12/9/2022
Today from Hiiraan Online:  _
Wararka Maanta- Isniin, Jan 7 , 2013
Wasiirro ka tirsan Xukuumadda Kenya oo Dalbaday in Xaafadda Islii [Easleigh] laga soo saaro Saraakiisha Ciidamada Howlgallada wada
Isniin, Jannaayo 07, 2013 (HOL) —  Wasiirro ka tirsan xukuumadda Kenya ayaa dalbaday in si dhaqso ah looga soo saaro xaafadda Soomaalidu degto ee Islii saraakiisha hoggaaminaya ciidamada Kenya ee howgallada kawada xaafaddaas, kuwaasoo ay ku eedeeyeen inay geystaan xadgudubyo iyo dhac.


Wasiirka difaaca, Yuusuf Xaaji iyo wasiirka horumarinta gobolka Waqooyi-bari ee Kenya, Maxamed Cilmi ayaa ka dalbadeen dowladda inay shaqada ka cayriso saraakiisha lagu eedeeyo inay dadka dhibaatooyin u geystaan, iyagoo ku mar-marsiinyo ka dhigaya sugidda ammaanka.

"Baarlamaanku waa inuu si dhaqso ah ku xalliyaa arrintan; diiwaangelin ayaana ku soo sameynaynaa dhacdooyinka waxaana tusaynaa xukuumadda, waayo ma ahan mid aan ka aamusi karno," ayuu si caro leh ku yiri Yuusuf Xaaj oo hoggaaminayay koox ka tirsan baarlamaanka Kenya oo dhawaan la kulmay guddiga ganacsatada xaafadda Islii.

"Waan sheegaynaa saraakiisha booliiska umana dul-qaadanayno dhibaatooyinka ay ku hayaan shacabkeenna," ayuu wasiirku hadalkiisa ku daray, isagoo la hadlayay baarlamaanka Kenya.

Xildhibaannada kala ah: Aadan Barre Ducaale, Yuusuf Xaaji, Ibraahim Maxamed Cilmi iyo Safiyo Cabdi oo dhammaantood laga soo doorto gobolka Waqooyi-bari ee Kenya ayaa waxay sheegeen in ciidamada Kenya ay dhibaatooyin kala duwan u geysteen shacabka ku nool Islii, iyagoo ugu marmarsiyoonaya inay yihiin argagaxiso oo lug ku lahaa weerarro ka dhacay xaafaddaas sannadkii hore.

Xasan Guuleed oo u hadlay guddiga ganacastada xaafadda Islii ayaa ku eedeeyay ciidamada ammaanka Kenya inay dadka lacago ka qaataan sidoo kalena ay dhac u geysteen hanti shacabku leeyahay, ayna si aan kala sooc lahayn u dhibaateeyaan dadka ku nool xaafadda Islii.

"Dadka la xiro noocuu doono ha ahaado qof weyn iyo ilmo waxay ciidamadu ka qaataan lacag gaaraysa 15,000 oo lacagta Kenya ah. Ganacsade ayaa isaguna ii sheegay in laga dhacay 500,000 oo lacagta Kenya ah," ayuu yiri Guuleed.

Laakiinse, taliyaha waaxda dambi-baarista booliiska Kenya ee ku taalla Pangani, Mr Dumba Tankarani ayaa diiday eedeymahaas, wuxuuna sheegay in dadka lasoo qabto ay iyaguna lacagaha u bixiyaan si loo sii daayo, iyaguna aysan ka qaadan wax lacag ah.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
1/7/2013 11:02 AM EST
Isniin, Jannaayo 07, 2013 (HOL) — Golaha wakiillada Puntland ayaa maanta cod aqlabiyad leh ku meel mariyey miisaaniyadda dowladda ee sanadkan cusub ee 2013 oo ay maalmihii u danbeeyey ka doodayeen.

1/7/2013 10:58 AM EST
Isniin, Jannaayo 07, 2013 (HOL) —Jaamacad cusub oo loogu magic-daray Jaamacada caalamiga ah ee Soomaaliya (Somali International University) ayaa maanta lagu furay Muqdisho, iyadoo xarunta Jaamacadan laga dhigay dugsigii hoose/dhexe ee Muuse Galaal oo ku yaalla degmada Howl-wadaag.

1/7/2013 9:32 AM EST
Isniin, Jannaayo 07, 2013 (HOL) — Wasiirka wasaaradda amniga ee Puntland Col. Khaliif Ciise Mudan oo maanta shir jaraa'id ku qabtay magaalada Boosaaso, ayaa ka jawaabay hadal ka soo yeeray hoggaanka xarakada Al-shabaab oo ahaa: in ay dhowaan ku dhaqanka shareecada ka hirgelin doonaan Puntland.

