5/24/2024
Today from Hiiraan Online:  _
Wararka Maanta- Jimco, Mar 8 , 2013
Xukuumadda Waqooyiga Kuuriya oo ku Hanjabtay inay Gantaallo Nukliyeer ah ku weerarayso dalka Mareykanka


Jimco, Maarso 08, 2013 (HOL) — Jamhuuriyada Kuuriyada Waqooyi ayaa ku dhawaaqday inay goyneyso dhammaan heshiisyadii kala dhaxeeyay dalka Kuuriyada Koonfureed, taasoo ay kaga jawaabayso cunno-qabateynta cusub ee Qaramada Midoobay ay ku soo rogtay dalkaas oo muddo dheer go’doon ahaa.

Cunno-qabteynta lagu soo rogay Waqooyiga Kuuriya ayaa waxay salka ku haysa tijaabadii gantaalka Nukliyeerka ah ee ay bishii lasoo dhaafay sameysay, iyadoo dowladda Kuuriya ay si aad ah uga caroortay xayiraadda cusub ee lagu soo rogay.

Xukuumadda Pyongyan ayaa sidoo kale ku gooddisay inay hubka halista ah ee Nukliyeerka ay ku weerarayso dalka Mareykanka, iyadoo shacabka dalka Koonfurta Kuuriya ay iyaguna aad  uga walaacsan yihiin in taallbo taas la mid ah lagu soo qaado dalkooda.

Tani waa markii afraad oo cunno-qabateyn lagu soo rogo hubka nukliyeerka Kuuriyada Waqooyi. Waxaana cunno-qabateyntan cusub ay noqonaysaa mid aad u taabata dalkaas, sida u sheegay danjiraha Mareykanka ee Qaramada Midoobay Susan Rice.

Qaraarkan Qaramada Midoobay ayaa wuxuu mamnuucayaa in la kala wareejiyo wax dhaqaale ama lacag ah oo wax loogu qabanayo hawlaha hubka ee xukuumadda Pyongyang.

Sidoo kale, wuxuu xayirayaa dadaal walba oo dalkaas wax loogu qabanayo, waxaana uu sii adkeynayaa tallaabooyinkii horey loogu soo rogay iyadoo ka dhigeysa mid la mid ah xannibaadaha Qaramada Midoobay ee saaran dalka Iraan.

Inay guuleysato cunno-qabateynta cusub waxay ku xiran tahay sida y u dhaqan-geliso dowladda Shiinaha oo ah xulafada ugu weyn ee ay heysato Kuuriyada Waqooyi iyo dalka ugu weyn ee dhaqaale ahaan ay isku xiran yihiin.

Dowladda Shiinuhu way taageertay cunno-qabateyntan ugu dambeysay ee Qaramada Midoobay ay saartay Waqooyiga Kuuriya, sababtoo ah waxay aad uga careysneyd tijaabadii ugu dambeysay ee ay Pyongyang sameysay, balse waxay ka walaacsan tahay in deggenaansho la'aan lagu abuuro keli-taliyaha Pyongyang.

Maxamed Xaaji Xuseen, Hiiraan Online
[email protected]
Muqdisho, Soomaaliya