3/28/2024
Today from Hiiraan Online:  _
Wararka Maanta- Isniin, Mar 25, 2013
Danjire Somalia ee dalka Koonfur Afrika oo Casuumay Siyaasiyiin Soomaali ah oo ku Tababaranaya Dalkaas (SAWIRRO)


Isniin, Maarso 25, 2013 (HOL) —
Safaaradda Soomaaliya ee dalka Koonfur Afrika ayaa casuumaad ugu sameysay gudaha dhismaha Safaaradda dublamaasiyiinta ka tirsan wasaaradda arrimaha dibadda iyo iskaashiga caalamiga ee Soomaaliya oo ku tababaranaya dugsiga sare ee akadeemiyada dublamaasiyadda ee wasaaradda xiriirka caalamiga iyo iskaashiga ee Koonfur Afrika.

Dhismaha safaaradda oo ku yaalla xaafadda Hatfield ee Pretoria oo ay ku badan yihiin dhismayaasha safaaradaha caalamka ay ku leeyihiin Koonfur Afrika ayaa lagu diyaariyay maqaaxida u gaarka ah cunto dhaqameedka ay Soomaaliya caan ku tahay sida canbuulo-galleey, bun, mashmash, i-cun i calaaji, shushumow, sambuus, xalwo, kac-kac, qaxwo, daan-gawiis iyo moos Soomaali. Waxaa kaloo halkaasi ka muuqday qalabka hiddaha iyo dhaqanka oo ay ka mid ahaayeen koor, tusbax, qulo, barkin qori iyo qudde , iyadoo halkaas dublamaasiyiintu ka quraacdeen, halka qadada ay ka cunteeyeen coloseum hoteel.

Safiirka Soomaaliya ee Koonfur Afrika, danjire Sayid Xasan Shariif Cabdullaahi oo madasha casuumadda oo ay goob-joog ka ahaayeen qaar ka mid ah ganacsatada Soomaaliyeed hadal ka jeediyay ayaa bogaadiyay hab-dhaqanka sharfan ee dublamaasiyiinta tababaranaya oo uu ku tilmaamay kuwa sare u qaaday haybadda, sharafta iyo isku xirnaanta Soomaalida.

"Waxaad tusaale wanaagsan u noqoteen ummadda Soomaaliyeed, waxaadna guul u tihiin howsha bilowga leh ee tababarka oo ay soo abaabushay safaaradeenna cusub, waxaan rajeynayaa in tababar kan ka duwan oo lagu tayeynayo aqoonta iyo xirfadaha howl-wadeennada kala duwan ee ka kala tirsan xafiisyada madaxweynaha, ra'iisul wasaaraha iyo gudoomiyaha baarlamaanka iyo lagu qabto halkan, waxaad tihiin iftiin mustaqbal leh oo Soomaaliya u soo baxay, waxaad inoo soo jiideen wanaag iyo sumcad," ayuu hadalkiisa ku yiri danjiraha.

Waxaa lagu wadaa in 28-ka bishan lasoo af-jaro tababarka heerkiisu sarreeyo oo uu u socdo 21 dublamaasi Soomaaliyeed ah oo muddo sannado ah ka shaqeynayay wasaaradda arrimaha dibadda iyo iskaashiga caalamiga ah ee Soomaaliay, waxaana tababarkan uu qayb ka yahay tababarro wasaaradda ay ku horumarinayso habka shaqo ee shaqaalaheeda kala duwan. 











Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/25/2013 2:39 PM EST
Isniin, Maarso 25, 2013 (HOL) — Taliyaha ciidamada Booliska Somaliland Sareeyo guute, Cabdilaahi Fadal Iimaan, ayaa sheegay in sharciga la marinayo saddex askari oo loo qabtay dilka wiil dhalinyaro ah oo dhowaan lagu dilay magaaladda Hargeysa.

