3/28/2024
Today from Hiiraan Online:  _
Wararka Maanta- Arbaco, Aug 14, 2013
Hay’adda MSF oo si rasmi ah ugu dhawaaqday Maanta inay joojisay howlihii caafimaad ee ay ka haysay Soomaaliya


Arbaco, August 14, 2013 (HOL) — Hay’adda dhakhaatiirta aan xuduudda lahay ee MSF ayaa ku dhawaaqday maanta oo Arbaco ah inay joojisay gabi ahaan howlihii caafimaad ee ay haysay gudaha Soomaaliya, kaddib markii ay sheegtay in xaaladda ammaan ay sii xumaanayso.

“Howlihii caafimaad ee aan ka haynay Soomaaliya waan joojinnay, waana natiijo ka dhalatay weerarro lala beegsaday qaar ka mid ah shaqaalaheenna. Innagoo u dulqaadannay dhibaatooyin isugu jira dil, afduub iyo hanjabaadyo loo geystay shaqaalaheenna caafimaadka,” ayuu yiri madaxweynaha MSF, Unni Karunakara oo warbaahinta kula hadlay Nairobi.

Go’aanka ay MSF uga baxayso guud ahaan Soomaaliya ayaa noqonaya kii ugu horreeyay tan iyo markii ay howlaha caafimaad ka billabeen gudaha dalka Soomaaliya, mana jirto wax hadal ah oo ay dowladda Soomaaliya ka soo saartay arrintan.

“Waan soo gabagabeynaynaa howlaheenna caafimaad ee Soomaaliya, waayo waxaa kuusoo kordhaysa khatarta dhinaca amniga ah, mana awoodno inaan ka shaqeyno goob lagu beegsanayo shaqaalaha samafalka,” ayuu Karunakara ku daray hadalkiisa.

Isagoo sharraxayay dhibaatooyinka shaqaalahooda loogu geystay Somalia ayuu wuxuu kasoo qaatay, dilkii laba shaqaalahooda ka mid ah oo ajnabi ah loogu geystay Muqdisho bishii December 2011 iyo laba hablood oo u Spain u dheshay oo dhawaan lasii daayay, kuwaasoo laga afduubay xeryaha qoxootiga Dhadhaab ee dalka Kenya bishii Oktoobar 2012.

Sidoo kale, Karunakara wuxuu sheegay in xarumaha ay xirayaan ay yihiin 11 xarumood oo ku yaalla guud ahaan Soomaaliya oo ay ku jiraan Muqdisho iyo Kismaayo, kuwaasoo ay daweyne u soo doontaan boqolaal kun oo bukaanno soomaaliyeed ah.

“Dableyda hubeysan waxay beegsanayaan shaqaalaha gargaarka, cuqaasha deegaannaduna waxba kama qabtaan dhibaatooyinkaas shaqaalaheenna loo geysanayo. Tani waa mid saameyn xooggan ku yeelan doonta gargaarkii aan siin jirnay shacabka Soomaaliyeed,” ayuu hadalkiisa ku daray madaxa guud ee MSF.

Sannadkii lasoo dhaafay shaqaalaha hay’adda MSF oo tiradoodu gaarayso 1,500 ruux ayaa waxay gargaar caafimaad u qaybiyeen 624,000 bukaan oo Soomaali ah, iyadoo isbitaallada hay’addu ay ku leedahay Somalia la dhigay 41,000 oo ah bukaanno xanuuno kala duwan qabay.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/14/2013 1:21 PM EST
Arbaco, August 14, 2013 (HOL) — Dowladda KMG ah ee dalka Masar ayaa xukun deg-deg ah gelisay dalkaas gellinkii dambe ee maanta, kaddib markii Arbacada maanta ah ay dhaceen dalkaas rabshado dhaliyay khasaare soo gaaray dad isugu jira shacab iyo askar.

8/14/2013 1:02 PM EST
Arbaco, August 14, 2013 (HOL) — Ciidamadda Booliska Somaliland, ayaa maanta hawlgal balaadhan oo ay ku baadhayeen gaadiidka iyo dadka la socdaba ka bilaabay magaaladda Hargeysa.

8/14/2013 12:52 PM EST
Arbaco, August 14, 2013 (HOL) — Ugu yaraan saddex qof oo mid ay ahayd haweeney ayaa ku dhintay, toddoba kalena way ku dhaawacmeen markii ay ciidammo ka tirsan kuwa dowladdu maanta ku fureen rasaas dad shacab ah oo kasoo horjeestay inay ka guuraan dhul uu leeyahay milateriga dowladda Soomaaliya oo horay loogu wargeliyay inay ka guuraan.

8/14/2013 12:32 PM EST
Arbaco, August 14, 2013 (HOL) — Xoogag taabacsan Xarakada Al-shabaab ayaa Arbacada maanta ah gellinkii dambe la wareegay isbitaalka degmada Diinsoor ee gobolka Bay oo ay gacanta ku haysay hay’adda MSF Swiss, iyagoo ka qaatay qalabkii halkaas yaallay.

8/14/2013 9:28 AM EST
Arbaco, August 14, 2013 (HOL) — Ciidamada ammaanka ee Puntland ayaa kantaroolka magaalada Boosaaso ee xarunta gobolka Bari ku qabtay lacag been abuur ah oo kor u dhaafeysa boqol milyan oo Shilinka Soomaaliga ah.

8/14/2013 8:41 AM EST
Arbaco, August 14, 2013 (HOL) — Ugu yaraan 10-qof oo taageerayaashii Maxamed Mursi ka mid ah ayaa ku dhintay, 98 kalena dhaawacyo kala duwan aya akasoo gaaray iskahorimaad maanta bartamaha Qaahira ku dhexmaray ciidamada ammaanka iyo taageerayaasha madaxweynihii talada laga tuuray ee dalka Masar.

8/14/2013 8:02 AM EST
Arbaco, August 14, 2013 (HOL) — Dab khasaare hantiyeed geystay ayaa ka kacay saakay 9:00 aroornimo dhismayaal shidaalka lagu iibiyo oo ku yaalla isgoyska Baar Ubax ee magaalada Muqdisho, iyadoo aysan jirin wax khasaare nafeed ah oo ka dhashay.

8/14/2013 4:46 AM EST
Arbaco, August 14, 2013 (HOL) — Hay’adda dhaqaatiirta aan xuduuda lahayn ee MSF ayaa shaacisay in ay joojin doonto howlihii ay ka heysay Soomaaliya, iyadoona arintaasi lagu wargeliyay shaqaalaha hay’adda eek u kala sugan gobollada dalka Soomaaliya.

8/14/2013 2:32 AM EST
Arbaco, August 14, 2013 (HOL) — Wasiirka cadaaladda iyo garooska Soomaaliya, C/llaahi Abyan Nuur ayaa ka dhawaajiyay in dowladda Somalia ay billowday qorshayaal hubka looga qaadayo dadka shacabka ah.