9/24/2022
Today from Hiiraan Online:  _
Wararka Maanta- Talaado, May 7 , 2013
Shirka London ee looga Hadlayo Arrimaha Somalia oo Saacadaha soo socda si rasmi ah uga Furmaya Magaalada London

Talaado, May 07, 2013 (HOL) — Shirka London oo looga hadlayo arrimaha Soomaaiya ayaa lagu wadaa inuu saacadaha soo socda uu si rasmi ah uga furmo magaalada London ee xarunta Britain, iyadoo haatan ay wafuudda shirka ka qaybgalaysa ku sugan yihiin goobta loogu talogalay inuu ka dhaco.

Kulankan oo ah kii labaad oo Soomaaliya loogu qabto London ayaa la filayaa inuu si weyn uga duwanaado shirkii ka horreeyay oo horraatii 2012 lagu qabtay isla London, kaasoo lagu dhiirrigelinayya madaxdii dowladdii KMG ahayd ee Soomaaliya, balse looga hadli doono sidii Soomaaliya lagu caawin lahaa.

Madaxweynaha Soomaaliya, Xasan Sheekh Maxamuud iyo ra’iisul wasaaraha Britain, David Cameron ayaa shirkaan wada-guddooomin doona, iyadoo war ay siiyeen warbaahinta labadoodu ku sheegay inay rajeynayaan in shirkaan uu noqdo mid guuleysta.

Qodobbada shirka looga hadlayo ayaa waxaa ugu muhiimsan, ammaanka, dib u habeynta dhaqalaaha, cadaaaladda iyo xuquuqda aadanaha, iyadoo lagu wado in marka uu shirku furmo uu Xasan Sheekh soo hordhig xubnaha shirka ka qaybgalaya waxyaabaha ay doonayaan in laga caawiyo.

Xubnaha shirka ka qaybgalaya ayaa waxaa ka mid ah madaxweynaha cusub ee Kenya, Uhuru Kenyatta, madaxweynaha Jabuuti, Ismaaciil Cumar Geelle iyo ra’iisul wasaaraha Itoobiya, Hailemariam Desaliegn oo dhammaantood ay Soomaaliya ka joogaan ciidammo ka caainaya dowladda sidii ay ammaanka u soo celin lahayd.

Guddiyo ka kooban Soomaali iyo Ingiriis ayaa xalay oo dhan ku howlanaa sidii ay uga shaqeyn lahaayeen qaabka uu shirku u dhacayo sida ay u kala hormarayaan qodobbada laga hadlayo, iyadoo furitaanka shirka khudbado kala duwan laga jeedin doono.

Dadweynaha Soomaaliyeed ayaa aragtiyo kala duwan ka bixinaya shirkan iyadoo qaarkood ay ku tilmaameen mid guul u ah Soomaaliya, halka kuwo kalena ay ku tilmaameen mid aan ka duwanayn kuwii ka horreeay ee loo qatay Soomaaliya.

Shirka oo socon doona maanta oo keliya, ayaa waxaa lagu wadaa in dalalka kasoo qaybgalaya ay ku yaboohaan dhaqaale lagu caawinayo Soomaaliya, gaar ahaan dhinacyada ammaanka, cadaaladda, xuquuqda aadanaha iyo dib u habeynta dhaqaalaha dalka.

Maxamed Xaaji Xuseen., Hiiraan Online
[email protected]
Muqdisho, Soomaaliya













Click here
5/7/2013 2:51 PM EST
Talaado, May 07, 2013 (HOL) — Shirkii dib u dhiska Soomaaliya ee maanta lagu qabtay magaalada London ayaa waxaa dalalkii kasoo qaybgalay ay ugu yabooheen Soomaaliya boqolaal milyan oo doollarka Mareykanka ah si wax looga qabto ammaanka dib u habeynna loogu sameeyo garsoorka iyo maaliyadda.

5/7/2013 12:31 PM EST
Talaado, May 07, 2013 (HOL) — Madaxweynaha Somaliland, Axmed Maxamed Maxamuud Siillaanyo ayaa ka hadlay geerida afar qof oo daad uu ku qaaday dooxa Dacar-buluq ee u dhexeeya magaalooyinka Hargeysa iyo Berbera, isagoo tacsi u diray ehellada iyo qoysaskii afartaas marxuum.

