1/30/2023
Today from Hiiraan Online:  _
Wararka Maanta- Talaado, Mar 12, 2013
RA’IISUL WASAARE SAACID: “Ummaddu waxay doonaysaa in la dardar-geliyo Hirgalinta Nidaamka Federaaliga ah”


Talaado, Maarso 12, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) oo maanta soo gaba-gabeeyay kormeer saddex maalmood qaatay oo uu kusoo maray maamul-goboleedyada Puntland iyo Galmudug ayaa ku tilmaamay socdaalkiisa guul dhanka arrimaha gudaha iyo amniga laga gaaray.

“Safarka aanu kusoo kala bixinay gobollada dalka qaarkood iyo guulihii is-afgaradka lahaa ee aanu ka gaarnay waxay muujinayaan in shacabka Soomaaliyeed iyo madaxdooduba ay si buuxda ugu heellan yihiin sidii ay u wada shaqeyn lahaayeen,” ayuu yiri ra’iisul wasaare Saacid oo saxaafadda kula hadlay garoonka diyaaradaha Muqdisho.

Mudane Saacid ayaa socdaaladiisa gobollada ku tilmaamay kuwo muujinaya sida dawladdu diyaar ugu tahay inay shacabkeeda dhegeysato lana socoto xaaladahooda nololeed iyo dhaqan-dhaqaale.

“Dawladda Soomaaliya waxaa ka go’an inay dadkeeda dhegeysato, isla markaana ay u kuurgasho dhibaatooyinka haysta, rabitaankoodana ku shaqayso, xalkana halkaas ka raadiso,” ayuu hadalkiisa raaciyay, isagoo intaas ku daray inay qorshaha ugu jirto in booqashooyinkan lasii wado oo dowladdu booqato dhammaan gobollada Soomaaliyeed.

Ra’iisul wasaaraha ayaa sheegay in socdaalkiisii uu kusoo dhamaaday guul iyo is-afgarad dhan walba ah. Isagoo hadalkiisa raaciyay inay shacbiga iyo maamulladuba muujiyeen taageerada weyn ee ay u hayaan dawladda iyo sida ay diyaarka ugu yihiin in iskaashi buuxa oo dhan walba ah la yeesho.

“Ummaddu waxay doonaysaa in la dar-dar-galiyo hirgalinta nidaamka federaaliga ah, Iyadoo dastuurka lagu salaynayo. Waxayna soo dhaweeyeen cunno-qabatayntii la qaaday ee muddada dheer saarnayd Soomaaliya, iyagoo arka baahida loo qabo dhismaha ciidan qaran oo tayo leh,” ayuu yiri ra’iisul wasaaraha.

Ra’iisal Wasaaruhu wuxuu kaloo sheegay inuu jiro wal-wal laga qabo qiimo dhaca ku yimid doollarka iyo in dawladdu ka hawlgalayso sidii loo heli lahaa Shillin Somaali cusub. isagoo intaa ku daray in shacabku dalbadeen hab-canshuureed midaysan; ayna dawladdu dajisay sharciga jaangooyada cashuuraha dalka oo dhawaan lagu wado inuu dhaqan-galo.

“Wax badan baan uga qabanay saddex bilood balanqaadyadii dawladda, waxaana ballan-qaadaynaa inaan labo jibaari doonno dadaalka aan ugu jirno nabadda iyo horumarinta dalka,”  ayuu yiri hadalkiisa kusoo gabagabeeyya ra’iisul wasaaraha Soomaaliya.

Socdaalka ra’iisul wasaaraha uu ku tagay Puntland iyo Galmudug ayaa wuxuu qayb ka yahay socdaallo uu dhawaanahan ku marayay gobollada dalka qaarkood, isagoo heshiisyo la galay Ahlusunna iyo Puntland.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/12/2013 1:10 PM EST
Talaado, Maarso 12, 2013 (HOL) — Wasiirka Arrimaha Gudaha iyo Ammaanka Qaranka ee xukuumadda Soomaaliya iyo wafdi uu hoggaaminayo ayaa maanta u dhoofay dalka Saudi Arabia halkaasoo uu kaga qaybgalayo shirweynihii 30-aad ee wasiirrada arrimaha gudaha ee dalalka Carabta.

