3/30/2023
Today from Hiiraan Online:  _
Wararka Maanta- Arbaco, Aug 7 , 2013
Koox Dabley ah oo xalay meel Boosaaso u jirta 55-KM ku gubey Laba Gaari oo u Rarnaa Hay'adda Cunnada Adduunka ee WFP


Arbaco, August 07, 2013 (HOL) — Dabley hubeysan ayaa xalay ku gubey inta u dhexeysa magaalada Boosaaso iyo tuulada Kala-bayr labo gaari oo nooca xamuulka qaada ee ay Soomaalidu (Candho-meydlaha) u taqaan ah.

Gawaaridan oo u kireysnaa hay'adda WFP, kuna sii jeedey magaalada Gaalkacayo ee xarunta gobolka Mudug, waxaa mid kamid ahi uu sidey shidaal halka midka kalena uu sidey buskudka lasiiyo ciyaalka ay nafaqo darradu hayso (Buskud Dhiiqo).

Goobta uu falkani ka dhacay ayaa ah Meermeerka oo qiyaastii 55-km koonfurta kaga aaddan magaalada Boosaaso. Taliye ku-xigeenka ciidamada Daraawiishta Puntland sareeye guuto Axmed Cabdi Xaashi oo la hadlay Idaacadda Daljir ee magaalada Boosaaso ayaa ka warbixiyey sida ay wax u dheceen.

Wuxuuna sheegay in labadan gaari markii ay halkaas marayeen ay koox dabley ah oo hubeysni rasaas ku fureen si ay joojiyaan, isagoo intaas raaciyey in wadayaashii iyo rikaabkii kaleba ay ku amreen in ay soo degaan kaddibna ay indhaha ka xireen.

Taliye ku-xigeenka ciidamada Daraawiishta Puntland sareeye guuto Axmed Cabdi Xaashi ayaa dhinaca kale sheegay in kooxda weerarka geysatey ay labada gaari dab qabadsiiyeen, kaddibna ay goobta ka baxsadeen. Ma jiro wax khasaare nafeed ah oo weerarkaas ka dhashay marka laga reebo baabuurta iyo wixi saarnaa oo bas beelay.

Mar la weydiiyey cidda weerarka geysatey iyo sababta wuxuu sheegay in uu baaritaan socdo, haseyeeshee uu isagu rumeysan yahay in ay ka tirsanaayeen kooxda Al-shabaab ee uu fadhigoodu yahay buuraleyda Golis.

"Weli baaritaan baa socda, aniguse waxan ka aaminsanahay in ay ka danbeeyeen nimankaas dadka iyo dalka iyo diintaba liddiga ku ah ee Shabaab la yiraahdo..." sareeye guuto Axmed Cabdi Xaashi ayaa yiri.

Falkan oo ah kii ugu horeeyey ee noociisa ah, wuxuu kusoo aadayaa maalin kaddib markii wasaaradda amniga ee Puntland ay ka digtey weeraro argagixiso oo ka dhaca Puntland inta lagu guda jiro ayaamaha iidka, arintaasoo keentay in ciidamada heegan sare la geliyo magaalooyinka waaweynna howlgallo baaritaan u badan laga bilaabo.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
8/7/2013 3:32 PM EST
Arbaco, August 07, 2013 (HOL) — Xukuumadda Soomaaliya ayaa caawa ku dhawaaqay inay maalinta berri ah tahay ciid, waxaana hambalyo ku aaddan ciidda u diray shacabka Soomaaliyeed ra’iisul Soomaaliya, Cabdi Faarax Shirdoon Saacid.

8/7/2013 3:30 PM EST
Arbaco, August 07, 2013 (HOL) — Wasiirka horumarinta adeegga bulshada Xukuumada Soomaaliya, Maryan Qaasim Axmed ayaa maanta oo Arbaco ah ku dhawaaqday in dowladda Soomaaliya ay ka heshay dalka Yemen deeqo waxbarasho jaamacadeed ah, kuwaasoo tiradoodu tahay 100, kuwasoo kala ah waxbarashada sare iyo shahaadaha koowaad ee Bachelor-ka.

8/7/2013 10:01 AM EST
Arbaco, August 07, 2013 (HOL) — Hay’adda gargaarka bani’aadmanimo ee Afrika (HARO) ayaa gargaar raashin ah oo loogu talo-galay sakaatul fidriga ka qaybisay degmada Wadajir ee gobolka Banaadir iyo magaalada Kismaayo ee gobolka Jubbada Hoos, iyadoo loo qaybiyay dad dan-yar oo ay ku jireen kuwo indhoolayaal ah.

8/7/2013 8:47 AM EST
Arbaco, August 07, 2013 (HOL) — Bannaanbax looga horjeedo go’aankii uu ku gaaray bankiga Barclays inuu joojiyo adeegyadii uu u qaban jiray xawaaladaha Soomaalida ayaa maanta ka dhacay magaalada London, gaar ahaan afaafka hore ee xafiiska ra’iisul wasaaraha Britain, David Cameron.

8/7/2013 8:16 AM EST
Arbaco, August 07, 2013 (HOL) — Magaalada Muqdisho ayaa waxaa lagu qabtay munaasabad lagu xusayay sannadkii laabad ee kasoo wareegay markii la aasaasay xisbiga DADKA Soomaaliyeed oo ka mid ah xisbiyadii siyaasadeed ee ka qaybgalay doorashadii madaxnimo ee Soomaaliya.

8/7/2013 8:10 AM EST
Arbaco, August 07, 2013 (HOL) — Iyadoo ay maalin keliya ka harsan tahay munaasabaddii Iidul Fidriga ayaa waxaa suuqa weyn ee magaalada Boosaaso laga dareemayaa dhaqdhaqaaq ganacsi oo xooggan.

8/7/2013 4:57 AM EST
Arbaco, August 07, 2013(HOL) :- Xoogagga Al-shabaab ayaa dagaal xooggan ku qaaday degmada Afmadow ee gobolka Jubbada hoose, iyadoona dagaalkaasi uu sababay khasaarooyin lixaad leh oo kala gaaray dhinacyadii dagaalamay.

8/7/2013 4:01 AM EST
Arbaco, August 07, 2013 (HOL) — Xukuumadda Kenya ayaa shuruud ku xirtay wareejinta garoonka diyaaradaha iyo dekedda magaalada Kismaayo ee xarunta goblka Jubbada Hoose, iyadoo dhawaan ay madaxda dalalka ay ciidamadu ka joogaan Somnalia ay kasoo saareen shir ay ku yeesheen Kampala in maamulka garoonka iyo dekedda Kismaayo lagu wareejiyo dowladda Soomaaliya.

8/7/2013 2:52 AM EST
Arbaco, August 07, 2013 (HOL) — Deeq lacageed oo gaareysa 1,440 dollar ayaa la gaarsiiyay bukaannada ku jira isbitaalka guud ee magaalada Laascaanood ee xarunta gobolka Sool.

8/7/2013 2:41 AM EST
Arbaco, August 07, 2013 (HOL) — Xilli ay muddo yari ka harsan tahay munaasabaddii Iidul Fidriga ayaa waxaa magaalooyinka waaweyn ee Puntland ka bilowday howlagallo ay ciidamada Boolisku ammaanka si weyn ugu adkeynayaan.

8/7/2013 2:17 AM EST
Arbaco, August 07, 2013 (HOL) — Dab weyn oo aan la ogeyn wixii sababay ayaa saakay oo Arbaco ah ka kacay garoonka diyaaradaha Jommo Kenyata ee magaalada Nairobi, taasoo keentay in garoonka la xiro tan iyo inta amar kale laga soo saarayo.