5/19/2024
Today from Hiiraan Online:  _
Wararka Maanta- Jimco, Mar 8 , 2013
Nin dilay Xaaskiisii iyo Caruur uu dhalay iyo dhakhaatiirta oo ku Mashquulsan sidii ay Naftiisa ku Badbaadin lahaayeen

Jimco, Maarso 08, 2013 (HOL) — Nin la sheegay inuu maskaxdda ka xanuunsanayo ayaa saaka subaxii tooray qudha kaga jaray xaaskiisi iyo laba caruur ah oo uu dhalay, dhaawacna soo gaadhsiiyey naftiisa.

Ninkan oo magaciisa la yidhaa Cabdiraxmaan Maxamed Axmed oo Deganaa xaafadda boqol jire ee galbeedka magaaladda Hargeysa, ayaa tooray meelo badan ka galiyey xaaskiisii oo uur sideed bilood lahayd iyo laba caruur ah oo uu dhalay iyo isaga laftiisii oo isna dhawr meelood iska galiyey oo ku jira xaalad caafimaad daro oo adag.

Maamulaha cisbitaalka guud ee magaaladda Hargeysa Axmed Daahir Axmed oo warbaahinta la hadlay ayaa sheegay in ninkan oo dhaawac ah loo keenay, isla markaana sadex qof oo qoyskiisa ahna uu soo dilay.

“Runtii waa dhacdo aad u xanuun kulul oo laga naxo, waxa anaga saaka la noo keenay nin qudha ka jaray xaaskiisii oo leh uur sideed bilood ah iyo laba caruur ah oo uu dhalay oo midna afar jir yahay midna laba jir yahay, isaguna waa dhaawac oo dhawr meelood ayuu tooridda iska galiyey”ayuu yidhi Maamulaha cisbitaalka guud ee magaaladda Hargeysa Axmed Daahir Axmed oo ka hadlayey dhacdadan murugadda leh.

Maamuluhu waxa uu sheegay in ninkani maskaxda ka xanuunsanayey dhawr jeer oo horana la geeyey meelo Cilaaj ah oo dadka lagu dabiiba, waxaanu intaas ku daray in aan la garayn sababta uu qoyskiisa u dilay, haseyeeshee dhakhaatiirta cisbitaalka ayaa la tacaalaya xaaladiisa caafimaad.

Cabdiraxmaan Maxamed oo da’diisa lagu sheegay 32 jir ayaa isagu dhaawac culus qaba, waxaanay dhakhaatiirku ku dadaalaysaa inay badbaadiyaan, isla markaana waxa lagula jiray qolka qaliinka degdega ah ee cisbitaalka.

Si kastaba ha ahaateen, dhacdadan ayaa ah uur ku taallo ah oo ku cusub guud ahaan Somaliland, taas oo dadweynuhu aad isku waydiinayeen falkan argagaxa dhaliyey ee ka dhacay magaaladda Hargeysa.

Barkhad-Ladiif M. Cumar, Hiiraan Online
[email protected]
Hargeysa, Somaliland