3/25/2013 1:25 PM EST
Isniin, Maarso 25, 2013 (HOL) — Arday wax ku baranaysay dugsi ood ka sameysan oo ku yaalla deegaanka Manaas ayaa la fasaxay kaddib markii roobab mahiigaan ah ay waxyeello u geysteen dugsigooda, waxana ay ka cawdeen macallimiinta gusigaas inaysan helin kaalmooyin ay dugsiga ku dhisaan.

3/25/2013 12:42 PM EST
Isniin, Maarso 25, 2013 (HOL) — Wasiirka gaashaandhigga Soomaaliya, Cabdixakiin Maxamuud Xaaji Fiqi ayaa galabta booqday xerooyin ciidan oo ku yaalla magaalada Kismaayo ee xarunta gobolka Jubbada Hoose, waxaana kormeerkiisan ku wehliyay sarkaalka ugu sareeya ciidammada Kenya ee qeybta ka ah AMISOM iyo saraakiisha ugu sarreysa ciidammada Xoogga dalka ee Kismaayo ku sugan.

3/25/2013 10:09 AM EST
Maxkamada sare ee dalka Kenya ayaa maantay ka fariisatay go'aan ka gaarista murankii ka dhashay doorashadii dalka ka dhacday 4-tii bishii March ee lasoo dhaafay.

3/25/2013 9:36 AM EST
Isniin, Maarso 25, 2013 (HOL) — Iyadoo sii kordhayaan tirada dadka uu soo ridanayo cudurka shuban biyoodka magaalada Baladweyne, ayaa haddana dhinaca kale waxaa socda gurmadka caafimaad ee loo sameynayo dadka la ildaran cudurka oo ku jira xarumo gaar ah oo laga sameeyay dulleedka magaalada Baladweyne.

3/25/2013 8:37 AM EST
Isniin, Maarso 25, 2013 (HOL) — Kaddib markii uu agaasimihii hay’adda nabadsugidda Qaranka, Axmed Macallin Fiqi uu ku dhawaaqay inuu xilkaas iska casilay maanta ayaa waxaa madaxweynuhu uu goor dhow agaasime KMG ah u magacaabay haya’adda, kaasoo magaciisa uu kusoo gaabiyay Cabdikariin.

3/25/2013 8:18 AM EST
Isniin, Maarso 25, 2013 (HOL) — Munaasabad lagu xusayay maalinta loo asteeyey la-dagaalanka cudurka Qaaxada (TB) ayaa shalay lagu qabtay isbitaalka guud magaalada Laascaanood ee gobolka Sool.

3/25/2013 8:08 AM EST
Isniin, Maarso 25, 2013 (HOL) — Guddoomiyaha baarlamaanka Soomaaliya, Prof. Maxamed Sh. Cismaan (Jawaari) ayaa maanta kula kulmay magaalada Baydhabo ee gobolka Bay saraakiisha ciidamada Itoobiya, waxgarad iyo xildhibaannadii halkaas horay ugu sugnaa.

3/25/2013 7:13 AM EST
Isniin, Maarso 25, 2013 (HOL) — Taliyihii hay’adda nabadsugidda Qaranka Soomaaliyeed, Axmed Macallin Fiqi ayaa ku dhawaaqay maanta inuu xilkiisii iska casilay, isagoo sheegay inuu go’aanka is casilaaddiisa uu yahay mid uu isagu gaaray.

3/25/2013 3:01 AM EST
Isniin, Maarso 25, 2013 (HOL) — Ra'iisul wasaaraha Soomaaliya, Cabdi Faarax Shirdoon (Saacid) iyo wafdi uu hoggaaminayo ayaa maanta oo Isniin ah ku wajahan magaalada Kismaayo ee xarunta gobolka Jubbada Hoose oo lagu wado inuu ka furmo shirka maamul u sameynta gobollada Jubbooyinka.

3/25/2013 2:45 AM EST
Isniin, Maarso 25, 2013 (HOL) — Kooxo hubeysan ayaa xalay ku dilay xaafadda Towfiiq ee degmada Yaaqshiid gabar wariye ahayd oo lagu magacaabi jiray, Raxmo Cabdulqaadir, iyadoo aan la ogeyn kooxaha dilkeeda ka dambeeya.