3/29/2024
Today from Hiiraan Online:  _
Wararka Maanta- Arbaco, Apr 3 , 2013
SIILAANYO: “Maanta Dunida waxaynu u Dhoofinaa Xoolo nool, Balse waxaynu kari karnaa inaynu dhoofinno Kalluunka”


Arbaco, Abriil 03, 2013 (HOL) — Madaxwaynaha Somaliland, Axmed Maxamed Maxamuud (Siilaanyo), ayaa maanta dhagax dhigay dhismayaal cusub oo kala duwan oo laga hirgalinayo degmada Axmed dhagax ee Magaalada Hargeysa.

Madaxwaynuhu dhismayaasha uu dhagax dhigay waxa ka mid ah saddex sariimadood, saldhig boolis, dugsi waxbarasho iyo masaajid laga hirgaliyey xaafadda Axmed Dhagax, waxaana dhamaan kharashkeedda bixiyey xukuumadda Somaliland.

Sidoo kale, Madaxweynuhu waxa kale oo uu xadhiga ka jaray dhisme weyn oo ay dhisatay wasaaradda Kalluumaysiga iyo khayraadka Badda oo iyana laga hirgaliyey xaafaddaasi, waxaana munaasibadda xadhiga lagaga jarayey ka soo qaybgalay wasiirro, xildhibaano, madax dhaqameed iyo marti sharaf kale oo badan.

“Marka laga yimaado wasaaradda Maaliyadda iyo ganacsiga, waxay wasaaradda Kalluumaysigu noqotay  sanadkii labaad wasaaradda ugu dakhliga badan wasaaradaha ”ayuu yidhi wasiirka Kalluumaysiga iyo khayraadka badda Cabdilaahi Jaamac Cismaan (Geel jire), waxaanu intaas ku daray “ Badeenu waxa ay u baahan tahay ilaalin, wadanka Yeman waxa uu noqday wadanka koowaad ee caalamka kaluunka iib geeya, waxa uu tuhun wayni naga haystaa in dalkaasi uu xado kaluunkeena, waxa aan soo jeedinaynaa hay’adaha aanu xidhiidhka wanaagsan leenahay in ay nagala shaqeeyaan sidii ay noola ilaalin lahaayeen baddaheena”.

Madaxweynaha Somaliland Axmed Maxamed Siillaanyo, ayaa sheegay in loo baahan yahay in laga faa’iidaysto khayraadka ka buuxda badda iyo kalluunka, isla markaana dadweynaha la baro sida looga manaafacaadsado khayraadka Badda.

“Kalluunku wuxuu ka mid yahay nimcooyin uu alle inagu manaystay, maanta dunida waxa aynu u dhoofinaa xoolo nool, laakiin haddii aynu soo jeedsano waxa aynu kari  karnaa in aynu dunida u dhoofino, waxa aynu u baahanahay in aynu kalluunka  cilmigiisa iyo aqoontiisa aynu barano”ayuu yidhi madaxweyne Siillaanyo.

“Aad baan ugu hambalyaynayaa wasiirka iyo wasaaradiisaba dhismahan quruxda badan, markaa waxa aan u soo jeedinayaa in aynu kaluunka ka dhigno meel caalamka looga dhoofiyo”ayuu raaciyey hadalkiisa.

Dhinaca kale, madaxweyne ku xigeenka Somaliland, Mudane C/raxmaan Cabdilaahi Ismaaciil Saylici), ayaa isna Hay’adda IFAD, kala wareegay 15 gaadhi oo ay ugu deeqday Wasaaradaha Beeraha, Caafmaadka iyo Xanaanada xoolaha, kuwaasi oo loogu tallo-galay inay fududeeyaan hawlahooda shaqo ee ay qaranka u hayaan.

Gaadiidkan ayaa iskugu jiray TOYOTA Landcruser iyo Ambulance, waxa wasaaradda Beeraha loogu deeqay lix gaadhi, halka Wasaarada caafimaadka laga guddoonsiiyay 5 ambalaas iyo afar gaadhi oo la siiyay Wasaarada Xanaanada xoolaha Somaliland.

“Maanta waa la helayaa gawaadhida iyo wax kasta, laakiin waa in aynu ilaashanaa, maadaama oo ay jirto inaynaan ilaashan qalabka qaarkood oo ay dad masuul aan ahayn inta aynu u dhiibno ay iska kaxaystaan oo gawaadhidaasi burburaan oo aan la daryeelin, laakiin waa in aynu ilaashanaa”ayuu yidhi madaxweyne ku xigeenku C/raxmaan Saylici oo ka qaybgalay kala gudoonka gaadiid loogu deeqay wasaaradaha qaarkood.








Barkhad-Ladiif  M. Cumar, Hiiraan Online
[email protected]
Hargeysa, Somaliland













Click here
4/3/2013 1:02 PM EST
Arbaco, Abriil 03, 2013 (HOL) — Dowladda Puntland ayaa maanta soo saartay amar shaqada looga joojinayo saddex idaacadood oo kamid ah kuwa ugu ballaaran war-baahinta maxalliga ah e ka howlgala gudaha deegaanada Puntland.

