3/28/2024
Today from Hiiraan Online:  _
Wararka Maanta- Arbaco, July 3 , 2013
Ololihii Doorashooyinka Puntland oo Galay Wareeggii Labaad iyo Askar fara badan oo Maanta la dhoobay Boosaaso (SAWIRRO)


Arbaco, July 03, 2013 (HOL) — Iyadoo lagu guda jiro wareegii labaad ee ololaha doorashooyinka goleyaasha deegaanka ee Puntland, islamarkaana maanta uu ku qornaa ururka xukuumadda ee HORSEED, ayaa waxaa ciidamo aad u tira badan lasoo dhoobay jidadka muhiimka ah ee magaalada Boosaaso.

Boqollaal askari oo isugu jira ciidamada badda, kuwa ilaalada madaxtooyada iyo booliska degmada oo wata gaadiidka dagaalka ayaa lagu arki karey waddooyin ay kamid yihiin: jidka gala garoonka diyaaradaha, laamiga mara bartamaha magaalada, jidka madaxtooyada iyo agagaarka xarumaha waaweyn ee dowladda.

Qaar ka mid ah saraakiisha ciidamada oo aan khadka telefoonka kula xiriirnay, islamarkaana ka gaabsaday in magacyadooda la baahiyo, ayaa sheegay in sababta ciidamada tirada badan maanta magaalada loosoo dhoobay ay tahay, kaddib markii laga baqay in uu magaalada Boosaaso ka dhaco dibad bax ballaaran oo ka dhan ah ololaha ururka Horseed.

Dhinaca kale, taageerayaasha ururka xukuumadda ee HORSEED oo wata gawaari basas u badan, ayaa iyaga oo kolonyooyin ah, islamarkaana ruxaya boorar ay ku qoran yihiin hal-kudhigyo lagu taageerayo ururka HORSEED iyo cod baahiyeyaal laga daaray heeso waddani ah, waxay kusoo wareegeen inta badan xaafadaha magaalada.

Garoonka kubadda cagta ee Boosaaso (Isbartiimada) ayaa waxaa isugu soo ururay ugu danbeyntii taageerayaasha ururka HORSEED, waxaana halkaas khudbado kala duwan ka jeediyey mas'uuliyiinta ururka HORSEED ee degmada Boosaaso.

Magaalooyin kale oo ay kamid yihiin Qardho, Dhahar iyo Garoowe ayaa waxaa iyagana sidan oo kale maanta isugu soo baxay taageerayaasha ururka HORSEED, inkasta oo magaalada Gaalkacayo uu ka dhacay iska hor imaad dhex maray ciidamada dowladda iyo kooxo hubeysan, kaas oo khasaare nafeed oo badan geystey.




Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
7/3/2013 5:33 PM EST
Arbaco, July 03, 2013(HOL)—Kaddib mudaharaadyo xiriir ahaa oo dhawaanahan ka socday magaalada Qaahira ee xarunta dalka Masar, gaar ahaan halkii looga mudaharaaday Madaxweynihii hore Maxamed Xusni Mubaarak ayaa waxay ugu dambeyntii keeneen in xukunka xoog looga wareejiyo madaxweynaha Masar Maxamed Musri oo xilli yar waddanka soo xukumayay.

7/3/2013 4:12 PM EST
Arbaco, July 03, 2013(HOL) — Xukuumadda Britain ayaa ku dhawaaqday in ay mamnuuceyso qaadka oo ay u aragto in uu halis caafimaad sababo, isla markaana uu la mid yahay daroogada qaarkeed.

7/3/2013 11:30 AM EST
Arbaco, July 03, 2013 (HOL) — Ergayga Midowga Afrika ee arrimaha Somalia dajire Maxamed Saalax Anaadiif ayaa maanta kulan la yeeshay madaxweyne Xasan Sheekh Maxamuud iyo ra’iisul wasaare Cabdi Faarax Shirdoon (Saacid) kaasoo ay kaga hadleen dagaalladii ka dhacay Kismaayo.