5/7/2013 11:46 AM EST
Talaado, May 07, 2013 (HOL) — Ra’iisul wasaaraha Somalia, Cabdi Faarax Shirdoon (Saacid) iyo xubno ka tirsan golihiisa wasiiradda, xildhibaanno, guddoomiyeyaasha degmooyinka gobolka Banaadir, saraakiisha ciidanka, fanaaniin iyo marti sharaf kala duwan ayaa maanta ka qayb-galay dibad-bax lagu taageerayo shirka London oo ka dhacay Muqdisho.

5/7/2013 10:38 AM EST
Talaado, May 07, 2013 (HOL) — Waxaa lasoo gabgabeeyay shirkii London ee looga hadlayay horumarinta Soomaaliya, waxaana lagu wadaa in goor-dhow ay madaxweynaha Soomaaliya, Xasan Sheekh iyo ra’iisul wasaaraha Britain, David Cameron ay saxaafadda u soo bandhigaan warmutiyeedkii shirka kasoo baxay.

5/7/2013 7:44 AM EST
Halkaan ka daawo sawiro laga soo qaaday shirka maanta ka furmay magaalada London ee dalka Britain.

5/7/2013 6:02 AM EST
Talaado, May 07, 2013 (HOL) — Aqalka Lancaster ee magaalada London ee dalka Britain waxaa si rasmi ah uga furmay shirkii looga hadlayay horumarinta Soomaaliya; kaasoo ay kasoo qayb-galeen xubno ka socda illaa 58 dowladood iyo hay’ado caalami ah oo ay ka mid yihiin Midowga Afrika iyo Qaramada Midoobay.

5/7/2013 4:45 AM EST
Talaado, May 07, 2013 (HOL) — Madaxweynaha Soomaaliya, Xasan Sheekh Maxamuud oo ku sugan London ayaa u sheegay wargeys kasoo baxa London oo lagu magacaabo Financial Times ayaa sheegay inay u baahan tahay Soomaaliya qorshe la mid ah kii dib loogu habeeyay Yurub ee Marshall Plan-ka loo yaqaan, si ay uga baxdo faqriga, colaadaha sokeeye iyo argagaxisada.

5/7/2013 4:42 AM EST
Talaado, May 07, 2013 (HOL) — Koox dabley ah ayaa xalay fiidkii weerar gaadmo ah ku qaaday saldhigga booliska Miir oo ku yaal xaafadda Horumar ee waqooyiga magaalada Gaalkacyo ee xarunta Gobolka Mudug.

5/7/2013 4:11 AM EST
Talaado, May 07, 2013 (HOL) — Maamulka gobolka Bay iyo Al-shabaab ayaa guulo ka kala sheegtay dagaal shalay ku dhexmaray duleedka degmada Qansax-dheere ee gobolka Bay, dagaalkaas oo la sheegayo inay ku dhinteen lix qof oo dhinacyadii dagaalamay ka tirsan.

5/7/2013 3:44 AM EST
Talaado, May 07, 2013 (HOL) — Ciidanka Booliska Somaliland ayaa Isniintii shalay baaritaan xoogan ku sameeyey guriga ay ku nooshahay hooyada dhashay amiirka Xarakada Al shabaab, Axmed Cabdi Godane oo loo yaqaan Sheekh Mukhtaar C/raxmaan Abuu-Zubeyr oo Hargeysa ku yaalla, iyagoo ku xiray howlgalkaas laba nin oo ay Cabdi Godane walaalo ahaayeen.

5/7/2013 3:36 AM EST
Talaado, May 07, 2013 (HOL) —Maxkamadda degmadda Gabiley ayaa loo soo gudbiyey dacwad xasaasiyad dhalisay oo la xidhiidha xayaawaano dad shacab ahi isku haystaan, haseyeeshee arrintii murugtay ka dib markii wasaaradda Deeganka Somaliland oo loo dhiibay ay maxkamaddii u sheegtay in xayawaankii dhinteen.