4/3/2013 12:46 PM EST
Arbaco, Abriil 03, 2013 (HOL) — Saraakiisha howgalka Midowga Afrika ee AMISOM ayaa soo dhaweeyay maanta qaybtii ugu horreysay ciidammo ka socda dalka Sierra Leone oo soo gaaray Muqdisho, sida lagu sheegay war-saxaafadeed ay soo saartay AMISOM.

4/3/2013 12:32 PM EST
Arbaco, Abriil 03, 2013 (HOL) — Ra'iisul wasaaraha Soomaaliya, Cabdi Faarax Shirdoon (Saacid) oo maanta safarkiisii ugu horreeyay uga ambabaxay Muqdisho ayaa gaaray magaalada Jabuuti ee dalka Jabuuti.

4/3/2013 9:51 AM EST
Arbaco, 03 April, 2013 (HOL) :- Ku dhawaad ilaa 44 Xildhibaan oo ka tirsan golaha baarlamanka Soomaaliya ayaa maanta kasoo dagay garoonka caalamiga ah ee magaalada Kismaayo iyadoona ay halkaasi si diiran ugu soo dhaweeyeen masuuliyiinta maamulka KMG ee Kismaayo.

4/3/2013 9:07 AM EST
Arbaco, Abriil 03, 2013 (HOL) — Shirweynaha Qaran ee looga tashanayo dib u habeynta garsoorka Soomaaliya oo maanta galay maalintiisii saddexaad ayaa diiradda lagu saaray qodobbo ay ka mid yihiin qaab-dhismeedka dastuurka iyo sida uu ula shaqeeyo garsoorka, xeerarka iyo nidaamyadii sharci ee uu dalku lahaan jiray dagaallada ka hor.

4/3/2013 8:46 AM EST
Arbaco, Abriil 03, 2013 (HOL) — Ururka Hormarinta dhalinyarrada gobollka Hiiraan [Hiiraan Youth Development Association] ayaa bilihii ugu danbeeyayba ku howlanaa dib soo nooleynta goobihii danta guud, ayaa hadda billaabay in uu dib u dhis ama dayactir ku sameeyo goobihii taariikhiga ee ku bur buray dagaalladii ka dhacay dalka.

4/3/2013 8:43 AM EST
Arbaco, Abriil 03, 2013 (HOL) —Madaxweynaha Somaliland Mudane, Axmed Maxamed Maxamuud Sillaayo, ayaa maanta ka qaybgalay aas qaran oo loo sameeyey gudoomiye ku xigeenkii kowaad ee golaha Guurtidda Sheekh Axmed Sheekh Nuux Fure oo xalay ku geeriyooday magaaladda Hargeysa.

4/3/2013 8:23 AM EST
Arbaco, Abriil 03, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari), xildhibaanno, suxufiyiin, shacab iyo mas’uliyiin kale ayaa ka qaybgalay munaasabad loogu dabbaal-degayay sannadguuradii koowaad ee kasoo wareegtay aasaaskii Radio Dalsan oo ka mid ah idaacadaha ka howglala Muqdisho, taasoo lagu qabtay Muqdisho shalay oo Salaaso ahayd.

4/3/2013 6:11 AM EST
Arbaco, Abriil 03, 2013 (HOL) — Col. Xasan Maxamed Nuur Shaati-guduud oo ka mid ahaa hoggaamiye kooxeedyadii Soomaaliya, soona qabtay xilal wasiirnimo kana mid noqday baarlamaannadii Soomaaliya ayaa xalay ugu geeriyooday xanuun awgiis dalka Jarmalka.

4/3/2013 1:51 AM EST
Arbaco, Abriil 03, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa safarkiisii ugu horreeyay ee uu dibadda dalka ugu ambabaxo wuxuu maanta ku aaday dalalka ay ciidamadu ka joogaan Soomaaliya.

4/3/2013 1:49 AM EST
Arbaco, Abriil 03, 2013 (HOL) — Xildhibaanno ka tirsan baarlamaanka Soomaaliya ayaa lagu wadaa inay maanta tagaan degmada Kismaayo ee gobolka Jubbada Hoose si ay dhexdhexaadin uga dhex-billaabaan dowladda iyo maamulka KMG ah ee Kismaayo oo isku fahmi waayay maamul u sameynta gobollada Jubbooyinka.

4/3/2013 1:48 AM EST
Arbaco, Abriil 03, 2013 (HOL) — Ugu yaraan laba qof ayaa ku dhintay sagaal kalena way ku dhaawacmeen qaraxyo kala duwan oo xalay fiidkii ka dhacay magaalada Muqdisho ee xarunta Soomaaliya; kuwaasoo mid ka mid lala beegsaday xarunta dhexe ee shirkadda Dahabshiil ay ku leedahay magaalada Muqdisho.

4/3/2013 1:47 AM EST
Arbaco, Abriil 03, 2013 (HOL) — Madaxwenaha maamulka Khaatumo, Maxamed Yuusuf Jaamac "Indhasheel" ayaa dhagax dhigay dhisme laga billaabay garoonka degmada Taleex oo xarun KMG ah u ah maamulkaas.