7/3/2013 10:51 AM EST
Arbaco, July 03, 2013 (HOL) — Madaxweynaha Puntland C/raxmaan Maxamed Maxamuud (Faroole) oo todobaadyadii ugu danbeeyey safar shaqo dalka dibaddiisa ugu maqnaa ayaa maanta dib ugu soo laabtay caasimadda Puntland ee Garoowe.

7/3/2013 9:34 AM EST
Arbaco, July 03, 2013 (HOL) — Xildhibaannada baarlamaanka Soomaaliya oo maanta kulan ku yeeshay Muqdisho ayaa ansixiyeen hindise sharciyeedka dib u eegista iyo hirgelinta dastuurka dalka.

7/3/2013 9:10 AM EST
Arbaco, July 03, 2013 (HOL) — Xarakada Al-shabaab ayaa madaafiic hoobiye ah xalay iyo saakay ku weeraray saldhigyo ay ciidamada AMISOM iyo kuwa Itoobiya oo ku kala sugan garoonka diyaaradaha Baydhabo iyo warshadda Xaseey, lana oga khasaaraha ka dhashay weerarradaas.

7/3/2013 8:24 AM EST
Arbaco, July 03, 2013 (HOL) — Magaalada Gaalkacayo ee xarunta gobolka Mudug, waxaa maanta ka dhacay iska hor imaad khasaare badan geystey oo dhex maray ciidamada ammaanka ee Puntland iyo kooxo hubeysan oo kasoo horjeeda ololaha doorashada ee ururka Horseed ee uu hoggaamiyo Madaxweyne Faroole.

7/3/2013 8:23 AM EST
Arbaco, July 03, 2013 (HOL) — Maxkamada degmada Hargeysa, ayaa maanta xukun xadhig iyo ganaax iskugu jira ku riday masuuliyiinta wargeyska madaxa banaan ee HUBAAl ka dib markii xayiraad la saaray wargeyska oo dacwadiisi ka socotay maxkamadda.

7/3/2013 8:20 AM EST
Arbaco, July 03, 2013 (HOL) — Golaha mucaaradka Puntland oo shir-jaraa'id ku qabtay xafiiskooda magaalada Boosaaso, ayaa sheegay in maanta laga horjoogsaday bannaan bax nabadeed oo ka dhan ah urur-siyaasadeedka Horseed.

7/3/2013 7:16 AM EST
Arbaco, July 03, 2013(HOL) :- Mudnayaasha baarlamaanka federaalka Soomaliya ee kasoo jeeda gobollada Jubooyinka iyo Gedo ayaa booqday dhaawacyadii ciidamada dowlada Soomaaliya iyo dad rayid ah oo kusoo dhaawacmay dagaaladii ka dhacay magaalada kismaayo ee xarunta gobolka jubada hoose kuwaasoo lasoo dhigay isbitaalka Madiino ee magaalada Muqdisho.

7/3/2013 4:01 AM EST
Arbaco, July 03, 2013 (HOL) — Magaalada Seattle ee gobolka Washington ayaa lagu soo gabagabeeyey koob kubadda koleyga ah oo loogu magic-daray isbuucii Soomaalida iyo tartan kubadda koley ah kaasoo lagu soo beegay munaasabadda 53-guuradii xoriyadda Soomaaliya. Cayaarahaan oo soo socday muddo toddobaad ah ayaa lasoo gabagabeeyay 01-dii Luuliyo.

7/3/2013 4:00 AM EST
Arbaco, July 03, 2013 (HOL) — Guddoomiyaha bankiga dhexe, Cabdisalaan Cumar Hadliye ayaa iska fogeeyay warbixinta ku saabsan in 80% lacagaha kusoo xarooday bankiga dhexe ee Soomaaliya ay la baxeen shaqsiyaad gaar ah oo ay soo saartay Qaramada Midoobay.