluumeysi oo xarunteedu tahay degmada Wardhiigley ee gobolka Banaadir, isagoo sheegay in kalluumeysigii sharci-darrada ahaa ee xeebaha Soomaaliya uu sii yaraanayo.

5/1/2013 12:05 PM EST
Arbaco, May 01, 2013 (HOL) — Wasiiradda arrimaha dibadda ee Soomaaliya, Fawsiya Yuusuf Xaaji Aadan ayaa maanta u dhooftay magaalada Addis Ababa ee dalka Itoobiya, halkaasoo ay uga qaybgalayso shir looga hadlayo amaanka dalalka Bariga Afirka oo ay soo diyaarisay IGAD.

5/1/2013 12:03 PM EST
Arbaco, May 01, 2013 (HOL) — Xoghayaha guud ee Qaramada Midoobay, Ban Ki-Moon ayaa cambaareeyay dilkii ku xigeenkii garyaqaanka guud ee dowladda Soomaaliya, Axmed Sheekh Nuur Macallin, isagoo sheegay inuu aad uga xun yahay weerarrada ka dhacaya Muqdisho ee lagu beegsanayo sharci-yaqaannada Soomaaliyeed.

5/1/2013 10:17 AM EST
Arbaco, 1 May, 2013(HOL) :- Ciidamada Kenya ee ilaalada ka haya xarunta Jaamacadda Kismaayo oo ah halka ay ku suganyihiin qaar kamid ah ergada ka qeybqaadaneeysa shirka maamul u sameynta Jubbaland ayaa waxaa maanta lagu qabtay haweeney la sheegay in ay sidatay walxaha qarxa.

5/1/2013 8:40 AM EST
Arbaco, May 01, 2013 (HOL) — Maxkamadda Degmadda Gabiley ayaa toddobaadkan magaaladda Wajaale ee xuduudda Somaliland iyo Itoobiya u dhexeeya ku xukuntay rag lagu eedeeyey inay tahriibiyaan dhalinyarta Somaliland, kuwaas oo lagu soo qabqabtay magaaladaasi.

5/1/2013 8:15 AM EST
Arbaco, May 01, 2013 (HOL) — Madaxwaynihii hore ee Soomaaliya, Shariif Sheekh Axmed ayaa socdaal ku maraya qaar ka tirsan magaalooyinka waa-weyn ee dalka Mareykanka, isagoo khudbado ka jeediyay magaalada Atlanta ee gobolka Georgia, West Virginia iyo North Carolina, wuxuuna khudbadaha ka jeediyay jaamacado ku yaalla gobollada uu maray, wuxuuna sidoo kale la qaatay kulamo mas’uuliyiin ay ku jiraan qaar xilal hore kasoo qabtay dalka Mareykanka iyo Soomaaliyeed ee ku nool magaalooyinkaasi.

5/1/2013 7:39 AM EST
Arbaco, May 01, 2013 (HOL) — Maanta oo ah maalinta shaqaalaha weynaha adduunka ayaa xiriirka ururada shaqaalaha Soomaaliyeed ee FESTU waxay u dabaal-degeen maalintan qiimaha weyn ku leh shaqaalah dunida oo dhan.

5/1/2013 1:33 AM EST
Arbaco, May 01, 2013 (HOL) — Xarakada Al-shabaab ayaa ku goodisay inay u aargudi doonto 13-kii qof ee shalay lagu dilay duleedka Boosaaso, iyadoo ku tilmaantay falkaas xasuuq loo geystay dad aan waxba galabsan oo la iska soo xirxiray.

5/1/2013 1:08 AM EST
Arbaco, May 01, 2013 (HOL) — Ammaanka magaalada Muqdisho ayaa si aad ah loo adkeeyay, waana maalintii labaad oo jidadka Muqdisho intooda badan ay xiran yihiin, waxaana ma’uuliyiinta maamulka gobolka Banaadir ay shegeen in laga baqdin qabo in Al-shabaab ay falal argagaxiso ka geysato Muqdisho.

5/1/2013 1:04 AM EST
Arbaco, May 01, 2013 (HOL) — Dowladaha Britain iyo Imaaraadka Carabta ayaa ku dhawaaqay inay bixinayaan lacag gaaraysa laba milyan oo doollar si looga hortago kufsiga loo geysto haweenka Soomaaliyeed, iyadoo hadalkan lagu sheegay warbixin kasoo baxay wasaaradda arrimaha dibadda Britain.