3/28/2024
Today from Hiiraan Online:  _
Wararka Maanta- Talaado, Mar 19, 2013
Ururka Bisha Cas oo Shahaadooyin ku Guddoonsiiyay Degmada Laascaanood Arday Bartay Culuun kala duwan (SAWIRRO)


Talaado, Maarso 19, 2013 (HOL) — Xaflad shahaadooyin lagu gudoonsiiyay 260 arday oo bartay maaddooyinka caafimaadka iyo kambiyuutarka ayaa lagu qabtay xarunta Bisha Cas ee magaalada Laascaanood ee xarunta gobolka Sool.

Madaxa ururka Bisha Cas ee gobolka Sool, Daakir Maxamuud Warsame oo ugu horreyn ka warbixiyey xafladda ayaa sheegay in ururka Bisha Cas markii hore ay bixin jireen barashada  gargaarka deg-dega ah; balse ay haatan kor u qaaday oo gaarsiisay illaa heer ah inuu qofku awoodi karo inuu howlo badan bulshada u qaban karo.

Daakir wuxuu intaas ku daray in sanadba sanadka ka dambeeya ay soo kordhayaan ardayda ay waxbaraan taasina ay tahay tallaabo faa’iido badan u soo hoyn karta bulshada reer Laascaanood iyo kuwa kale ee gobolka ku nool.

Dr. Cabdi Ruush oo ku hadlayay magaca bahda caafimaadka ayaa wuxuu u soo jeediyay dhalinta waxbarashada dhameystay inaysan ku ekaan intan ee ay kasii kordhistaan, waxaanu isagoo hadalkiisa sii wata raaciyay inay jiraan dhibaatooyin badan oo dadka waxbaranay haysta taasoo uu ku tilmaamay dhinaca akhlaaqda oo inta badan halkii la filaayay inay aqoontu wax tarto aanay wax ka bedelin.

Guddoomiyaha guddiga ganacsatadda gobolka Sool, Cabdirisaaq Axmed Warsame oo munaasabadda ka hadlay ayaa isagana u mahad celiyey ururka Bisha Cas oo uu sheegay inay yihiin mutadawiciin wax-soo-saar wanaagsan u hel bulshada, isla markaana wuxuu ardaydii dhamaysatay waxbarashada ku booriyay inay sii wadaan kor u qaadidda aqoontooda.

Sidoo kale, guddoomiyaha gobolka Sool, Maxamed Faarax Aadan oo isagana ka hadlay goobta ayaa soo-jeedieyay ayaa wuxuu ka dhawaajiyay in markii lasoo bedelay gobolka Sool bishii aan soo dhaafnay uu arkay dadaal  badan oo dhinaca waxbarashada ah, isagoo intaas ku daray baaq uu u soo jeediyay hablaha oo uu ka codsaday inaanay dayicin waxbarashada xitaa haddii ay guursadaan.

Ugu dambeyn, ardaydii dhameystay waxbarashada ayaa waxaa halkaas lagu guddoonsiiyay shahaadooyin iyadoo intii u horreysay uu gacanta ka saaray guddoomiyaha gobolka Sool, Maxamed Faarax Aadan.

Si kastaba ha ahaatee ardaydan intaas le’eg ayaa ah tii ugu badnayd ee ka baxda dugsiyada ay maamulaan ururka Bisha Cas ee gobolka Sool, waxaana la filayaa inay sii kordhaan iyadoo kumaannaan kun oo qof oo aan awoodin inay bixiyaan lacagaha qaaliga ah ee dugsiyada gaarka loo leeyahay dadka wax ku baraan ay kusoo wajahan yihiin, waxaanse laga war-hayn sida uu u daboobil doono ururkan baahidaas jirta.


Seynab Cabdi Warsame, Hiiraan Online
[email protected]
Laascaanood, Gobolka Sool













Click here
3/19/2013 2:33 PM EST
Dood xiisa leh ayaa waxay ka dhacday magaalada Minneapolis ee gobolka MN. Doodaas oo lagu falanqeynayey "YAA KA DAMBEEYA DILALKA QORSHEYSAN"

3/19/2013 12:18 PM EST
Talaado, Maarso 19, 2013 (HOL) — Askari ka tisran ciidamada Kenya ayaa ku dhintay laba kalena way ku dhaawacmeen qarax gellinkii dambe ee maanta ka dhacay degmada Mandheera ee gobolka Waqooyi –bari ee dalka Kenya.

