1/28/2023
Today from Hiiraan Online:  _
Wararka Maanta- Talaado, Mar 12, 2013
Shirweynihii Xiriirka Ururrada Shaqaalaha Soomaaliyeed oo Maanta ka furmay Magaalada Muqdisho (DAAWO SAWIRRO)


Talaado, Maarso 12, 2013 (HOL) — Shirweynaha Qaran ee xiriirka urrurada shaqaalaha Soomaaliyeed ee FESTU oo saddexdii sannaba mar la qabto ayaa maanta ka furmay magaalada Muqdisho ee xarunta Soomaaliya.

Shirweynaha oo ay ka qayb-galayeen ergooyin ka kala socday urrurada ku bahoobay xiriirka ururrada shaqaalaha Soomaaliyeed ee FESTU ayaa waxaa ay ka kala yimaadeen qaybo kala duwan oo dalka ah; waxaana shirweynaha ka qayb-qaadanayay ergo kor u dhaafeyso 100 ruux oo ka socday qeybaha kala duwan ee muruqmaalka Soomaaliyeed.

Furitaankii shirka ayaa waxaa si weyn uga hadlay mas’uuliyiinta FESTU, xubno ka socday baarlamaanka Soomaaliya, hay’adda ILO iyo ururweynaha caalamka ee ay ku mideysan yihiin ururrada shaqaalaha adduunka.

Shirweynaha oo ah midkii ugu horreeyay ee ka dhaca caasimadda Somalia oo ay isugu yimaadeen ururrada shaqaalaha ee madaxa-bannaan waxaa looga hadlay wax-qabadka FESTU, xaaladda bulsho iyo dhaqaale ee dalka, isku keenista shaqaalaha Soomaaliyeed, xuquuqaadka aasaasiga ah ee shaqaalaha Soomaaliyeed iyo sida shaqooyin wax-tar leh loogu abuuri lahaa dhallinyarada Soomaaliyeed.

Mas’uuliyiinta ka hadashay shirweynaha ayaa waxaa ka mid ahaa xoghyaha guud ee Ururka Qaranka Suxufiyiinta Soomaaliyeed ee NUSOJ, Cumar Faaruuq Cusmaan isla markaana ah xoghayaha xiriirka Ururrada Shaqaalaha Soomaaliyeed ee FESTU, isagoo sheegay sheegay in shirweynahan uu yahay mid taariikhi ah; ururkanna uu yahay baarlamaanka ay leeyihiin shaqaalaha Soomaaliyeed oo ay ugu arrinsanayaan aayahooda iyo dhammaan arrimaha samaeynta ku leh shaqada iyo xuquuqyada shaqo ee shaqaalaha Soomaaliyeed.

Wafdi ka socda urur-weynaha ITUC oo ah mid ay ku mideysan yihiin ururada shaqaalaha adduunka si buuxdana u taageeraya shirweynahan, ayaa goob-joog ka ahaa shirka, kuwaasoo maalin ka hor dalka soo gaaray.

Mr. Sylvain Kiza oo matalaayay ITUC iyo urur qaaradeedkeeda Afrika ee loo yaqaan isagana ITUC ayaa u sheegay ergada ka qayb-galaysa shirweynaha in ITUC iyo ITUC Afrika oo aqoonsan isla markaana garab-taagan FESTU inay kasoo qayb-galaan shirweynaha labaad ee FESTU.

Kiza waxaa uu sheegay inuu salaan iyo taageero ugu wado hoggaanka FESTU iyo ergada shirweynaha mas’uuliyiinta ITUC iyo ITUC Afrikaa iyaga oo hiil iyo hooba la garabtaagan sidii xooggii iyo firfircoonidii shaqaalaha Soomaaliyeed u soo laaban lahayd; isagoo hoosta ka xariiqay taageerada loo hayo bahweynta shaqaalaha Soomaaliyeed ee ku mideysan FESTU. 

Kulanka ayaa sidoo kale waxaa ka hadlay guddiga adeegga bulshada ee  golaha baarlamaanka Soomaaliyeed oo ay wakiil u ahayd xildhibaanad Aamina Maxamed Cabdi; iyadoo ku nuux-nuuxsatay sida ay dowladda federaalka gaar ahaan baarlamaanka ay ugu go’an tahay sidii lagu difaaci lahaa shaqaalaha Soomaaliyeed.

Ururka shaqaalaha adduunka ee ILO ayaa shirweynaha u soo diray fariin gaar ah; iyadoo sarkaal ka tirsan ILO uu ka yimid magaalada Nairobi si uu goobjoog ugu ahaado shirweynaha. ILO ayaa sheegay inay kala shaqeyn doonto FESTU sidii loo horumarin lahaa danaha shaqaalaha Soomaaliyeed loona abuuri lahaa shaqooyin tayo leh.

Doodada shirka oo si xoog leh u socday ayaa sidoo kale waxaa galabta la gudo-galay doorashada hoggaanka ururka ee muddada seddexda sano ah ee soo socota; iyadoo natiijadii lagu dhawaaqay ka hor intii uusan shirka lasoo xirin .

FESTU ayaa ah ururkii ugu horreeyay ee ay leeyihiin ururada shaqaalaha madaxa-bannaan ee Soomaaliyeed oo la sameeyo tan iyo markii dowladdii militariga ahayd dhacday; iyadoo isla markaana ah ururka kaliya ee xubinta ka ah ururweynaya shaqaalaha addunka iyo midka Afrikaa wuxuuna meel mariyay qaraaro ku aaddan arrimaha shaqada iyo shaqaalaha Soomaaliyeed.