3/12/2013 12:49 PM EST
Talaado, Maarso 12, 2013 (HOL) — Shirweynaha Qaran ee xiriirka urrurada shaqaalaha Soomaaliyeed ee FESTU oo saddexdii sannaba mar la qabto ayaa maanta ka furmay magaalada Muqdisho ee xarunta Soomaaliya.

3/12/2013 10:14 AM EST
Talaado, Maarso 12, 2013 (HOL) —Gudiga farsamada shirka maamul u sameynta Jubooyinka ayaa manta ka warbixiyay halka uu marayo shirka la doonayo in maamul loogu dhiso gobollada la isku yiraahdo Jubooyinka.

3/12/2013 9:30 AM EST
Talaado, Maarso 12, 2013 (HOL) — Madaxweyne ku xigeenka Somaliland oo ah ku simaha madaxweynaha Md:Cabdiraxmaa Cabdilaahi Ismaaciil Saylici, ayaa maanta kormeer ku tagay mashruuca biyo gelinta xaafaddo ka tirsan magaaladda Hargeysa oo ka socda tuuladda Xaraf ee duleedka galbeed ee magaaladda Hargeysa.

3/12/2013 9:14 AM EST
Talaado, Maarso 12, 2013 (HOL) — Dhibcihii u horreeyey ee roobabka Guga ayaa ka da'ay deegaanno ku yaalla Waqooyiga iyo Koonfurta gobolka Sool, iyadoo roobkan uu kusoo beegmayo xilli la sheegay in xaalad abaareed ay ka taagan tahay deegaanno balaaran oo gobolkaas ku yaalla.

3/12/2013 9:02 AM EST
Talaado, Maarso 12, 2013 (HOL) — Kulan dhexmaray ra’iisul wasaaraha Soomaaliya, Cabdi Faarax Shirdoon (Saacid) iyo maamulka Gaalkacyo oo ay goobjoog ka ahaayeen shacabka ku nool deegaannadaas ayaa saakay ka dhacay waqooyiga degmada Gaalkacyo ee Gobolka Mudug.

3/12/2013 8:14 AM EST
Talaado, Maarso 12, 2013 (HOL) — Ra'iisal wasaaraha Soomaaliya, Cabdi Faarax Shirdoon (Saacid) iyo wafdigii uu hoggaaminayay ayaa kormeeray saakay qaybo ka tirsan magaalada Gaalkacyo, wuxuuna xariga ka jaray garoon kubadda oo loogu magic-daray, Cabdullaahi Ciise Maxamuud.isaga oo dhanka kale kormeeray xabsi dhexe iyo garoon diyaaradeed kuwaasoo howlo dhismo ah ay ku soconayso.

3/12/2013 8:07 AM EST
Talaado, Maarso 12, 2013 (HOL) — Guddoomiyaha Golaha dhexe ee xisbiga talladda haya ee KULMIYE Jaamac Ismaaciil Cigge (Jaamac Shabeel), ayaa iclaamiyay xiliga la qabanayo shirka golaha dhexe ee xisbigaasi.

3/12/2013 2:00 AM EST
Talaado, Maarso 12, 2013 (HOL) — Dab geystay khasaare hantiyadeed oo aad u xooggan ayaa ka kacay suuq ku yaalla degamada Ceelwaaq ee gobolka Gedo, kaasoo lagu magacaabo Suuq Buusaar, iyadoo aan la ogeyn waxa sababay dabkan.

3/12/2013 1:52 AM EST
Talaado, Maarso 12, 2013 (HOL) — Maydadka laba qof oo la toogtay ayaa xalay iyo saakay lagu arkay xaafado ka tirsan degmada Yaaqshiid ee gobolka Banaadir, iyadoo aan la ogeyn sababaha labadaas qof loo dilay iyo kooxaha ka dambeeya dilkooda.

3/12/2013 1:49 AM EST
Talaado, Maarso 12, 2013 (HOL) — Burcadbadeed Soomaaliyeed ayaa lacag madaxfurasho ah kusii daayay markab laga leeyahay dalka Giriigga iyo 26 shaqaale ah oo la socday, kaasoo ay afduub ahaan u haysteen muddo sanad ku dhow.