3/19/2013 12:02 PM EST
Talaado, Maarso 19, 2013 (HOL) — Wafdi uu hoggaaminayay wasiir ku xigeenka wasaaradda gaashaandhigga Soomaaliya, Axmed maxamed Maxamuud oo uu ka mid yahay wasiir u dowlaha wasaaradda maaliyadda, Maxamed Rashiid Sheekh Daahir iyo abaanduulaha cusub ciidamada xoogga dalka, C/risaaq Khaliif Cilmi ayaa maanta gaaray magaalada Baydhabo ee xarunta gobolka Bay.

3/19/2013 11:37 AM EST
Talaado, Maarso 19, 2013 (HOL) — Kulan lagu gorfeynayey mashaariicdii horumarineed ee ay hay’adaha Qaramadda midoobay ka fuliyeen Somaliland sanadkii tagay ayaa maanta ka furmay hoteel Ambassador ee magaaladda Hargeysa.

3/19/2013 10:39 AM EST
Talaado, 19 Maarso, 2013(HOL) - Waxaa gudaha magaalada Kismaayo mudooyinkii u danbeeyay ka soconayay shirkii maamul u sameynta gobollada Jubooyinka, iyadoona shalay ay magaalada sooa gaareen ergo ka socotay gobolka Gedo, kuwaasoo qeyb ka ah xubnaha ka qeybqaadanaya dhismaha dowlad goboleedka Jubbaland.

3/19/2013 8:16 AM EST
Talaado, Maarso 19, 2013 (HOL) — Maxkamadda gobolka Banaadir ayaa ku ridday xukunno kala duwan lix ruux oo ka mid ahaa 12-qof oo maxakamada maanta la horkeenay, kuwaasoo eedeysnaa dambiyo isugu jira, kufsi, dilal iyo burcadnimo.

3/19/2013 7:41 AM EST
Talaado, Maarso 19, 2013 (HOL) — Beer ay maalgashadeen muwaadiniin reer Somaliland, ayaa koox dabley ahi ay habeen hore khasaare weyn soo gaadhsiiyey agabkii beerta yaalay, isla markaana ay burburiyeen konton geed oo Saytuun ah.

3/19/2013 7:32 AM EST
Talaado, Maarso 19, 2013 (HOL) — Dagaalyahanno taabacsan Xarakada Al-shabaab ayaa xalay gurigsiisa kala baxay, Sheekh Cabdiraxmaan Macallin Warsame oo 75-jir ahaa, isla markaana ahaa imaamkii masjidka weyn ee degmadaas, iyadoo maydkiisa oo qoorta laga jaray saakay laga helay god ku dhow gurigiisa.

3/19/2013 7:08 AM EST
Talaado, Maarso 19, 2013 (HOL) — Mas’uuliyiinta maamulka gobollka Hiiraan, saraakiisha ciidamada dowladda iyo kuwa Jabuuti ee howlgalka midowgga Africa AMISOM, odayaal dhaqameed, waxgarad, iyo boqolaal dadweyne ah oo ka kooban qeybaha bulshada oo ay ka mid yihiin ardeyda wax ka barata dugsiyada iyo jaamacada magaalada ayaa maanta siweyn u soo dhaweeyay Ugaas C/raxmaan Ugaas Khaliif oo dib ugu laabtay afar sano kaddib magaalada Baladweyne.

3/19/2013 2:09 AM EST
Talaado, Maarso 19, 2013 (HOL) — Xildhibaan Sheekh Aadan Maxamed Nuur (Sheekh Aadan Madoobe) oo horay u ahaa guddoomiyaha baarlamaanka Soomaaliya oo ku sugan gobolka Bay ayaa sheegay in saraakiisha ciidamada Itoobiya ay ku wargeliyeen inay ka baxayaan dhammaan deegaannada ay kaga sugan yihiin gobollada Bay iyo Bakool.

3/19/2013 1:53 AM EST
Talaado, Maarso 19, 2013 (HOL) — Dowladda Soomaaliya ayaa maanta markii ugu horreysay gargaar cunno ah gaarsiinaysa deegaannadii laga saaray Al-shabaab ee gobolka Shabeellada hoose, iyadoo ammaanka jidka isku xira Muqdisho iyo Afgooye aad loo adkeeyay.