Shirweynaha ayaa sidoo kale waxaa taageero u fidiyay ururrada kale ee bah-wadaagta la ah shaqaalaha Soomaaliyeed ee ka kala dhisan Afrika iyo Yurub si loo taageero hannaanka ay waddo FESTU ee dib loogu soo celinaayo dhaqdhaqaaha ururada shaqaalaha Soomaaliyeed.















Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
3/12/2013 1:35 PM EST
Talaado, Maarso 12, 2013 (HOL) — Ra’iisal wasaaraha Soomaaliya, Cabdi Faarax Shirdoon (Saacid) oo maanta soo gaba-gabeeyay kormeer saddex maalmood qaatay oo uu kusoo maray maamul-goboleedyada Puntland iyo Galmudug ayaa ku tilmaamay socdaalkiisa guul dhanka arrimaha gudaha iyo amniga laga gaaray.

3/12/2013 1:10 PM EST
Talaado, Maarso 12, 2013 (HOL) — Wasiirka Arrimaha Gudaha iyo Ammaanka Qaranka ee xukuumadda Soomaaliya iyo wafdi uu hoggaaminayo ayaa maanta u dhoofay dalka Saudi Arabia halkaasoo uu kaga qaybgalayo shirweynihii 30-aad ee wasiirrada arrimaha gudaha ee dalalka Carabta.

3/12/2013 10:14 AM EST
Talaado, Maarso 12, 2013 (HOL) —Gudiga farsamada shirka maamul u sameynta Jubooyinka ayaa manta ka warbixiyay halka uu marayo shirka la doonayo in maamul loogu dhiso gobollada la isku yiraahdo Jubooyinka.

3/12/2013 9:30 AM EST
Talaado, Maarso 12, 2013 (HOL) — Madaxweyne ku xigeenka Somaliland oo ah ku simaha madaxweynaha Md:Cabdiraxmaa Cabdilaahi Ismaaciil Saylici, ayaa maanta kormeer ku tagay mashruuca biyo gelinta xaafaddo ka tirsan magaaladda Hargeysa oo ka socda tuuladda Xaraf ee duleedka galbeed ee magaaladda Hargeysa.

3/12/2013 9:14 AM EST
Talaado, Maarso 12, 2013 (HOL) — Dhibcihii u horreeyey ee roobabka Guga ayaa ka da'ay deegaanno ku yaalla Waqooyiga iyo Koonfurta gobolka Sool, iyadoo roobkan uu kusoo beegmayo xilli la sheegay in xaalad abaareed ay ka taagan tahay deegaanno balaaran oo gobolkaas ku yaalla.

3/12/2013 9:02 AM EST
Talaado, Maarso 12, 2013 (HOL) — Kulan dhexmaray ra’iisul wasaaraha Soomaaliya, Cabdi Faarax Shirdoon (Saacid) iyo maamulka Gaalkacyo oo ay goobjoog ka ahaayeen shacabka ku nool deegaannadaas ayaa saakay ka dhacay waqooyiga degmada Gaalkacyo ee Gobolka Mudug.

3/12/2013 8:14 AM EST
Talaado, Maarso 12, 2013 (HOL) — Ra'iisal wasaaraha Soomaaliya, Cabdi Faarax Shirdoon (Saacid) iyo wafdigii uu hoggaaminayay ayaa kormeeray saakay qaybo ka tirsan magaalada Gaalkacyo, wuxuuna xariga ka jaray garoon kubadda oo loogu magic-daray, Cabdullaahi Ciise Maxamuud.isaga oo dhanka kale kormeeray xabsi dhexe iyo garoon diyaaradeed kuwaasoo howlo dhismo ah ay ku soconayso.

3/12/2013 8:07 AM EST
Talaado, Maarso 12, 2013 (HOL) — Guddoomiyaha Golaha dhexe ee xisbiga talladda haya ee KULMIYE Jaamac Ismaaciil Cigge (Jaamac Shabeel), ayaa iclaamiyay xiliga la qabanayo shirka golaha dhexe ee xisbigaasi.

3/12/2013 2:00 AM EST
Talaado, Maarso 12, 2013 (HOL) — Dab geystay khasaare hantiyadeed oo aad u xooggan ayaa ka kacay suuq ku yaalla degamada Ceelwaaq ee gobolka Gedo, kaasoo lagu magacaabo Suuq Buusaar, iyadoo aan la ogeyn waxa sababay dabkan.

3/12/2013 1:52 AM EST
Talaado, Maarso 12, 2013 (HOL) — Maydadka laba qof oo la toogtay ayaa xalay iyo saakay lagu arkay xaafado ka tirsan degmada Yaaqshiid ee gobolka Banaadir, iyadoo aan la ogeyn sababaha labadaas qof loo dilay iyo kooxaha ka dambeeya dilkooda.

3/12/2013 1:49 AM EST
Talaado, Maarso 12, 2013 (HOL) — Burcadbadeed Soomaaliyeed ayaa lacag madaxfurasho ah kusii daayay markab laga leeyahay dalka Giriigga iyo 26 shaqaale ah oo la socday, kaasoo ay afduub ahaan u haysteen muddo sanad ku dhow.