3/28/2024
Today from Hiiraan Online:  _
Wararka Maanta- Arbaco, Aug 14, 2013
Booliiska Somaliland oo baaritaano ku sameynayay Gaadiidka Hargeysa iyo Su'aalo ay shacabku iska weydiiyeen (SAWIRRO)


Arbaco, August 14, 2013 (HOL) — Ciidamadda Booliska Somaliland, ayaa maanta hawlgal balaadhan oo ay ku baadhayeen gaadiidka  iyo dadka la socdaba ka bilaabay magaaladda Hargeysa.

Dadweynaha ayaa wax badan iska waydiiyey sababta keentay in ciidanku si xoogan u baadhaan gaadiidka iyo waxa soo cusboonaaday ee keenay in hadh cad gaadiidka la baadho, maadaama oo hore sidan oo kale loo baadhi jirin.

Haseyeeshee inta badan habeenkii ayaa looga bartay in sidan oo kale loo baadho gaadiidka, balse waxa maanta baadhitaankani  la bilaabmay galinkii hore ee maanta, iyagoo isgoysyada magaaladda ku yaalla gadiidka soo mara ciidanku xoog u baadhayeen.

Dadweynaha iyo gaadiidka la baadhayey ayaa iyagu talaabadan amniga lagu sugayo soo dhoweeyey, isla markaana sheegay inay raali ka yihiin qaab kasta oo amniga kor loogu qaadayo, waxaana la arkayey dadweynaha oo la shaqaynayey Booliska, isla markaana u fududaynaya baadhitaanka ciidanka.

Inkastoo ciidanku ay dadweynaha u sheegayaan in aanay wax dhibaato ahi jirin, balse ay hubinayaan gaadiidka iyo waxa saaran, haseyeeshee dadweynaha ayaa is waydiinayey waxa cusub ee sidan loogu baadhayo gaadiidka iyo rakaabka la socdaba.

Taliyaha ciidanka Booliska Somaliland, Gen:Cabdilaahi Fadal Imaan, ayaa isagu badhitaankan ku macneeyey waajibaadkoodii oo ay si caadi ah u gudanayaan, isla markaana aanay jirin wax cusub oo lagu baadhayo, balse ay shaqadoodii ay awal horaba qaban jireen ay tahay.

Taliyuhu ma cadayn ujeedadda dhabta ah ee sidan xoogan wax loogu baadhayeen, haseyeeshee waxa uu sheegay in ciidanka Booliska mar walba ay heegan ku jiraan, isla markaana baadhitaanada noocan oo kale ah ay mar kasta ay sameeyaan.

Si kastaba ha ahaatee, inta badan magaaladda laguma arki jirin in maalin cad la baadho gaadiidka iyo dadka la socda oo ay ku jiraan gaadiidka dadweynaha ee xaafadaha u kala baxa, haseyeeshee ciidanka Booliskuna ma cadayn sababta u baadhayaan, illaa hadana wax natiijo ah kama soo saarin baadhitaankoodda.


Barkhad-ladiif M. Cumar, Hiiraan Online
[email protected]
Hargeysa, Somaliland













Click here
8/14/2013 1:21 PM EST
Arbaco, August 14, 2013 (HOL) — Dowladda KMG ah ee dalka Masar ayaa xukun deg-deg ah gelisay dalkaas gellinkii dambe ee maanta, kaddib markii Arbacada maanta ah ay dhaceen dalkaas rabshado dhaliyay khasaare soo gaaray dad isugu jira shacab iyo askar.

8/14/2013 12:52 PM EST
Arbaco, August 14, 2013 (HOL) — Ugu yaraan saddex qof oo mid ay ahayd haweeney ayaa ku dhintay, toddoba kalena way ku dhaawacmeen markii ay ciidammo ka tirsan kuwa dowladdu maanta ku fureen rasaas dad shacab ah oo kasoo horjeestay inay ka guuraan dhul uu leeyahay milateriga dowladda Soomaaliya oo horay loogu wargeliyay inay ka guuraan.

8/14/2013 12:32 PM EST
Arbaco, August 14, 2013 (HOL) — Xoogag taabacsan Xarakada Al-shabaab ayaa Arbacada maanta ah gellinkii dambe la wareegay isbitaalka degmada Diinsoor ee gobolka Bay oo ay gacanta ku haysay hay’adda MSF Swiss, iyagoo ka qaatay qalabkii halkaas yaallay.

8/14/2013 9:28 AM EST
Arbaco, August 14, 2013 (HOL) — Ciidamada ammaanka ee Puntland ayaa kantaroolka magaalada Boosaaso ee xarunta gobolka Bari ku qabtay lacag been abuur ah oo kor u dhaafeysa boqol milyan oo Shilinka Soomaaliga ah.

8/14/2013 8:55 AM EST
Arbaco, August 14, 2013 (HOL) — Hay’adda dhakhaatiirta aan xuduudda lahay ee MSF ayaa ku dhawaaqday maanta oo Arbaco ah inay joojisay gabi ahaan howlihii caafimaad ee ay haysay gudaha Soomaaliya, kaddib markii ay sheegtay in xaaladda ammaan ay sii xumaanayso.

8/14/2013 8:41 AM EST
Arbaco, August 14, 2013 (HOL) — Ugu yaraan 10-qof oo taageerayaashii Maxamed Mursi ka mid ah ayaa ku dhintay, 98 kalena dhaawacyo kala duwan aya akasoo gaaray iskahorimaad maanta bartamaha Qaahira ku dhexmaray ciidamada ammaanka iyo taageerayaasha madaxweynihii talada laga tuuray ee dalka Masar.

8/14/2013 8:02 AM EST
Arbaco, August 14, 2013 (HOL) — Dab khasaare hantiyeed geystay ayaa ka kacay saakay 9:00 aroornimo dhismayaal shidaalka lagu iibiyo oo ku yaalla isgoyska Baar Ubax ee magaalada Muqdisho, iyadoo aysan jirin wax khasaare nafeed ah oo ka dhashay.

8/14/2013 4:46 AM EST
Arbaco, August 14, 2013 (HOL) — Hay’adda dhaqaatiirta aan xuduuda lahayn ee MSF ayaa shaacisay in ay joojin doonto howlihii ay ka heysay Soomaaliya, iyadoona arintaasi lagu wargeliyay shaqaalaha hay’adda eek u kala sugan gobollada dalka Soomaaliya.

8/14/2013 2:32 AM EST
Arbaco, August 14, 2013 (HOL) — Wasiirka cadaaladda iyo garooska Soomaaliya, C/llaahi Abyan Nuur ayaa ka dhawaajiyay in dowladda Somalia ay billowday qorshayaal hubka looga qaadayo dadka shacabka ah.