10/1/2022
Today from Hiiraan Online:  _
Wararka Maanta- Axad, May 5 , 2013
Al-shabaab oo Sheegtay Mas’uuliyadda Weerarkii Ismiidaaminta ahaa ee ka dhacay Muqdisho kuna hanjabtay Qaraxyo kale

Axad, May 05, 2013 (HOL) — Xarakada Al-shabaab ayaa sheegtay inay ka dambeysay weerarkii ismiidaaminta ahaa ee ka dhacay Isgoyska KM-4 ee magaalada Muqdisho, iyagoo ku hanjabay inay weerarro kale oo cusub ka gysan doonaan caasimadda Soomaaliya.

Afhayeenka howgallada ee Al-shabaab ayaa sheegay in weerarkii Muqdisho uu ahaa mid ay ku beegsanayeen wasiirka arrimaha gudaha iyo ammaanka Qaranka dowaldda Soomnaaliya, ayna ka go’an tahay inay beegsadaan mid walba oo ka madaxda dowladda.

“Weerarro kale ayaa waddada kusoo jira,” ayuu yiri Abuu-Muscab oo intaas ku daray in weerarkii maanta ay ka gaareen ujeeddadii ay ka lahaayeen, balse ma sheegin khasaare ay ku geysteen.

Al-shabaab ayaa waxay muddo sannado ah dagaal kula jirtay dowladda Soomaaliya si ay xukunka uga tuurto, waxayna dowladda ku tilmaamaan in ay mid taageerada ugu badan ka hesha reer galbeedka oo ay u fuliso danahooda.

“Innaga ayaa ka dambeynay weerarkii maanta, waxaana la beegsannay gaari uu lahaa wasiirka arrimaha gudaha oo ahaa kuwa aysan xabbaduhu karin,” ayuu yiri Abuu-Muscab, iyadoo wasiirka oo hadlay uu sheegay inuusan la socon gaariga la weeraray.

Weerarkan ayaa wuxuu kusoo beegmayaa iyadoo ha’yadaha ammaanka ee dowaldda Soomaaliya ay muddo afar casho xireen jidadka Muqdihso iyagoo sheegay inay heleen farriimo sheegaya inay Al-shabaab doonayso inay ka geysato caasimadda qaraxyo.

Ma ahan markii ugu horreysay oo ay Al-shabaab sheegato inay mas’uul ka ahayd qaraxyo ismiidaamin ah oo Muqdisho ka dhacay, kuwaasoo sababay khasaarooyin fara badan oo intooda soo gaaray dad shacab ah.

Hoggaamiyaha guud ee Al-shabaab ayaa ku boorriyay dagaalayahannada kooxda inay xoojiyaan weerarrada ka dhanka ah dowladda oo ay ka mid yihiin kuwa is-qarxinta ah, isagoo ku dhiirrigeliyay inaysan ka baqin tirada ciidamada ay dagaalka kula jiraan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/5/2013 1:25 PM EST
Axad, May 05, 2013 (HOL) — Shir ay yeesheen saraakiishii hore ee RRA oo dib loogu soo nooleynayay jabhaddan ayaa muddo toddobaad ah ka socday duleedka magaalada Baydhabo ee xarunta gobolka Bay, iyadoo shirakas looga hadlay arrimo fara badan.

5/5/2013 1:12 PM EST
Axad, May 05, 2013 (HOL) — Deeq lacageed oo ka badan 3,000 oo doolarka Maraykanka ah ayaa la gaarsiiyey qoysas danab ama biriqi ay dhawaan ku waxyeellaysay duleedka magaalada Laascaanood ee xarunta Gobolka Sool.

5/5/2013 12:09 PM EST
Axad, May 05, 2013 (HOL) — Xarunta madaxtooyada Soomaaliya ayaa lagu dhaariyay maanta taliyaha cusub ee hay’adda nabadsugidda Qaranka iyo taliyaha cusub ee ciidanka Booliiska Soomaaliya, waxaana dhaarinta goob-joog ka ahaa madaxweynaha Soomaaliya, Xasan Sheekh Maxamuud.

5/5/2013 11:49 AM EST
Axad, May 05, 2013 (HOL) — Madaxweynaha dalka Jabuuti, Ismaaciil Cumar Geelle iyo wafdi heer sare ah oo uu hoggaaminayo ayaa ka qaybgalay shirka Soomaaliya loogu qabanayo magaalada London ee xarunta Britain oo lagu wado inuu furmo maalinta Talaadada ah ee soo socota.

5/5/2013 9:30 AM EST
Xaflad lagu soo bandhigay buug cusub oo ay qortay Dahabo Cumar Maxamed oo ahaan jirtay dublamaasiyad kasoo shaqaysay xiriirka dibadda ee Soomaaliya xilligii dawladii kacaanka, gaar ahaanna safaaradihii ay Soomaaliya ku lahayd qaar kamid wadamada afrika ayaa lagu qabtay magaalada Nairobi, ee xarunta dalka Kenya.

5/5/2013 9:03 AM EST
Axad, May 05, 2013 (HOL) — Madaxweynaha Soomaaliya, Xasan Sheekh Maxmauud oo dadweyne fara badan kula hadlayay degmada Dayniile ee gobolka Banaadir ayaa sheegay in dowladda Soomaaliya oo kaashanaysa shacabigeed ay fashilisay qorshayaal badan oo Al-shabaab ay doonaysay inay ka fuliso Muqdisho.

5/5/2013 8:31 AM EST
Axad, May 05, 2013 (HOL) — Madaxweynaha Somaliland iyo Weftigiisi oo dalka dib ugu soo laabtay, ayaa sheegay inay guul u ahayd safarkan uu dhawrka todobaad ku tagay dalal badan oo caalamka, isla markaana ka soo dhaadhiciyey qadiyada madax bananidda Somaliland.

5/5/2013 4:29 AM EST
Axad, May 05, 2013 (HOL) — Ugu yaraan 12-qof oo uu ku jiro qofkii qaraxa fuliyay, askari ka tirsan ciidamada nabadsugidda Qaranka, haweeney iyo cunug yar oo ay wadatay ayaa ku dhintay qarax is-miidaamin ah oo maanta ka dhacay Isgoyska KM-4 ee magaalada Muqdisho, sidoo kale 25-qof ayaa ku dhaawacmay weerarkaas.

5/5/2013 1:38 AM EST
Axad, May 05, 2013 (HOL) — Madaxweynaha Soomaaliya, Xasan Sheekh Maxamuud iyo iyo wafdi uu hoggaaminayo ayaa lagu wadaa inay u dhoofaan maanta magaalada London ee dalka Britain halkaasoo uu ka furmi doono shir looga hadlayo Soomaaliya maalinta Salaasadaha ah ee soo socota.

5/5/2013 1:23 AM EST
Axad, May 05, 2013 (HOL) — Hoggaamiyaha guud ee Al-shabaab, Sheekh Mukhtaar C/raxmaan Abuu-Zubeyr ayaa warbixin maqal ah oo uu soo saaray kaga hadlay dhowr arrimood oo ay ka mid yihiin, weerarkii Muqdisho ee lala beegsaday maxkamadda, dastuurka, howgallada ka socda dalka, dastuurka iyo shirka London.