1/7/2013 9:30 AM EST
Axad, Jannaayo 06, 2013 (HOL) — Ergeyga gaarka ah ee Midowga Afrika u qaabilsan arrimaha Soomaaliya, Maxamed Annadif ayaa sheegay in AMISOM ay lasii shaqeynayso hay’adda nabad-sugidda Qaranka Soomaaliyeed oo u dabbaal-degtay shalay sannadguuradii 41-aad ee kasoo wareegtay aasaaskii hay’adda nabadsugidda Soomaaliya.

1/7/2013 9:16 AM EST
Isniin, Jannaayo 07, 2013 (HOL) — Golaha wasiirrada xukuumadda Soomaaliya ayaa maanta oo Isniin ah yeeshay shir ay uga hadleen arrimo ay ka mid yihiin ammaanka iyo horumarka ay ciidamada dowladdu sameeyeen, iyadoo shirkii maanta uu shir-guddoominayay ra’iisul wasaaraha Cabdi Faarax Shirdoon (Saacid).

1/7/2013 8:43 AM EST
Isniin, Jannaayo 07, 2013 (HOL) — Wasiirka Maaliyadda Somaliland, Cabdicasiis Maxamed Samaale ayaa ka hadlay khilaafkii soo kala dhexmaray shirkadaha jaadka iyo wasaaradda Maaliyadda. Wasiirku wuxuu tilmaamay waxyaalaha ay shirkadaha jaadka ka biyo diideen oo uu xusay in cashuurtii ay bixin jireen waxyar loogu kordhiyey iyo xaga sarifka lacagaha oo qiimo hoose laga qaadi jiray oo iyana wax lagu kordhiyey, taas laba ka mid ah shirkadaha qaad diideen inay fuliyaan go’aankaasi, waxaanay taasi keentay in jaadkoodii kontorabaaniyaan, isla markaana uu ka dhasho khasaare soo gaadhay ciidanka booliska iyo shirkada qaadka laftoodaba.

1/7/2013 8:32 AM EST
Isniin, Jannaayo 07, 2013 (HOL) — Madaxweynaha Soomaliya, Xassan Sheekh Maxamuud ayaa ka qayb-galay xiritaanka kalfadhigii koowaad ee baarlamaanka Soomaaliya oo soo billowday sannadkii hore, kuwaas oo soo doortay madaxweynaha Soomaaliya bishii 10-kii bishii September ee sannadkii hore.

1/7/2013 7:14 AM EST
Isniin, Jannaayo 07, 2013 (HOL) —Kooxo hubeysan ayaa xalay weerar Bambaano ku qaaday xarun ku taal xaafadda V-afmadow ee magaalada Kismaayo, halkaasoo ay daganaayeen saraakiil katirsan ciidamada dowladda.

1/7/2013 4:57 AM EST
Isniin, Jannaayo 07, 2013 (HOL) — Xubnaha sarsare xisbiga DADKA oo ka mid ah xisbiyada siyaasdeed ee dalka ka jira ayaa booqasho ku tagay deegaanno ka tirsan gobolka Bay, iyagoo dhawaan xafiis ka sameystay degmada Baydhabo ee xaruna gobolkaas.

1/7/2013 1:55 AM EST
Isniin, Jannaayo 07, 2013 (HOL) — Ciidammo aad u tira badan ayaa saaka lagu soo daayiyay magaalada Boosaaso. Meelaha ay ciidamadu sida aadka ah u joogaan waxaa kamid ah suuqa, jidka madaxtooyada aada, jidka garoonka iyo xaafadaha (Laanta-hawada) iyo (Xaafatul-carab). Labadan xaafadood oo ay ku yaallaan inta badan xarumaha dowladda iyo kuwa hay'adaha caalamiga ah.

1/7/2013 1:17 AM EST
Isniin, Jannaayo 07, 2013 (HOL) — Madaxweynaha maamulka Galmudug, Jen. Cabdi Xasan Cawaale (Qaydiid) ayaa sheegay inuu billowday qorshe lagu mideynayo guud ahaan maamullada ka jira gobollada dhexe ee Soomaaliya, isagoo sheegay in kulan u socday Ahlusunna iyo Galmudug maanta oo Isniin ah lasoo gabagabeynayo.

1/7/2013 1:12 AM EST
Isniin, Jannaayo 07, 2013 (HOL) — Afhayeenka AMISOM, Col. Cali Aadan Xumud ayaa sheegay inuu si fiican u socdaan howlgalka lagu adkaynayo amniga magaalada Muqdisho ee xarunta Soomaaliya, isagoo intaas ku daray in howgallada lagu sugayo ammaanka ay si wadajir ah u fulinayaan habeen iyo maalin booliiska dowladda Soomaaliya iyo kuwa AMISOM.